1 Mi ki ulunguy David e tin th’abi fel’ e salthaw nu Israel, me yan i gamen 30,000 e pumo’on u gubin, 2 me fekrad nga Baalah ni bay u lan yu Judah, ni ngar feked fare Kahol ko M’ag rok SOMOL ni bayriy fithingan SOMOL ni Gubin ma Rayag Rok, ni be par u tagil’ u thilin fa gali n’en ni bay pon ni kerubim fithingan. 3 Miyad fek u tafen Abinadab ni bay u daken e burey miyad tay nga daken ba cart nma girengiy e garbaw ni pumo’on. Mi Uzzah nge Ahio, ni Abinadab e chitamangirow, e ranownag fare cart, 4 mi Ahio e be yan u but’ u m’on ko re cart nem. 5 Mi David nge urngin piyu Israel e yad be churu’ ma yad be tang ni kemus rogorad ni aram e yad be tay fan SOMOL, ni yad be chubeg tatalin e musik ni harp, nge lyre, nge drum, nge kastanet, nge cymbal.

6 Nap’an nra bad ko gin ni yima gunugunuy wom’ngin e grain riy u Nakon, me dol’ e garbaw, me k’iyag Uzzah pa’ nge kol fare Kahol ko M’ag. 7 Ka chingiyal’ nem me damumuw SOMOL ni Got ngak Uzzah nge li’ ngem’ ni bochan e dariy madgun SOMOL u wan’, me yim’ Uzzah u rom u to’oben fare Kahol Ko M’ag. 8 Me ri puwan’ David ni bochan e ke damumuw SOMOL ke gechignag Uzzah; ma aram min tunguy Perez Uzzah*6:8 PEREZ UZZAH: fan re bugithin ney ni Hebrew e "gechig." ko gin’em ma ke par riy ni aram rogon ke mada’ ko bin daba’ e rran.

9 Me rus David ngak SOMOL me ga’ar, "Uw rogon ni nggu fek e re Kahol ko M’ag ney e chiney?" 10 Me turguy u wan’ ndab ki fek nga Jerusalem ni binaw rok; me cheal nge fek i yan ko naun rok Obed ni ba Edomite, ni be’ ko binaw nu Gath. 11 Me par fare Kahol ko M’ag u rom ni dalip e pul, me fal’eg SOMOL rogon Obed Edom nge girdi’en e tabinaw rok.

12 Me rung’ag David ni Pilung nike fal’eg Got rogon girdi’en e tabinaw rok Obed Edom nge urngin e tin bay rok ni bochan fare Kahol ko M’ag; ma aram me yan i fek u na’un rok Obed nge fek i yan nga Jerusalem, ni ba ga’ e madnom ntay ni fan ngay. 13 Fapi girdi’ ni kar mat’niged fare Kahol ko M’ag e nap’an ni nga nel’ yay ni kar ruf’ed ayrad, me li’ David ba garbaw nge ba saf nib sugsug nge pi’ ngak SOMOL ni maligach. 14 Me churu’ David nike musmus nga rogon ni be tay fan SOMOL, ni kemus ni bangi mad nib wech e bay u lukngun. 15 Ma aram miyad fek piyu Israel ni gubin fare Kahol ko M’ag i yan ngar mada’gad nga Jerusalem ni yad be garus ma yad be l tolulnag e felfelan’ ma yad be thoy e yabul.

16 Ma nap’an nni fek fare Kahol ko M’ag i yib ngalan binaw u Jerusalem, me changar Mikal u winda, ni be’ ni ppin ni fak Saul, me guy David ni Pilung ni be churu’ ma be og ngalang u fithik’ fare churu’ ni fan ngak Got, me ri dabuy. 17 Miyad fek fare Kahol ko M’ag ngranod ra ted nga tagil’ u lan fare tent nike ngongliy David ni ngan tay ngay. Me pi’ David e gamanman ni maligach ngak SOMOL nge pin’en ni nge fal’eg thilin SOMOL nge girdi’. 18 Nap’an ni mu’ i pi’ e pi maligach, me yibilay e girdi’ nga fithingan SOMOL ni Gubin ma Rayag Rok. 19 Ma aram e ra reb e pumo’on nge reb e ppin nu Israel me pi’ David reb e flowa ngak, nge bang e ufin ni kan urfiy, nge boch e raisin. Mara be’ me sul nga tafen.

20 Me sul David nga tabinaw rok nge yan i guy girdi’en e tabinaw rok, me yan Mikal ni be’ ni bpin ni fak Saul nga wuru’ e naun ni nge mada’nag David. Me ga’ar, "En ni pilung nu Israel e ke gilnag buguwan e daba’! Ya ke chuweg madan u daken u p’eowchen e pi’in ni ppin ni tapigpig ko pi tolang ni bay nga tan pa’ ke darifannag ir!"

21 Me ga’ar David, "Ug churu’ ni gu be tay fan SOMOL, ni ir e ke turguyeg ni gag e ngu’ug gagiyegnag yu Israel ni girdi’ rok, ya mm’agan’ ngay ni nggu wan nga luwan e chitamam nge girdi’ nu tabinaw rok. Bay ug churu’ ni gu be tay fan SOMOL, 22 ma gu be darifan nigeg. Sana ga be leamnag ndariy fag, machane pi ppin nem ni ga be yog e bay fag u wun’rad!"

23 Mi Mikal ni fare pin ni fak Saul e de diyen bi’id.