Oséias 2

1 Wor ogənnang wo onunggwan pa̱, <<Onəm mi.>> Kang ogənnang wo ovan ochar pa̱, <<UYaɗor.>>

NNyám ntàn ká̱ nka̱mshi aIsa̱rila

2 O ra̱n ká̱ unang wo, o ra̱n ká̱ na

ka̱kul uza̱ uchar mi lap ka̱t,

kang mmami uɓəɓar lap ka̱t kpa.

Re uza̱ á tur ndər atak aga mmai ka̱ asa̱l awu wò,

kang ì kap ká̱ onəm oga nfəkchi mbibyal.

3 A yà pa ka̱t te, mi zəp na mi re ugunggur

kang mi re na umaləng wa nva mmá mar na.

Mi nak na uza̱ i kú ká̱ ndəng ngbà̱l,

wa ánəm va ka̱ ashe anyin,

kang mi ga̱ɓa̱n na i yà wa ǹzam nkpələng.

4 Mi nəm aɗor ovəvan ka̱t,

ka̱kul oza̱ ovan ova mmá mar ka̱ ashe mmai.

5 Ka̱kul unang oza̱ nəm mmai chit.

Uza̱ va̱ yar anyám oza̱ te á yà ká̱ ìwuswa ka̱t.

Ka̱kul uza̱ là pa̱, <<Mi yar nva̱ng ama̱nma̱n mi ovəngva̱ kà̱

nná iya̱m-nrì á mi ká̱ ndəng, ká̱ awulu ká̱ ìlukwan alinin,

ká̱ mmì ká̱ iya̱m ngwà.>>

6 Ka̱kul nva̱ ta te, mi ga nká asəsa̱l ká̱ izú, kang mi gún na ká̱ akamsəlang

uza̱ i ya asa̱l nfa ka̱t.

7 Uza̱ i wà nva̱ng oma̱nma̱n wò,

kang uza̱ i kpán oza̱ ka̱t.

Uza̱ i mwo oza̱, uza̱ i ya oza̱ ka̱t. Te uza̱ i là pa̱,

<<Mi le atak á ɓar mi ugəshi

ka̱kul á kàpkàp ntəm mmatmat á mi,

ká̱ ǹyangmata̱.>>

8 Te uza̱ nyi pa̱ mmami na kà̱ nná ìpirkur

ká̱ ndəng ìba̱ngba̱ng ǹsámsàm ká̱ mmì mpipye á na ka̱t.

Kang n tá aazurfa ká̱ azənariya á na

avəngva̱ oza̱ i nəm aBaal ká̱ ka̱t.

9 Ka̱kul nva̱ ta te, mi le mi yar ìpirkur

ká̱ ndəng ìba̱ngba̱ng mi ka̱ awalangwalang.

Te mi yar awulu ká̱ ìlukwan alinin,

va̱ pa̱ ká̱ ń gún imaləng á na ká̱ a.

10 Ǹyangmata̱ te, mi bol imaləngmaləng kà̱ ìwu oma̱nma̱nma̱nma̱n,

kang unəm uro yà i fa ká̱ na ka̱ awo mi ka̱t.

11 Mi nak nkpaktak nnəm nchang izər áIsa̱rila i kùr,

nchang izəzər ngga nfa apye apipye, ká̱ ìlum njul,

ká̱ nkpaktak oga nra nnaknak.

12 Mi lak ìba̱ngba̱ngba̱ngba̱ng ká̱ oga ikun ìpipyanpipyan

ivəngva uza̱ kà̱ nlà pa̱ oma ta amwa wò

va̱ oma̱nma̱n wò na wò.

Mi nak i təm ikun ikpá̱rkpà̱r,

izhé iga anyin i ri oza̱ pa̱ kpaktak.

13 Mi pyát á na ka̱kul oga nra ngga nnəm mɓut ngga nnəm nchang izər ìchər aBaal va̱ ta.

Ka̱ ashe oga nra va̱ ta te, uza̱ i shì oza̱,

uza̱ i mwak iya̱m ìsham, uza̱ i fa i yar nva̱ng oma̱nma̱n wò ká̱.

Mmami te uza̱ ka̱ng ká̱ mi. UYawe à là.

14 Ka̱kul nva̱ ta te, mi ga ntàng na mi ga ká̱ na ka̱ ashe ǹzam nkpələng.

Mi là nnàp á na ka̱ ashe nrwa ìgwak.

15 Ka̱ cho te, mi le ká̱ ìram ìba̱ngba̱ngba̱ngba̱ng á na,

mi nak mba̱nda̱m ndaktak i sat anung asa̱l aga nnak ìgwak.

Ka̱ cho nà uza̱ i ná ishi wò á mi wa nva̱ uza̱ ka̱ nəm ka̱ ashe nza̱m wò,

nnà ka̱ ashe nra va̱ uza̱ fa ka̱ ashe mbin aMasar á.

16 UYawe là pa̱, <<Ka̱ ashe nra va̱ ta te,

ɓu wór mi pa̱ <Áɓar mi,> ɓu yà ká̱ ngwór mi lap

pa̱, <ÁBaal mi> ka̱t.>>

17 Mi zəp oga aɗin aBaal ka̱ anunung,

mí wór oza̱ ká̱ aɗin oza̱ lap ka̱t.

18 Ka̱ ashe nra va̱ ta te, mi yar nsar nnap-nlà óza̱

ká̱ izhé iga anyin, ká̱ inyil,

ká̱ oga iya̱m iga nkpàng kà̱ mbin.

Kang mi chwan ìjang ká̱ ndokchi,

te ìkum i kùr kà̱ mbin,

te mi nak oza̱ i təm ká̱ ikángkáng.

19 Mi ka̱m ɓu, ɓu yà uchar mi mbyet mbyet,

mi ka̱m ɓu, ɓu yà uchar mi ka̱ ashe inəna̱n ká̱ nnandər,

ka̱ ashe mma̱n ngga nnandər ká̱ aɗor.

20 Mi ka̱m ɓu, ɓu yà uchar mi ka̱ ashe nnandər,

te ɓu nyi mi pa̱ uYawe.

21 UYawe là pa̱, <<Ka̱ ashe nra va̱ ta te,

mi ma̱n ápal aɓuɓur i nak ìva̱r i pəng ka̱ apambin.

22 Apal mbin i ná ìpirkur ká̱ ndəng ìba̱ngba̱ng,

ká̱ mmì, i yà kà̱ mbin aYizərel.

23 Te mi suk na kà̱ mbin va̱ ta ka̱kul ishi mi,

kang mi yà ká̱ aɗor ka̱ apal <AƊorka̱t.>

Mi là ónəm va̱ ka̱ n wór pa̱, <ONəmmika̱t> pa̱, <ONəmmi.>

Te oza̱ i là pa̱, <Mmaɓu Inan yi.> >>