33 Paŵaiche kwiuto, liina lyakwe, "Chikalakasa cha Ntwe," Nipele kweleko ŵaŵambile pa nsalaba Che Yesu pamo ni aŵala ŵaŵili uŵaitendekanyaga yangalumbana, jumo kundyo kwao ni jwine kunchiji. 34 Che Yesu ŵatite, "Atati, mwalechelesye pakuŵa ngakuimanyilila yakuitendayi." Nipele, ŵagaŵene iwalo yao kwa kuitendela gudugudu. 35 Ŵandu ŵajimi achilolaga. Achakulu ŵa chiyahudi ŵanjalwisye Che Yesu achitiji, "Ŵakulupwisye ŵane, sambano alikulupusye nsyene iŵaga jwelejo ni Kilisito Nkulupusyo jwasagulikwe ni Akunnungu!" 36 Ŵangondo nombewo ŵanjalwisye Che Yesu ni kwapelechela divai ja kuipa, 37 ni ŵanyawo ŵansalile, "Iŵaga isyene mmwejo ni Mwenye jwa Ŵayahudi, nlikulupusye mwasyene."

38 Ni pachanya nsalaba ŵaŵisile chindu chachilembekwe yele, "Aŵaŵa ALI MWENYE JWA ŴAYAHUDI."

39 Jumo jwa aŵala uŵatendaga yangalumbana uŵaŵambikwe pepala ŵantukene Che Yesu achitiji, "Ana mmwejo ngati ni Kilisito Nkulupusyo? Nlikulupusye mwasyene noweji iyoyo peyo." 40 Nambo jwine jula ŵankalipile achitiji, "Ana mmweji ngankwajogopa Akunnungu namose kanandi? Namuno mmwejo nnamulikwe chisau ni ŵele. 41 Mmwe ni une tukuŵajilwa, pakuŵa aji ni mbote ja sambi syatutesile. Nambo aju mundu ju nganapanganya chachili chose changalumbana." 42 Nipele ŵaŵechete, "Choonde Che Yesu! Mungumbuchile pachinchiinjila mu umwenye wenu." 43 Che Yesu ŵanjanjile jwelejo, "Isyene ngunsalila, lelo jino chimme pampepe none kumbepo."