2 Reis 4

Elisha te Nomaenung Chitui

1 Profeh hae phu kya-e lu kheitpaw zu nynh Elisha kha, "Na ryalahtu ka vawpaw tuh a chih vae; na ryalahtupaw tuh Bawipaw rawrihpaw nynh thua cipaw kha nang nynh na ny, laebah oun umsahtupaw tuh ka ccaaw hae lu ning kha see lang lawku lan yn thua vae," cite sia zah a hopya. 2 Elisha nynh amaw kha, "Pawmou kae cyipah cih? Yn hopah, na inn kya pawmou na hoi?" cite khia zah aning nynh, "Na ryalahtunung nynh ka inn kya chitui ang kheit laelan pawpaw mah ka hoi vae khyh," a cipya. 3 Elisha nynh, "Atolang la cceih lah, na innpaw hae balyn kya-e ang hae, accawnghanpaw ang hae patae kha la hoh hae. 4 Te inn lungkhu lang tee lah, namaw te na ccaaw hae nynh thuakaw khawsungkuh oh lah, ang hae lungkhu langkhe chitui ruin oh; chitui he abeihpaw ang miakaw kha akin lang nung oh," a cipya. 5 Tukeiccuze amaw kyate cceih zah amaw te a ccaaw hae tuh thuakaw a khawsungkuh hae; minmin nynh ang hae kha lawpah hae zah aning nynh chitui a ruin. 6 Ang hae tuh he abeih hae te, a ccapaw kha, "Ccangpaw ang yn lawpah," cipah zah, aning nynh, "Um vae khyh," a cipya. Tetuh chitui tuh lua vae khyh. 7 Tuh-e nopinung nynh Pachia ccungccapaw kalan cceih zah, tuh-e paw nynh, "La cceih lah, chitui kha la zua lah, na laebah kha la sangkuh, te alaepaw chitui khate nang te na ccaaw hae nynh khua la sah oh," a cipya.