1 Askái Abrão, 99 varinamãsho, Yavepa meramatachiósho aská akĩ tanamakĩ. "Earo Yové Weeya Ivo.* Ẽ vana anõ ashõ, chinã mekiyai nitso. 2 Neská tanáti tavámakĩnanãimai nõ shokonõ. Mĩ revomaa yorarasĩ westíma ẽ mia ashõkatsa", akĩ.

3 Anosho, Abrão maĩ vetsek ipámaĩnõ, Yové Koĩ askái vanai. 4 "Neská tanáti tavámakĩnanãimai nõ shokonõ. Minõsho yora shoko wetsa, yora shoko wetsa, yora shoko wetsa aká ipákatsavo. 5 Mĩ ane askásevi ikatsai, ‘Abrão’ ivo eneki, ‘Abraão’ ikatsai mĩ anõ kenáa.* Awesáma, yora shoko wetsarasĩni papa mia ẽ shovimai iinã mia ẽ aká. 6 Minõsho yora ãtsai, kakáyarasĩ shovii akatsai. Mĩ revomarasĩro yora shoko wetsa ikatsai. 7 Askatase naa tanáti tavámakĩnanãimai nõ shokonõ, mia, mĩ revomarasĩ akánĩ. Neská ivo vana mato ẽ ashõa. Ea Yové mináse, mĩ revomarasĩnáse aká ikatsai. 8 Askávaíse rama mĩ anõ niá mai, Canaã, miapámavorasĩ nakosho mĩ niá ivo mairo mia, mĩ revomaa yorarasĩ aká mato ẽ inãkatsa. Atonase ikatsai, askámaĩnõ, earo atõ Yové ikatsaivere.

9 Askámaĩnõ miaro neskátso. Naaivo tanátinĩ ikí nitso, mĩ revomarasĩnĩsho. 10 Aaivokiri chinãsho, neská atsoma, mia, mĩ revomarasĩ aká. Mato venerasĩ katsése mã ina repã retás itivere. 11 Anõsho aaivo tanáti nõ chinãnanãkatsa. 12 Nenosho ori mã revovaĩarasĩro matõ vake venevakerasĩ pakémaĩnõ, 8 shavánamã retás atsoma. Yora wetsa kopímashõ viyãtáyavo,* matopáma yorarasĩ aká, askásevi aotsoma. 13 Yora westíchta tõo akĩma, katsése retás itsoma. Matõ kayã neea ivoro anõsho tanáti nõ chinãti. 14 Yora wetsa retás ikíma ivoro mato nakosho shaváyatĩpá, kayãkõtsoma. Awesáma, aaivo tanáti ãwẽ anõ eseimasho ã ikí", akĩ.

15 Askái anosho Yové Koĩni Abraão tanamaóki. "Rama nenosho mĩ aĩ ‘Sarai’, ikaikainamẽkĩ, eneki anõ kenaóroa. Rama anekiro ‘Sara’, atso. 16 Eã roapa ivo ẽ ashõkatsa, askávaíse aa mĩ aĩmẽsho venevake mia ẽ inãkatsa. Mia parãma, roapa ivo ẽ ashõkatsa. Aamẽsho, yora shoko wetsa, kakáya mestẽka aká shoviókatsavo", akĩ.

17 Abraão anosho maĩ vetsek ipásho arí chinã oke chinãsho osãki. "Yora vari 100 ayanamãshonã, vakenã meratirá? Saranã ãwẽ vari 90 aya tsaóshonã ãwẽ vakeyatirá", ikĩ chinãki. 18 Anosho Yové Koĩ aská akĩ vana akĩ. "Ase, Ismael ivõ mia ẽ inãkatsiki ivo ave ivokénõ", akĩ.

19 Ãwẽ askámaĩnõ, "askáma, mĩ aĩ Saramẽsho, vake merasho ãwẽ pakémaĩnõ Isaque akĩ mĩ anekatsa. Aaivo tanáti tavámakĩnanãimai avé nõ shokokatsa, aa, ãwẽ revomarasĩ akánĩ. 20 Askámaĩnõ, Ismaelro, roapa ivo ẽ ashõókatsa, ea mĩ yokáa keská akĩ. Aamẽsho, ãwẽ revomaa westíma ikatsai, yora shoko wetsa shoviókatsa aká. Askávaíse ãwẽ vakerasĩro 12 kakáyavo ikatsai. 21 Askámaĩnõ aaivo tanátiro ea Ismael ashõma ikatsai, Isaque ivorvi ẽ ashõkatsa. Aaro Saramẽsho waa vari oáyatõ oshe neskásevimaĩnõ pakékatsa", akĩ. 22 Askái Yové Koĩ Abraãonĩ vanai mashtékaĩvaí, weníkaĩi.

23 Anosho Abraãone aaivo shavapase Yové Koĩni yonoatõ ashõki, ãwẽ vake Ismael retás avaikĩ, venerasĩ katsése, avé shaváyaivorasĩ, ãwẽ kopímashõ viá ivorasĩ aká ato keyoki retás apáki. 24 Askái aatiã Abraão, 99 varinamãsho arí retás iti. 25 Ãwẽ vake Ismael ivoro 13 vari aya. 26 Aaivo shavapa, ãwẽ vakenĩ retás ikí. 27 Askái tsasiyarasĩ, vakerasĩ, ãwẽ shavánamãsho pakéya ivorasĩ, ãwẽ kopímashõ viá ivorasĩ aká ashkã Abraãonĩ retás itivo.