1 <<Ɓa, re í le atak áYawe,

ka̱kul uza̱ kan yi pa̱ nyimənnyimən,

kang uwa i tàn yi.

Uwa nak aɓang á yi,

kang uwa i sar á yi.

2 Kà̱ nva̱ng nra pa̱ mparəm te, uza̱ i fələk yi

ka̱ apal nra ngga nshatɗing te, uza̱ i wong ká̱ yi,

kang í təm kà̱ mpipyal.

3 Re í zhat na í nyi uYawe,

ka̱kul mɓəɓa nnandər wa ntàn atak.

Uza̱ i ɓa atak yi wa ìva̱r,

wa ìva̱r ìga amə́ng va i shim mbin.>>

4 Iza̱ mi nəm ká̱ ɓu yà aEfrayim?

Iza̱ mi nəm ká̱ ɓu yà áYahudi?

Mma̱n nva̱ o ma̱n mi te, wa ìnanəng,

ká̱ ìmimyang ìva i lyangshin pa̱ kəlak.

5 Ka̱kul nva̱ ta te, mi kan wo ka̱ atak onəm oga nlà ìchu Inan,

te mi gbá̱ng wo ka̱ atak nnap-nlà ngga anung mi,

kang akwali wo i watar pa̱ vələm wa aməlam.

6 Ka̱kul n ɗom mma̱n, nná nləfər iya̱m ipápà ka̱t,

kang ǹnyi Inan ji iya̱m inana iga nshì ji.

7 Oza̱ ɓəkchi nsar nnap-nlà wa aAdamu,

kang oza̱ nəm nnandər á mi ka̱t.

8 AGileyat ìtong onəm onga,

awuwo ká̱ nchə̀r onəm va uza̱ gbá̱ng.

9 Wa nva onəm oga ayi ra anyimnyal onəm te,

wa nnà ta idonka̱ng onəm oga mpyal awop.

Oza̱ gbá̱ng onəm ka̱ asa̱l aShekem,

oza̱ i nəm inga iva ɓyen nlà ka̱t.

10 N ya iya̱m iga nnəm ajan

ka̱ ashe nzhi àIsa̱rila.

UEfərayim ná ishi wò kà̱ ngwop ìchər,

uIsa̱rila vyap ishi wò chit.

11 Mmawo kpa áYahudi, n nak ìlum mɓən iya̱m chit ka̱kul ɓu,

nva̱ngva̱ mi le ká̱ onəm mi ka̱ atak izwal.