6 Askávai 40 shavá tavákémaĩnõ Noepa rãtxã oro ãwẽ sawẽchna ivo kepẽki. 7 Askávaíki, "mai varíkéai", ravãki, oka ãwẽ yonoa noya noyakawãi matsíkawãsi. 8 Askávaíki txipo noma yonoóki, "waka nashái mai varíkémara oĩóta", iinã. 9 Aská akĩ noma ãwẽ yonoa, anõ tsaópakéti yama oĩketani okĩ rãtxa chinãvarãóki. Wakase rakáa, mai tachima oĩtani ãwẽ omaĩnõ, mevi ãwẽ weáshoá anõ ãwẽ tsaópakei omaĩnõ atxivaíki arimẽse rãtxã naneóki. 10 Aská anosho 7 shavákase manávaíki rãtxãsho arimẽse noma yonoóki. 11 Ãwẽ aská aka itãi iokarãki yãtã oliveira mani pei venáka tokõsho tachikarãi. Ãwẽ askámaĩnõ, "waka nashái", iinã tanaki. 12 Aská oĩinã 7 shavákase manáóki. Askávaíki noma ãwẽ yonoóa iokarãóma.