Gênesis 29

Jacó ãwẽ kokã shavapashõ iti ivo yoã

1 Askávai Jacó iokaĩi kaí, vari oátõ yora shokoanamã nii kaí. 2 Kakĩ ãwẽ oĩa vaná wakapasha shasho anikatõ vetashméya. Askái ano txivo wetsa masoi, wetsa masoi, wetsa masoi, aká, wakapasha akatsiinã. 3 Askái aatiãro, ashkã takévaĩsho shasho sherekésho atõ inárasĩ wakapasha amavaíki arimẽse vetáshpaóvo. 4 Askámaĩnõ Jacopa anosho txivo vesoyavorasĩ ato nĩkãki. "Mã shokonã atonamãrá", iinã ato ãwẽ nĩkãtõsho, "nokero Harãnamã nõ shokoa", akávo.

5 Aská akĩ ato nĩkãóki. "Naorpa vake Labãonã mã oĩyará?" ato ãwẽ akátõsho, "ẽ nõ oĩya", akávo.

6 "Aanã roaise niárá?" akĩ.

"Ẽ niisa, roase. Ãwẽ vake aĩvake Raquel waa oaĩ, ãwẽ inárasĩnĩ", iinã yoivo.

7 Aská akĩ atõ yoimaĩnõ, vanaói. "Ramaro vari keyáse, inárasĩ mã kãtxiketĩpa. Wakapasha ato amavaikíse arimẽse atõ piá wasi shokoanamã ato enetiki mã iki", ato akĩ.

8 Ãwẽ askái vanamaĩnõ revívo, "Askáma, inárasĩpari keyóvarãmaĩnõ wakapasha kepẽvaíki ashkã akĩ ato nõ amakatsa", akávo.

9 Askái atonĩ vanai ãwẽ nimaĩnõ, Raquel ãwẽ papã inárasĩ vesoyasho, kawivarãi tachikarãi. 10 Askámaĩnõ, ãwẽ koka Labãone vake ãwẽ inárasĩ aká meravaíki akĩvísi vaná wakapasha kepẽvaíki ato amapakeshokĩ. 11 Aská avaí Raquel mekí avaí, mekípákai wai ikí 12 vanai. "Ea mĩ papã wetsama, Rebecã toá ea", iinã ãwẽ yoãshoatõsho, nĩkãvai eréi kashõ, ãwẽ papa ãwẽ vana ivo katseki yoãshoi kakĩ.

13 Askámaĩnõ ãwẽ papa, ãwẽ vakẽ yoãki aská aká nĩkãinã oĩnõ iinã kaí. Kakĩ Jacó meratachísho, atxivaĩsho mekí avaikĩ ãwẽ shavapa ewevarãki. Askámaĩnõ anosho ãwẽ ikaikaĩnarasĩ ãwẽ koka katseki yoãshokĩ. 14 Ãwẽ aská nĩkãinã, "anõse, miaro eapá, ẽ imi mia", akĩ Labãone. Askái Jacó, ãwẽ kokã shovõ oshe westíkase tavái nii.

15 Askávai txipo Labãone Jacó tanamakĩ, "mia ẽ wetsamamẽkĩ, kopímáma ea mia mee imatĩpá. Awetishõ mia ẽ kopímatirá?" akĩ nĩkãki.

16 Aská aa yoraro ãwẽ vake aĩvake ravévakĩ aya, vevoke ivõ anero "Lia", txipoke ivoro "Raquel" aká. 17 Askásho Lia ivoro ãwẽ verose roakachta,*29.17 Neno vero yoãnáro Hebraicõ vana tanakamáse. Wetsã chinãro "vero vetika", wetsã chinãro, "verose roaka" aká askámaĩnõ Raquel ivoro yoíkachta, ichnámachta aká. 18 Askáki Raquel ivo noíki, ãwẽ koka aská akĩ. "7 vari mia mee ishõvaíki mĩ vake txipoke ivo ẽ oĩnõ", akĩ.

