1 O gwong achwang na o fe nva̱ ta̱ óchar oga Samariya.

Mmawo va wa ina imwalmwal iga aBashan va ka̱ aɓam aSamariya.

Ó nyán ká̱ onəm oga nlàng kang o kà̱r onəm oga nkun,

o là ónəm oga nzhi wo pa̱ <<Ɓa ká̱ iya̱m iwàwà á yi.>>

2 UPonzhinan uYawe sóng anung chit ká̱ ishi wò, uza̱ là pa̱,

<<Nra nna kà̱ mɓa ka̱ apal wo

nva mí wur wo ká̱ aKugaya,

wa ìgwali va mmá kpán ká̱ aKugaya.

3 Mí wur wo mi fa ká̱

ka̱ atak va akamsəlang kàkchi kà̱,

mí swang wo te, udanggo i ru asa̱l mbin aHamon.>>

UYawe à là.

4 <<O ga aBetel kang ô fa iya̱mkak ,

o ga aGilgal na o ga mpyal ká̱ nnəm inga.

O ná iya̱m ipápà wo nza̱ ipin nggo,

ká̱ iya̱m pa̱ izəng ka̱ ashe agba̱pchi nza̱ nra pa̱ nshatɗing nggo.

5 O ná nzənkəng ngga anyer ka̱kul nná aɗəngchi

ká̱ iya̱m inana wo iga nɗom ìgwak.

O ghok ka̱kul apir iya̱m

va ta̱ o fe nchang nnənəm, óIsa̱rila.>>

UPonzhinan uYawe à là.

6 <<M ɓa ká̱ ayang kà̱ ìtong wo,

o lang iya̱m-nrì kà̱ oga mbin wo,

káp ká̱ nnà te, o ga̱ɓa̱n o ɓa atak mi ka̱t.>>

UYawe à là.

7 Kà̱ɗi te, n dàng wo ká̱ ìva̱r

ya nna ɓur apye pa̱ shatɗing kang mí ɓən iya̱m.

N nak mmá pəng ìva̱r kà̱ mbin nro,

kà̱ mbin nro nnyi te n dàng ìva̱r.

Ìram iro ká̱ azham

ìram iro te azham ya kà̱ ka̱t, a wom.

8 Iìtong pa̱ iparəm ka̱t te pa̱ ishatɗing i pin kà̱ nram ndəng ngwa,

kà̱ mbín va kà̱ ngba̱k oza̱,

ka̱ ta te oza̱ ya ndəng kúr oza̱ ka̱t.

Káp ká̱ nnà te, o le atak mi ka̱t,

uYawe à là.

9 <<N lə̀p iya̱m nsuk wo ká̱ arwa ká̱ atak sur,

Mbankum ri oga ìram ìkáka wo ká̱ iga iɓá̱ngɓa̱ng,

ká̱ iga ikún mpyet wo ká̱ iga ikún ìpipyan,

káp ká̱ nnà te, o le atak mi ka̱t,>>

uYawe à là.

10 <<N re ǹre a wo ká̱ nɗaktak

wa nva̱ ka̱ n nəm ká̱ aMasar,

n gbá̱ng ovan nza̱m wo ká̱ ndokchi, nzəng ká̱ ipəri wo va mmá vyat.

N nak nnəng oga akúm va̱ ta táng a wo ka̱ alúr.

Káp ká̱ nnà te, o le atak mi ka̱t,>>

uYawe à là.

11 <<N zhì mbín wo

wa nva̱ Inan ka̱ zhì aSodom ká̱ aGomora,

o tong wa akún va mmá tur ka̱ anung apər á.

Káp ká̱ nnà te, o le atak mi ka̱t,>>

uYawe à là.

12 <<Ka̱kul nva̱ ta te, iya̱m va ta̱ mi ga nnənəm a wo, óIsa̱rila.

Ka̱kul mi ga nnəm iya̱m ata̱ a wo te,

o gbar izər o gwan Inan wo, óIsa̱rila.>>

13 Dər, uza̱ uwa ta̱,

uwa nəm aɓam kang à fa ká̱ ayə́r,

uwa kà̱ nnyám iya̱m va̱ uza̱ rəng ka̱ ashe ìgwak wò ûnəmləbər,

uwa fa ká̱ atak atántàn aga anung ipin ka̱ ashe ìzwam,

uza̱ nak oga aɓam aruprup ka̱ avəng ashar wò.

Aɗiɗin pa̱ uYawe, Inan iga nggatək.