Nlir aHoziya 5

AKwali ka̱ apal oIsa̱rila.

1 O fe nva̱ ta̱ ónəm oga mpyal awop,

o gwong achwang á nzhi àIsa̱rila, ká̱ nzhi iponzhi .

Akwali nna yà ka̱ apal wo,

ka̱kul o təm ajəp chit ka̱ aMizpa,

o tong wa ìcha ìva mmá rwak ka̱ apal aɓam aTabor.

2 O fa iya̱mkak , kang o gbà̱ng chit ka̱ ashe ngbá̱ng onəm,

mi ga nnyám ntàn nkpaktak wo.

3 N nyi uEfərayim nyi, kang uIsa̱rila bwam á mi ka̱t,

ǹyangmata̱, aEfrayim, u mai byet,

uIsa̱rila vyap chit.

4 Nnap nnəm oza̱ re oza̱ pa̱ oza̱ a le atak Inan oza̱ ka̱t,

ka̱kul aruhu mmai nna yà ka̱ ashe oza̱,

oza̱ nyi uYawe oza̱ ka̱t.

5 Ǹrup ká̱ ishi oIsa̱rila kà̱ nnyám nnàp ka̱ apal ishi oza̱,

uIsa̱rila ká̱ uEfərayim lə̀p ìfang ka̱kul mpat oza̱,

kang uYahudi kpa, i ru nzəng ká̱ oza̱.

6 Oza̱ i ga ká̱ iya̱m nkang ká̱ ina na ó mwo uYawe,

ká̱ nnà te, oza̱ i ya na ka̱t.

Ka̱kul uza̱ kap ká̱ oza̱ chit.

7 Oza̱ nəm nnandər ûYawe ka̱t,

oza̱ mar ovan mmai.

Ǹyangmata̱, ngwop apye apipye oza̱, i zhì oza̱ ká̱ ìram oza̱.

IKùm kà̱ ishimshe oIsa̱rila ká̱ oYahudi

8 O ɓur agbəshi ka̱ ashe aGibiyà, o ɓur nggapak ka̱ ashe aRama,

o wór awór ìkum ka̱ ashe aBet Ava̱n

ləp mpyal aBenjamin.

9 UEfərayim i təm agún kà̱ ìlum ìga nnyám ntàn.

N shet ká̱ iya̱m va̱ inandər ka̱ ashe akum ìjili àIsa̱rila.

10 Onəm oga mpyal oYahudi təm wa onəm oga ǹsəng aswari mbin.

Mi zuk mmən ìkum mi ka̱ apal oza̱ wa ndəng nnángnáng.

11 Mmá kà̱r uEfərayim, akwali dungshi na chit.

Ka̱kul uza̱ nak ìgwak kəkam kà̱ ngwop ìchər.

12 Ka̱kul nva̱ ta te, n təm wa ìgəmək ûEfərayim,

wa iya̱m imwanmwan n̂zhi aYahudi.

13 Kà̱ nva̱ngva̱ uEfərayim ya arwa wò,

kang uYahudi ya aɓang wò te,

uEfərayim ga aAshur kang a re ǹre ka̱ atak aponzhi uchumchum oga aAshur,

ká̱ nnà te, uza̱ i yà ká̱ mbyáp kang i tàn aɓəɓang ka̱t.

14 Ka̱kul mmami wa ìlir ka̱ atak aEfrayim,

kang wa ìyen nza̱m ìlir kà̱ nzhi àYahudi.

Mmami na ká̱ ishi mi, mi kan oza̱ te mi ga,

Mi yar oza̱ mi fa ká̱, unəm uro yà i vyat oza̱ ka̱t.

15 Mi le mi ga atak mi,

ya oza̱ i ma̱n ká̱ mpat oza̱ kang.

Te oza̱ i ram mi ka̱ ashe mɓək anung,

oza̱ i mwo mi ká̱ mɓa̱ng ìwu.