Nlir aHoziya 8

MMa ra̱n ká̱ oIsa̱rila ka̱kul iya̱m ngwop

1 Ɓur agbəshi na u won onəm ká̱,

okpa ìkum kà̱ nvàng ka̱ apal nzhi àYawe wa nkumà ngga̱p .

Ka̱kul oza̱ fən nsar nnap nla mi,

kang oza̱ fa iya̱mkak ká̱ nnap mpakpak mi.

2 AIsa̱rila yə́ng á mi pa̱,

<<Á Inan, í nyi ɓu nyi.>>

3 uIsa̱rila yang ká̱ iya̱m inəna̱n á nak te,

ukpa ìkum i ɓàk na.

4 Oza̱ kyep oponzhi nzəng ká̱ nram ichən ka̱ atak mi ka̱t,

oza̱ kyep onəm oga mpyal ká̱ ǹnyi mi ka̱t.

Oza̱ la ìchər ká̱ aazurfa ká̱ azənariya,

ka̱kul nva̱ ta te oza̱ i ga nzhì.

5 Ónəm oga aSamariya, n yang ká̱ ìya ìna wo chit.

Mmami ká̱ nlak ìgwak pa̱ makmak ka̱ apal wo.

Te azəmwo ó yà ká̱ mpat ka̱t yà?

6 Ka̱kul ìchər va̱ ta̱ fa ka̱ atak áIsa̱rila,

unəm uga inok awo à nəm, Inan ka̱t.

Iya ìna oga aSamariya va̱ ta,

mí chwan pa̱ nyimənnyimən.

7 Ka̱kul oza̱ suk ayə́r,

kang oza̱ i ɓən ǹvivyil.

Azang ikur mar ishi ka̱t,

ivəngva̱ fa ká̱ ishi te, nəm apir ka̱t,

kang oza̱ a məmar te, oɗyanəm i ri.

8 Mma ma̱ka̱n uIsa̱rila chit,

ǹyangmata̱ oza̱ kà̱ ishimshe oga mbin

wa iya̱m mme iswangswang,

9 ka̱kul oza̱ ɓa ga aAshur chit,

wa ìɗongya ìva ká̱ nkùkwa,

uEfərayim ná ishi wò oga mbin ka̱kul nram nka̱mshi.

10 Káp ka̱ nva̱ oza̱ yáp ká̱ ishi oza̱ ka̱ ashe oga mbin te,

ǹyangmata̱ mi ga mɓut oza̱ ka̱kul akwali.

Mɓək anung oza̱ i yen ká̱ ìyə̀l oza̱

ka̱ avəng áponzhi uchumchum uga aAshur.

11 Nva̱ uEfərayim nak atak nshì iya̱m awop yə́l te,

oga atak va̱ ta ga̱ɓa̱n yà atak nnəm nnap mɓá̱ngɓa̱ng.

12 N lir nnap mpakpak mi óza̱ pa̱ nkyak,

te oza̱ yar pa̱ nnap nro nggafak.

13 Oza̱ ná nləfər iya̱m ipápà á mi ka̱kul nrì izhìzhe,

uYawe fe nchang oza̱ ka̱t.

Ǹyangmata̱ uza̱ i rəng nnap mɓá̱ngɓa̱ng oza̱,

kang i nyám ntàn óza̱ ka̱kukul,

oza̱ i le aMasar.

14 uIsa̱rila ka̱ng ká̱ unəm uga nnəm wò chit,

kang à me oga n̂zhi nchumchum.

UYahudi te, á me ìtong iga akamsəlang yə́l.

Te mi re ǹre ká̱ apər ka̱ apal ìtong oza̱,

i zhì oga akamsəlang oza̱ kpa.