1 Askávai txipo Yové Koĩni Abraão onãtakatsiinã kenaki, "Abraãó", ãwẽ akátõsho, "awerá? Neno ẽ niá", akĩ revíki.

2 Ãwẽ askámaĩnõ, "mĩ vake nané westíchta, mĩ anõ noípa ivo Moriá maikiri ewevaĩta. Ano mia ẽ yoikatsa ivo matopashõ ea maki ashõta", akĩ.

3 Ãwẽ askávaitõsho, shavá oá merasho, anõ maki ati ivo karo tosha toshavaíki jumento papimavaí ãwẽ yonoa yora ravévakĩ, ãwẽ vake Isaque aatii voávo, Yové Koĩni yoivaikirí. 4 Askákaĩi kakĩ, 3 shavánamãsho orasho oĩtakĩ ãwẽ oĩa aaivo mató meraki. 5 Askáki anoshose ãwẽ yonoa yorarasĩ ato tanamakĩ. "Nenoshóse jumentonĩsho ea manátsoma, askámaĩnõ ea, naa verone akáro waa matopashõ Yové Koĩ nõ ravitáinã. Askátaníro nõ iovarãkatsa", ato akĩ. 6 Askáki anõ maki ati karo ãwẽ vake iámai avaí aaro txii, senoti aká toĩnivai voávo.

Askávaĩi atõ voánamãsho, 7 ãwẽ vakẽ, "papá", ãwẽ amaĩnõ, "awerá", akĩ revíki. "Naa txii, karo aya akámẽkĩ nõ maki akatsiki ivo txivõ vakero atorá?" ãwẽ imaĩnõ 8 ãwẽ papã revíki. "Yové Koĩni noke merashokatsai, yomé", akĩ.

9 Askákõvaĩi voí Yové Koĩni ato yoivai ivo mató nokovaĩsho, ãwẽ papã anõ maki ati tapo avaikĩ, matxi karo potanivaíki ãwẽ vake neshavaíki tapo matxi rakãníki. 10 Aská avaikĩ senoti ninivarãvaíki ãwẽ vake ãwẽ yamamakatsímaĩnõ 11 naĩsho Yavepa Yonoa Yovepa kenaníki. "Abraãó! Abraãó!" ãwẽ imaĩnõ, "awerá? Neno ẽ niá", akĩ revíki.

12 "Mĩ vake meskoroa, aská aroa. Ramaro onãtakĩ mia ẽ oĩai, Yové Koĩ rakéshoi mĩ niásho, mĩ vake westíchtamẽkĩ anõsho mia itãma ẽ oĩai", akĩ.

13 Ãwẽ askámaĩnõ anosho oĩtakĩ ãwẽ oĩa, txivo vene võko nakosho ãwẽ mãshõne otékésho niá meraki. Askávaíki txivo atxivaíki ãwẽ vakẽ shanẽneshõ maki akĩ. 14 Askáki aaivo mató aneki, "Yavé Yiré" akĩ aneki.* Aská akĩ ãwẽ aneti rama anõ anéi isa, "Aaivo matopashõ nõ anõ mãa Yavepa noke ashõkatsa", imískavo.

15 Askávai naĩsho Yavepa Yonoa Yovepa Abraão kenanióki. 16 "Mĩ vake westíchtamẽsho ea mia akáma oĩinã, tavámatima ivo vana ea ẽ anemẽsho vanai. 17 Mia roapa ivorasĩ ashõkatsa. Mĩ revomaa yorarasĩ ato ẽ ãtsamakatsai, naĩ masoya ichi, waka kayã machi poto akátíi. Atonĩ ranokasmananãyavõ shavá ato viakekatsaivo. 18 Askái mĩ revokaĩamẽsho maitioi shokoa yorarasĩ vana roapa netãnákatsa, ẽ vana ea mĩ anõ akákiri chinãsho", akĩ tanamakĩ.

19 Anosho Abraão arimẽse ãwẽ shokõkenavonamã itãi kaí Bersebanamã shokokei voávo. Askái ano inopai shokovo. 20 Askái nishõ ãwẽ nĩkãa, ãwẽ take Naor, ãwẽ aĩ Milcamẽsho ãwẽ vakeya ikí nĩkãki. 21 Askái ãwẽ vake vevoké ivoro Uz, atxõyaro Buz, wetsaro Quemuel, Arãne papa. 22 Askámaĩnõ txipo meráyavoro Queséde, Hazo, Pildas, Jidlafe, Betuel aatíi. 23 Betuel ivoro Rebeca meraya. Askásho naa 8 vakerasĩro, Naor, Abraãone takẽ Milcamẽsho merati. 24 Askámaĩnõ Naorpa, ãwẽ rakãa aĩvo* Reumámẽsho ãwẽ vake iáaro naatii, Teba, Gaã, Taás, Maaca aatíi.