19 Ãwẽ askámaĩnõ, "roase, mia oĩmanõ, yora wetsaro ea oĩmatĩpá. Evé nitso", akĩ.

20 Askái Jacó ano 7 vari taváki ãwẽ koka mee ishõki. Vari ãtsaka tavái ãwẽ niámẽkĩ inomachta tanáki, Raquel noíi ãwẽ niásho. 21 Askái 7 vari nokómaĩnõ, ãwẽ koka nĩkãki. "Ramaro nõ tanáchna ivo ma vari nokóai. Mĩ vake ea inã, ẽ oĩnõ", iinã 22 ãwẽ yokáatõsho, ãwẽ kokã ato saí imakatsiinã yorarasĩ keyoki kãtxivarãki. 23 Ano yamé ato ãwẽ kãtxivarãnamãsho ãwẽ vake, Lia ivorvi ã eneshoa, avé oshai. 24 (Aatiã Labãone mee ima ivo aĩvo Zilpa ma eneshoáya, ãwẽ vakẽ ave toĩsho mee imanõ iinã.)

25 Askáinã shavá nakoi, vesokaĩki, aamarívi merakõki. Askáki ãwẽ rayóse vatxĩki. "Awesakĩ ea mĩ neská akárkĩ? Raquel ivoka oĩnoshõ iinã ẽ mee ikaikaĩnarvi, awesainã ea mĩ parãrakĩ?" akĩ.

26 Ãwẽ askái vanamaĩnõ revíki. "Neno nokẽ tanátiro ãwẽ txipoke ivopari noke inãsmarvi, ãwẽ vevoké ivopari inãrívi. 27 Ramaro ẽ vake veneyai saí ikí 7 shavápari ave tavákéinã. Askámaĩnõrívi Raquel ivo mia ẽ inãómaĩnõ 7 vari ea mee ishõótso", akĩ.

28 Ãwẽ aská akatõsho, ãwẽ rayóse anõ akĩ manáki, 7 shavákase Lianĩ saí ikĩ. Ãwẽ askámaĩnõ Raquel ivo inãóki. 29 (Aatiã Labãone mee ima ivo aĩvo Bila ma eneshoáya, ãwẽ vakẽ ave toĩsho mee imanõ iinã.) 30 Askáki Raquel ivo roa akĩse tasaóki. Aaivoro ãwẽ anõ noípa, Liaro ãwẽ anõ noíkamáse. Ano askái nishõ 7 vari taváki ãwẽ rayóse mee ishõóti.

31 Askái Yavepa Jacopa Lia roa akamase oĩinã, Lia revomakĩ tsaõki, askámaĩnõ Raquel ivoro revosma. 32 Askáki Lia, vake venevake meravai, "Yavepa ẽ awe onísa ea oĩai askásho rama vakeyashõ ẽ vene enõ noíkatsa", iinã "Rúben", akĩ aneki.*29.32 Hebraicõ vana "Rúben" ikíro "naa vake, oĩ", askávaíse, "Yové Koĩni ẽ onís awearasĩ oĩai", aká 33 Askávai txipo venevake wetsa meraovaíki "Simeão" akĩ aneki.*29.33 Hebraicõ vana "Simeão" ikíro "nĩkãa" keská ivo "Yavepa ea roa akamase nĩkãinã, vake wetsa ea inãóai", ikí. 34 Askávai txipo venevakesevi wetsa meraovaíki, "Levi" akĩ aneki, "vakerasĩ 3 ẽ merashoatõsho ẽ venẽ ea tasakoĩkatsa", ikí vanai.*29.34 Hebraicõ vana "Levi" ikíro "tasaa" keská ivo 35 Askávai txipo venevakesevi meraovaíki "Judá" akĩ aneki.*29.35 Hebraicõ vana "Judá" ikíro "ravia" keská ivo "Ramaro Yavé ẽ ravikatsa", ikí. Askávai txipo revoóma, inopai tsaói.