1 Álak ká̱ wo chit, mmawó va̱ o təm pa̱ shat ka̱ aSiyona á.

Ká̱ mmawó va̱ o rəng pa̱ o təm chit ká̱ ikángkáng ka̱ aɓam aSamariya.

Mmawo onəm oga ala̱ka̱n va mmá nyi wo nyi kà̱ mbin nchumchum,

ka̱ atak áda oIsa̱rila ga yà?

2 O ga aKalne na o dər,

o ga aHamat,

o watar o ga aGat ajo oFilisti,

o dər mbin oza̱ rup kam ji aIsa̱rila ji ɗò?

3 Mmawo kà̱ nnyám pa̱ ìlum ìɓá̱ngɓa̱ng va̱ ta ì ya nggbəgbà̱ng ka̱ cho,

kang iya̱m va̱ mmawó kà̱ nnənəm te kà̱ ndap ìtok iponzhi iga idumdùm va̱ ta dat ká̱ wo.

4 Mmawo va kà̱ nra ka̱ apal

alyer aga inyin nlàlap,

kang o dal izər ka̱ apal ìtok ngbat wo,

o ri izhé itam iyákyàk ka̱ ashe iya̱m nkang,

ká̱ ina imwalmwal ka̱ ashe nggatək ina.

5 O mar oga nnap-nshì va̱ yà ká̱ ìpir ka̱t ká̱ aɓwa,

kang o mar aghan oga iya̱m ǹza̱m wa nva̱ uDawuda nəm.Iya̱m ǹza̱m

6 O wá ndəng ìba̱ngba̱ng ǹsámsàm ká̱ ìnang ìkpáng.

O ɓəl mmì nnəna̱n.

Kang o yə́ng ká̱ nvyap ovan aYusufu ka̱t.

7 Ka̱kul nva̱ ta te, mmawó na oga nggəshi va̱ o ga izwal.

Ndal izər wo ká̱ nri izhé wo i ga nkùr.

8 UPonzhinan uYawe sóng anung ka̱ ishi wò, uYawe, Inan iga nggatək là pa̱,

<<N jan ǹrup ishi áYakup, n yang akamsəlankamsəlang.

Mi ga nná mbin oza̱ ká̱ iya̱m va̱ ka̱ ashishe.>>

9 A yà pa̱ onəm pa̱ ogba̱pchi à re ka̱ ashe nzhi pa̱ nzəng te oza̱ i kú. 10 Kà̱ nva̱ngva̱ onal onəm va̱ kú ɓa táng ashe nzhi pa̱ na o fa ká̱ akúm o shì, te uro i wór awór pa̱, <<Unəm uro uwa yà ka̱ ashe nzhi va̱ ta̱ ɗak ɓo?>> Te mí ma̱n pa̱ <<Pa ka̱t.>> Te uza̱ i là pa̱, <<Gbat, kang mmá wór aɗin áYawe.>>

11 Ka̱kul uYawe à là,

nzhi nchumchum mí chwan pa̱ rukutrukut,

nzhi mɓwakan mí shin.

12 Mí kwak ipəri kwak ka̱ apal ipáng ɗò?

Mí shàng ipáng shàng ká̱ ina ɗò?

Káp ká̱ nnà te o nak nnandər sat akàl,

kang nnap nnəm nnəna̱n sat ìɗángɗáng. Ngshàng ìram ina

13 Mmawo va̱ o lan ká̱ igwan wo ka̱ apal aLodeba o là pa̱,

<<Ká̱ nkàm yi kang í ri aKarnayim ka̱t ɗò?>>

14 <<Ónəm oga aIsa̱rila, mmami kà̱ ngga mɓa ká̱ onəm ìkum wo,

va i ga nnyán ká̱ wo i ɓàn ka̱ aHamat

ka̱ asa̱l mpal i ga i chu aba̱nda̱m Ìwá Mman.>>

UYawe, Inan iga nggatək à là.