1 UPonzhinan uYawe nyám alár á mi. N ya awar ìpipyan ìyályál ka̱ ashe nkatəp. 2 UYawe ɓəp pa̱, <<Iza̱ u ya yà áAmot?>>

Te n ma̱n pa̱, <<Nkatəp yə́l ká̱ awar ìpipyan ìyályál.>>

Te uYawe là á mi pa̱,

<<Onəm mi oIsa̱rila yál chit,

mi watar ka̱ ashe oza̱.>>

3 <<Oga nnap-nshì va̱ mí shì kà̱ nzhi iponzhi te, i wal ìpyang ikú ká̱ nda va̱ ta,>>

uPonzhinan uYawe à là.

Akúm ka̱ atak pa̱ kpaa,

mí swang ǹdúndùn.

4 O fe, mmawó va̱ o tòng onəm oga nlang

kang o nak onəm oga nkun pa̱ iya̱m ro ka̱ ashe mbin ka̱t.

5 O là pa̱,

<<Azəmwo nra ngga Nfa Apye apipye i watar

na í ya asa̱l ǹyáp ká̱ ìpirkur yi,

kang azəmwo Ìlum iga Njul i kùr

na í yáp ká̱ iya̱m mma yi yà?

Í tək ikpáng iga mma iya̱m kang í ran asikel,

í ma iya̱m ónəm ká̱ ka̱ apal mbwai mmakmak.

6 Í yáp ká̱ ikur va mmá lyang ká̱ adùng.

Í yáp unəm uga nkun ká̱ aazurfa.

Í yáp unəm uga nlàng ka̱ anung mbwai akwàp.>>

7 UYawe, Inan ovan oga aIsa̱rila sóng anung chit ka̱ apal ǹrup ká̱ ishi áYakup pa̱, <<Mi yà ká̱ nka̱ng ká̱ inga va̱ oza̱ nəm ka̱t.

8 Ka̱kul nva̱ ta te mbin i tán,

kang nkpaktak onəm oga ashishe i təm ká̱ aɗor ka̱t ɗò?

Mbin i wong wa ndəng awang aNilu,

i wong kang i fər wa aNilu aga aMasar.>>

9 UPonzhinan uYawe là pa̱, kà̱ ilum va̱ ta te,

<<Mi nak alum ka̱ apal ndəng i tar,

kang mbin i kpà̱r ká̱ alum.

10 Mi ga̱ɓa̱n nchang izər wo i yà ntəm aɗor,

kang nkpaktak nnap-nshì wo i nyáng ìpyang iga aɗor.

Mi nak o mwak ìlukwan iga ǹyə́ng ikú,

kang o kà̱p ishi.

Mi nak o yə́ng wa ánəm va uyiyen pa̱ uzəng kang à kú.

Ìlum va̱ ta nkukur i ɗul byet.>>

11 <<Fye, nra nna kà̱ mɓa.>> UPonzhinan uYawe là pa̱,

<<Mi ga re ǹre ká̱ ayáng kà̱ mbin.

Ayáng i ji oza̱ aga iya̱m-nrì ka̱t,

ndəng i gba̱l oza̱ ngga ndəng ngwà ka̱t kpa.

Ayáng ká̱ ndəng ngbà̱l

ka̱kul nɗom nfe nnap nla mi, uYawe.

12 Oza̱ i pin kà̱ ìwá ìva̱ ta̱ i ga ìva̱ cho,

oza̱ i ga mpal i ga asa̱l awu alum.

Ka̱kul oza̱ i ram pa̱ na o fe nnap-nlà àYawe,

kang oza̱ i ya ka̱t.

13 <<Ka̱ ashe nra va̱ ta ovan ochar ogəkgək oɓyenɓyen ká̱ ovan nza̱m okankam i tàk ká̱ ndəng ngbà̱l.>>

14 Oza̱ va̱ i sóng anung ká̱ mpat oga aSamariya,

oza̱ i là pa̱, <<Nnandər, wa nva inan ɓu ì ya yà, áDan>>

ka̱t te <<Á yà wa nji ɓu lap ka̱t á ìchər oga aBəyersheba>>

oza̱ i tàk, i yà ká̱

ngwong lap ka̱t mbyet mbyet.