Nlir aAmos 1

Alár AAmot

1 Nnap nlà va ta̱ uAmot uzəngtəng ka̱ ashe onəm oga nkpak iya̱m nkang kà̱ ìtong aTeka̱wa ka̱m ka̱ atak Inan ka̱ ashe alár, ìzun pa̱ ìparəm kang mbin wong yənggət, ka̱ ashe nra va̱ ta te, uUza̱ya uwa uponzhi uga aYahudi, uYerobwam uya aYowash nnyi te ka̱ yà uponzhi uga aIsa̱rila. 2 Uza̱ là pa̱,

<<UYawe ɗum wa ìlir ka̱ ashe aSiyona,

ichəchu wa ìgbarman ka̱ aUrushelima ,

á nak te atak nkpak iya̱m nkang wom, onəm oga nkpak iya̱m nkang yə́ng,

Ipəpà ka̱ apal Aɓam aKarmel lwai.>>

Nnyám ntàn Inan ka̱ apal onəm va ra kà̱ ngba̱k oIsa̱rila

ASiriya

3 UYawe là pa̱,

<<Onəm oga aDimaska nəm nnap mɓá̱ngɓa̱ng chit dədan,

Mi yà ka̱ ǹre oza̱ pa ka̱t, nkpak pa̱ ń nyám ntàn óza̱,

Ka̱kul oza̱ nə́m onəm mi ka̱ aGileyat

ká̱ nkumbək wa nva mí pək ikur á.

4 Ka̱kul nva̱ ta te, mi re ǹre ká̱ apər kà̱ nzhi iponzhi aHazayel,

a va i zhì akamsəlang aBenhadad.

5 Mi chwan anung asa̱l ìtong aDimaska,

mi dərkən onənəm kà̱ mba̱nda̱m aAva̱n.

Mi zhì uponzhi uga aBet-Eden,

onəm oga aAram te mí ga izwal ká̱ oza̱ ka̱ aKir,>>

uYawe à là.

OFilisti

6 UYawe là pa̱,

<<Onəm oga aGaza nəm nnap mɓá̱ngɓa̱ng chit dədan,

nkpak pa̱ ń nyám ntàn óza̱.

Ka̱kul oza̱ wur nkpaktak onəm ga ká̱ kà̱ mbin nkak.

Oza̱ yáp ká̱ oza̱ wa ozwal oga aEdom.

7 Ka̱kul nva̱ ta te, mi re ǹre ká̱ apər ka̱ apal anyán va̱ gang aGaza,

i pwák akamsəlang va̱ ta.

8 Mi dərkən onəm oga aAshdod,

ká̱ uponzhi uga aAshəkelon.

Te mi nak awo ka̱ aEkron kpa,

aɓo oFilisti va̱ re te mi zhì,>>

uPonzhinan uYawe à là.

ATaya

9 UYawe là pa̱,

<<Onəm oga aTaya nəm nnap mɓá̱ngɓa̱ng chit dədan,

nkpak pa̱ ń nyám ntàn óza̱.

Ka̱kul oza̱ ɓəkchi nsar nnap-nlà igənang oza̱,

oza̱ yáp ká̱ nkpaktak ìtong oga aEdom.

10 Ka̱kul nva̱ ta te, mi re ǹre ká̱ apər i ri anyán aTaya,

i zhì akamsəlankamsəlang.>>

AEdom

11 UYawe là pa̱,

<<Onəm oga aEdom nəm nnap mɓá̱ngɓa̱ng chit dədan,

nkpak pa̱ ń nyám ntàn óza̱.

Ka̱kul uza̱ wà ogənnang wò ká̱ ndokchi,

uza̱ nyám nrwa ìgwak óza̱ ka̱t,

uza̱ re nlak ìgwak ká̱ oza̱ ka̱t,

kang uza̱ kpán mmən ìkum ká̱ oza̱ mbyet mbyet.

12 Ka̱kul nva̱ ta te, mi re ǹre ká̱ apər ka̱ aTeman,

i zhì akamsəlang aBozrah.>>

AAmmon

13 UYawe là pa̱,

<<Onəm oga aAmmon nəm nnap mɓá̱ngɓa̱ng chit dədan,

nkpak pa̱ ń nyám ntàn óza̱.

Ka̱kul oza̱ cha afu ochar oga anyám ka̱ aGileyat

ká̱ ndokchi pa̱ na ó bol mbin oza̱.

14 Ka̱kul nva̱ ta te, mi re ǹre ká̱ apər i ri anyán aRabba,

i zhì akamsəlankamsəlang.

Mí bà achu kà̱ ìlum ìkum va̱ ta,

i kandar wa ǹyə̀r nvàngváng nkánkám.

15 UPonzhi oza̱ i ga izwal,

ká̱ oponzhi oga avəvəng nzəng ká̱ na.>>

UYawe à là.