Nlir aAmos 7

Oga iwon ka̱ ashe alár pa̱ shatɗing

1 Alár va ta̱ uPonzhinan uYawe nyám á mi. N ya uza̱ kà̱ nfa ká̱ mbankum ka̱ ashe mbin, kà̱ nva̱ngva̱ mmá kpam nrì aponzhi chit, kang oza̱ ɓàn ntə́p kà̱ɗi . 2 Kà̱ nva̱ngva̱ mbankum gba̱l ká̱ nri iya̱m va tə́p kà̱ mbin te, n là pa̱, <<Áponzhi Inan, uYawe, kusuk yar mpat ûYakup, uza̱ i nəm sang kang i sat yà? Uza̱ makmak ka̱t.>>

3 UYawe re iya̱m va̱ uza̱ yar pa̱ ô nəm.

UYawe là pa̱, <<I nəm ka̱t.>>

ALár apər

4 UPonzhinan uYawe nyám alár á mi. N ya uPonzhinan uYawe kà̱ mpə̀ng apər. Apər va̱ ta shì ìnang ìwá ga akpán ká̱ nri apambin kpa. 5 Te n là pa̱, <<ÁPonzhinan, uYawe, wa ma̱n te wa re nnap va̱ ta, uYakup i nəm sang kang i sat yà? Uza̱ makmak ka̱t.>>

6 Te uYawe re iya̱m va̱ uza̱ yar pa̱ ô nəm, <<Iva̱ ta̱ i nəm ka̱t na kpa>> uPonzhinan , uYawe à là.

ALár iya̱m iga mmàl iya̱m

7 Uza̱ nyám alár á mi. N ya uPonzhinan sat ka̱ izər akamsəlang va mmá me ká̱ iya̱m iga mmàl nsat nzwàng nzhi. Uza̱ kpán iya̱m iga mmàl nzhi ka̱ awo. 8 UYawe ɓəp mi pa̱, <<ÁAmot, iza̱ u ya yà?>>

Te n là pa̱ <<Iya̱m iga mmàl nsat nzwàng nzhi.>>

Te uPonzhinan là pa̱,

<<Mmami kà̱ nnak iya̱m iga màl nsat nzwàng nzhi,

ka̱ ishimshe onəm mi oIsa̱rila.

Mi watar ka̱ ashe oza̱.

9 Atak awop akum ìjili àIshaku ká̱ aɓam i shin,

kang atak awop ayə́ryər oga aIsa̱rila i ra agúng,

mi ru akum ìjili àYerobwam ká̱ ndokchi.>>

UAmot ká̱ uAmaziya

10 Te uAmaziya unəm uga mpyal awop ka̱ aBetel re ǹre ûYerobwam uponzhi uga aIsa̱rila pa̱, <<UAmot uwa suk iya̱m ro ka̱ ashe onəm oga aIsa̱rila. Mbin ka̱m nnap va̱ ta̱ ka̱t. 11 UAmot là pa̱,

<<Mí ga ngba̱l uYerobwam ka̱ atak ìkum,

te mí wur oga aIsa̱rila i re mbin oza̱ i ga izwal. I mai ka̱t oza̱ i ga izwal.>>

12 Te uAmaziya là ûAmot pa̱, <<Re atak va̱ ta̱ ánəm uga iva̱k, le ga mbin oga aYahudi, là ìchu Inan ɓu va̱ ka̱ ta kang ɓu ri ká̱. 13 Kang wa ɗak yi ka̱ ta̱ ka̱ aBetel ká̱ nlà ìchu Inan ɓu va̱ ta ka̱t. Atak a va̱ ta̱ atak awop áponzhi, kang nnà atak awop achumchum.>>

14 Te uAmot ná ama̱n ûAmaziya pa̱, <<Mmami unəm uga nlà ìchu Inan ka̱t, kang mmami uya ànəm uga nlà ìchu Inan ka̱t kpa. Mmami unəm uga nkpak iya̱m nkang ká̱ nnak ishi ká̱ oga ipipyan. 15 Te uYawe kap mi ká̱ nkpak iya̱m nkang,>> uYawe là á mi pa̱, <<Ga là ìchu Inan ónəm mi oIsa̱rila.>> 16 Ǹyangmata̱ te, gwong achwang kà̱ nnap-nlà àYawe. U là pa̱,

<<Kang ń là ìchu Inan ka̱ apal ishi oIsa̱rila ka̱t,

kang ń là nnap-nlà ka̱ apal ishi nzhi àIshaku ka̱t.>>

17 Ka̱kul nva̱ ta te, uYawe là pa̱,

<<UChar ɓu i nyáng uga nnəm mmai ka̱ ashe ìtong.

Ovan ɓu onunggwan ká̱ ovan ochar mí gbá̱ng ká̱ ndokchi.

Mí màl mbin ɓu ká̱ asang aga mmàl atak mí kap,

mmaɓu ká̱ ishi ɓu te ɓu kú ka̱ ashe mbin nvyapvyap.

Mí wur oga aIsa̱rila i re mbin oza̱ i ga izwal

i mai ka̱t oza̱ i ga izwal.>>