Gênesis 20

Abraãone Gerar maĩ kakáya parãti ivo yoã

1 Askái Abraão Manrenamãsho Canaã mai naki Neguebenamã kaí, shavá wetsa Cadesnĩ Sur rakáa tõovakĩ nii kaí. Ano nii aatishõkamase Gerar mainamã nioi kaí. 2 Ano nishõ ãwẽ aĩ Sara yoãki "ẽ aweshavo", ato amíska, askásho Abimelequẽ Gerar mainamã kakáyatõ, ato yonoki. "Sara neno ewevarãna, eã oĩnõ", ato akĩ.

3 Aská anosho Abimelequẽ oshapakéki namáki ãwẽ oĩa, Yové Koĩni tachikarãsho, "aĩvo veneyamẽkĩ mĩ ewetana. Ramaro mia yamakatsa", akĩ yoãshokĩ.

4 Ãwẽ askámaĩnõ Abimeleque avé meenanãmasho vanainái. "Yora Ivó, eamarívi, ashkã akĩse noke mĩ keyokatsa? 5 Ã vene ‘Sara ẽ aweshavo’, ikí vanai, ã aĩ askásevi vanaói avai. Ichná akĩ chinãki ẽ akámarívi", akĩ revíki.

6 Ãwẽ askámaĩnõ, "aská akĩ mĩ chinã ẽ tanasai, ẽ vana mĩ tavámamísi iinã eãvisi mia ea meemáma. 7 Ramaro aĩvo ãwẽ vene arimẽse yonosho. Mia vopimísi iinã ãatõ ea tanamashõkatsa, aaro ẽ vana teki akaya yora. Ãwẽ aĩ mĩ yonoshoama ivoro aská, mĩ wetsamavorasĩnĩ mia vopikatsa", akĩ Yové Koĩni.

8 Aská namátani vesosho, Abimelequẽ shavá nakoki ãwẽ yora eséyavorasĩ kãtxivarãsho ãwẽ namátana ivo ato ãwẽ yoãshoatõsho rakéi kavima ikívo. 9 Aská anosho Abimeleque, Abraão kenavaí avé vanai. "Awesainã ea mĩ aská avaira? Awesa ivo itimatõ mia ẽ ishõatõsho, ẽ shokõkenavonĩ ashõ ea mĩ ichná akára? Askátimatõ ea mĩ aka", akĩ. 10 Anosho nĩkãnióki, "Awesakĩ chinãinã ea mĩ aská avaira", akĩ?

11 Ãwẽ aská akatõsho, "erí chinãki, ‘neno shokoyavõ Yové Koĩmẽ eséyama shokosho ẽ aĩmẽsho ea yamamísivo’, iinã ẽ ivairívi. 12 Askámaĩnõ Sararo ẽ papakiri chinãsho ẽ evé meráshavo, askámẽkĩ nokẽ ewaro wetsavakĩakiri chinãsho ẽ ninivarãmtá. 13 Yové Koĩni ẽ papã shavapashõ ea yonokõmaĩnõ, Sara ẽ tanamavai. ‘Noípakĩ ea vesosho neská akĩ ea yoãtso shavátii iakekaĩki. "Ẽ aweshavo", ea atso’, iinã ẽ yoãshovai", akĩ.

14 Ãwẽ aská nĩkãvaíki, Abimelequẽ arimẽse Abraão ã aĩ eneshokĩ. Askávaíki ãwẽ txivorasĩ, txashorasĩ, ãwẽ mee imaa venerasĩ, aĩvorasĩ aká õsiki ravé inãki. 15 Aská avaikĩ Abraão tanamaóki. "Ea mai ayavere. Atonamã mĩ nikatsai mirí oĩtso", akĩ. 16 Askávaíki Sara askásevi aoki, "mĩ take, 1000 kopímati shasho prata ẽ inãai, anõsho mia ẽ ewevaĩtávaikiri chinãsho kopímakĩ. Aská ivo kopímatimẽsho ‘aa ivaimarívirá’, iinã mia ave tananõvo", akĩ.

17 Askávai txipo Abraãone Yové Koĩ ato tanamashõatõsho, Abimeleque roa akĩ. Ã aĩ, mainamã toĩnaa aĩvorasĩ askásevi akĩ ato roa aoki. 18 Awesáma, vevõro Saramẽsho, Yavepa aĩvorasĩ katsése revotĩpa akĩ ato shokõasho ã ikí.