Gênesis 50

1 Ãwẽ askámaĩnõ José, ãwẽ papa atxivaĩsho, mekí akí, wai ikí. 2 Askávaíki ãwẽ isĩ vesomarasĩ ato tanamakĩ. "Ãwẽ yora shaká inóimai ichnákawãmísi iinã ẽ papa, rayá patósma ivo raõ ea ashõna", iinã ato ãwẽ tanamatõsho aaivõ raõshoávo. 3 Aská akĩ atõ mea, 40 shavá taváki rayá patósma ivo raõ akávo. Aaivo raõ atõ akáro aatii shavá rakáa anõmtsãwa iinã atõ apawavo. Ãwẽ askámaĩnõ Egito yorarasĩ, 70 shavá tavái ronavo.

4 Askái rona tãti avaí José Faraopa shokõkenavonĩ vanai. "Faraó neská akĩ ea mã tanamashõtirá? 5 ‘Ẽ papã ea ãwẽ eneti vevo ea aská avai. "Tavámatima ivõ vanaki neská atso. Erí ẽ kashma ati ivo shasho pepi Canaã mainamã ea atso roa akĩ"’, ãwẽ ivaitxinĩ ẽ papa ano roa anõ iinã ẽ kakatsiki, itãi ea inókarãma ikatsai", akĩ ato yoãshokĩ.

6 Ãwẽ askámaĩnõ, Faraopa "ase, aapari roa atã askáro, vana neskátõ mĩ papã mia avai taíse", akĩ.

7 Ãwẽ aská akatõsho, José, ãwẽ papa roa anõ iinã kaí, Faraopa shokõkenavo, ãwẽ shovo vesoshoaya kakáyarasĩ, Egito maĩ kakáyarasĩ ashkãse aatiinĩ. 8 Askávai Josepa wetsamavorasĩ, ãwẽ takevo, ãwẽ papã wetsamavorasĩ askásevi, atonĩ voávo. Askámaĩnõ, vakerasĩ, txivorasĩ, txashorasĩ aatíiro, Gósennamãse enevaĩvo. 9 Askái atonĩ voayaro, anõ pakaya ivo carrõ voayavorasĩ, cavalõ voayavorasĩ aatíi, yora westíma voávo.

10 Askái anõ piti vero aká shavá Atade, Jordão waka orakama, nokóvaĩsho, isĩinasho wai ikívo. Anosho José 7 shavá tavái wai ikí. 11 Askái Atadenamãsho atõ wai imaĩnõ, cananeu yorarasĩ oĩinã vanavo. "Ii, Egito yorarasĩ ronaaivo, nĩkã", ikívo. Askáinã ano Jordão orakama, shavá aneki "Abel-Mizraim", akĩ anevo.*50.11 Hebraicõ vana "Abel-Mizraim" ikíro "Egito yorarasĩ ronaa mató"

12 Aská akĩ Jacopa vakerasĩni ãwẽ papã tanamavaitõ akávo. 13 Canaã mainamã vivaĩsho, Macpelanamã, Manre orakama, mai pepĩ onevo. Aaivo pepiro, Abraãone Efrom heteu yora, kopímashõ viãkãti ivo, anõ yora vopimaĩnõ oneti mai. 14 José aská akĩ ãwẽ papa roa atãi, ãwẽ takevo, avé votãvaivorasĩ, atonĩ arimẽse Egitokiri iovarãvo.

15 Askávai txipo, atõ papa vopivaitxinĩ Josepa takevo arímamẽ vanavo. "Josepa nõ ayãta ivokiri chinãsho noke kopikatsa taísekĩ", 16 ikĩ chinãki, José vana yonoshoávo. "Mĩ papã mia eneti vevo, 17 ‘José neská atsoma’, iinã noke tanamavai. ‘"Mĩ takevo anõ itimatõ atõ iti ivo, atoki ichná akĩ chinãóroa", atsoma’, noke avai. Ramaro minõ nõ ichná akĩ chinãmtá ivo, nokemẽ ichná akĩ chinãóroa. Nokero mĩ papã Yové mee ishõya ivo yora keská noke", akávo. Aská akĩ atõ vana yonoshoa, nĩkãinã, José wai ikí.

18 Askávai txipo, ãwẽ takevo, chinãvarãsho, aa veyó maĩ paraki veshõ vanavo. "Noke mĩ mee imanõ iinã neno nõ vea", atõ akátõsho, 19 "askáma, rakétsomároa. Eanã Yovévisirora mã oĩinã? 20 Matõvísi ea mã ichnák pakekatsiyãtá. Askámẽkĩ ãatõro roã pakekésho ea nitxĩmtá, yora westíma ato ave vestẽ anõ iinã, naaivo shavapa. 21 Askáinã rakétsomároa, eã, matõ vakerasĩnĩ ashõ mato ẽ vesokatsa", iinã rawe vanã ato ãwẽ akátõsho, matsipakétivo.

José vopiti ivo yoã

22 Askásho txipo José, Egito mainamã ãwẽ papã wetsamavorasĩnĩ nikonkoĩi. Anoshose 110 vari nokoki. 23 Askái ano nishõ, Efraimnẽ vakerasĩ oĩi, ãatõ shokopa vakerasĩ meráya oĩi akĩ. Askámaĩnõ Manassésnĩ vake, Maquir, ãwẽ vake venevakerasĩro, ãwẽna keská akĩ oshkeki ato kanimakĩ.

24 Askávai txipo Josepa vopikatsikawãki, ãwẽ takevo kenasho ato vana akĩ. "Mato ẽ enekatsa, askámẽkĩ Yové Koĩni mato take akí okatsai. ‘Mai mato ẽ inãkatsa’, iinã tavámatima ivo vanã, Abraão, Isaque, Jacó aatii, ato tanamati. Askásho nenosho mato kawivaĩsho aaivo maĩ mato shokõkatsa", ato akĩ. 25 Aská avaikĩ, "ramaro vana tavámatima ivo ea ashõna. Ẽ vopia txipo Yové Koĩni mato take akí omaĩnõ, ẽ shaorasĩ kawivaĩtátsoma", ato akĩ.

26 Askái anosho José 110 varinamãsho, vopimaĩnõ, rayá patósma ivo raõ avaikĩ kavõ ichnáma ivõ nanetivo.