2 SAMUEL 8

Gel ni i tay David ko mael

1 Me yan i bangiyal’ me mael David ni Pilung ngak e pi Filistine bayay nge gel ngorad, me taleg e pi gagiyeg ni ur ted u daken fare nam.

2 Ma aram miki gel ngak piyu Moab. Me yog ni pi kalbus e ngar thiggad nga but’ min the’egrad ni yu dadalip min li’ l’agruw. Ma aram me par piyu Moab nga tan pa’ ngu’ur pi’ed e tax ngak.

3 Miki gel David ngak Hadadezer nib mo’on ni fak Rehob ni Pilung u Zobah, reb e binaw nu Syria, u nap’an ni be milekag Hadadezer i yan ni nge fulweg nga tanggin e gagiyeg rok bang e binaw ni bay nga pe’bugul e lul’ ni Eufrates. 4 Me kol David 1,700 e salthaw rok Hadadezer ni ma yan u os nge 20,000 e salthaw rok ni yad be yan u but’. Me tay David boch e pi os nem ni nge fanay 100 e chariot rok ma go’ th’ab e graw u ay e tin ni magey nge dakiyag nranod.

5 Nap’an ni l’oeg e girdi’ nu Syria ni yad ma par u Damascus ba raba’ i salthaw ni ngar ayuweged Hadadezer ni Pilung, me cham David ngorad nge li’ nge yim’ 22,000 fapi salthaw. 6 Ma aram me n’uf e pi tent ko salthaw u lan taferad, mar pired u tan pa’ ngu’ur pi’ed e tax ngak. Me tay SOMOL i David ngi i gel u gubin yang. 7 Me kunuy David fapi shield nib gol nma fek e pi tolang ko salthaw rok Hadadezer nge fek nga Jerusalem. 8 Ma ku errogon niki fek e bronze nib yo’or u Betah ngu Berothai, ni pi binaw ni i gagiyegnag Hadadezer.

9 Me rung’ag Toi ni Pilung nu Hamath nike gel David ngak urngin e yu raba’ i salthaw rok Hadadezer. 10 Ma aram me l’oeg Toi i Joram ni be’ nib pumo’on ni fak nge yan i nang salpem David ni Pilung me pining e magaer ngak nike gel rok Hadadezer, ni facha’ nike yo’or yay ni kar mael gow Toi. Me fek Joram bogi tow’ath i yan ngak David nni ngongliy ko gol, silber, nge bronze. 11 Me pi’ David ni Pilung fapi tow’ath ni ngan fanay ko liyor ngak SOMOL, nib mu’un e pi silber nge gol nni fek ko pi nam ni i gel ngay — 12 pi nam nu Edom, Moab, Ammon, Filistia, ngu Amalek — nge ku boch fa pin’en ni fek rok Hadadezer.

13 Miki gel boch e gilbugwan rok David nga feni sorok nnap’an ni sul nike thang e fan rok ragag nge meruk e biyu’ e pi Edomite u lan e Laway ni Sol. 14 Me n’uf e pi tent ko salthaw u lan yu Edom, ma girdi’ u rom e ra pired nga tan pa’ David. Me tay SOMOL David ngi i gel u gubin yang.

15 Me gagiyeg David u daken yu Israel ni ga’ngin ma be guy ni nge par e girdi’ rok ni gubin ngiyal’ ni yibe aywegrad ni bfel’ ma ba mat’aw rogon. 16 I Joab ni chitinngin e Zeruyah, e ir e tolang ko salthaw; me Jehoshafat nib mo’on ni fak Ahilud e ir e ba milfan babyoren urngin ban’en ngak; 17 I Zadok nib mo’on ni fak Ahitub, nge Ahimelek nib mo’on ni fak Abiathar e yow e prist; me Serayah e ir e tayol, 18 me Benayah nib mo’on ni fak Jehoyada e ir e ga’ ko pi’in yad e matnag rok David; ma pi’in pumo’n ni fak David e yad e prist.