2 SIAPHARAN 4

Elisha nynh Imuapaw A Thosah

8 Nin kheit tuh Elisha tuh Shunem khua lang cceih zah, tuin khua kya umpaw mihoinung lu kheit nynh Elisha kha looh-ae a kopya. Tukeiccuze tuh-e laanpi kya a ccia takyh vae ze looh ae khylan tuin kya leih a teepaw. 9 Aning nynh a vawpaw kha, "Dotua, aening laanpi tyty a cceih bungthungpaw hynh-e ccungccapaw hynh Pachia ccungccaw mithyaapaw nynh thua. 10 Inn tungvaw kya pang thungkuhpaw akhaan taraw rae oh sih lah, amaw elang ikhung, ccaboi, haungnaw te maeekhua ccangkheit kha nungpah oh sih, aening kalan yn thua ze tuin kya a um cih," a cipya.

11 Nin kheit tuh Elisha tuh tuin kya yn thua zah, tuh-e akhaan kalan kae zah a ih. 12 A ryalahtupaw Gehazi kyakhe, "Shunam nopinung kha yn kotua," a cipya. Aning nynh yn ko zah nopinung tuh amaw malang a thadyn. 13 Elisha nynh Gehazi kha, "Nopinung kyakhe, kaening hynh hynhcih ciate nae do-oih zah, pawmou kae cyipah cih? Siapharan kalan thuasah, rhawkaw hae a uktu rhawbawipaw kalan thuasah hopya na ry hae paw bya a um tou? cite hopya tua," a cipya. Nopinung nynh, "Kae tuh ka ccungccaw hae laku kya nynh ka um," a cipya. 14 Elisha nynh, "Tuhte athua ze, aning elang pawmou cyipya lanpaw a um?" cite khia zah, Gehazi nynh, "Ahoy, e nopinung hynh ccapaw hoi khyh, a vawpaw tuh ataw vae," a cipya. 15 Elisha nynh, "Nopinung kha yn ko," a cipya. Aning nynh yn ko zah nopinung tuh thuakaw kya a thadyn. 16 Elisha nynh, "Khuavae atu ccyh kya, khyapaw accyh yn thua te, ccapaw na pom cih," a cipya.✝4.16: Gen 18.14Nopinung nynh, "Pou Pachia ccungccapaw, ka bawipaw, na ryalahtunung hynh yn ling nan," a cipya.

17 Nopinung tuh ccaawpoi zah Elisha nynh a hopya thyhte, khyapyapaw accyh he yn thua tuh ccapaw a saah.

18 Imua tuh yn lethung zah nin kheit tuh loohruetu hae kalan a paaw kalan a cceih. 19 A paaw kha, "Ka lu ccih, ka lu ccih!" a cipya. A paaw nynh a ryalahtupaw kha, "A nung kalan cciakhae," a cipya. 20 Aning nynh a nung kalan a cciakhae; imua tuh a nung phae vawlan ninthu cia duakuh zah a chih. 21 Nopinung nynh cceih zah a rhua kha Pachia ccungccapaw a ikhung vawlan a nung koute thuakaw khawsung zah a cciataw. 22 Te a vawpaw kha ko zah, "Pachia ccungccapaw kalan arangte ka cceih cih zah bua kae ki kho nawlan, ryalahtu lu kheit te lann sa kheit kha yn sawpah hae," a cipya. 23 A vawpaw nynh, "Pawccemou amaw kalan atunin na cceih cih? Sawpaw thawpaw mah thua khyh, sabbath nin mah thua khyh," a cipya. Aning nynh, "Phe hoy cih," a cipya. 24 Te lann kha khungnin de zah a ryalahtupaw kha, "Lann hynh cciasah, kae hopah leite byabyate yn cciasahpah nan," a cipya. 25 Tuhcite nopinung tuh cceih zah Karmel Mua kya Pachia ccungccapaw kya a thua.

Pachia ccungccapaw nynh nopinung yn cciapaw kha he a muih tuh, a ryalahtu Gehazi kha, "Dotua, Shunam nopinung yn cceih; 26 tungku khylan ccuenua lah, Na dan tou? Na vawpaw so a dan tou? Imua so a dan tou? cite la khiatua," a cipya. Nopinung nynh, "Ka dan," a cipya. 27 Mua vawlan Pachia ccungccapaw kya he a thua te, a ccu kha a pom. Nopinung kha ccaring tuu khylan Gehazi nynh yn naenuaku. Thuasalama Pachia ccungccapaw nynh, "Amaw um lan um sah, pawccecize aning tuh a lungria myarya athae; e kong hynh Bawipaw nynh kae yn muihsah khyh zah yn hopah khyh," a cipya. 28 Tetuh nopinung nynh, "Ka bawipaw, ccapaw kae ngiakuh zawtou? Kae hynh yn ling nan, cite kae hopah khyh tou?" a cipya. 29 Elisha nynh Gehazi kha, "Taevoiboei voikuh lah, ka hoitang kha ccyngkute cceih. Lukhakheit na tungku oh ze byabeih nan, lukhakheit nynh bya ae beih zemah khungru nan; te ka hoitang kha imua a mae vawlan khe na la khang cih," a cipya. 30 Te imua a nung nynh, "Bawipaw tuh a hiin thyhte, namaw mah na hiin thyhte, nang kha kae cciataw lan khyh," a cipya. Tukeiccuze Elisha nynh thokuh zah nopinung kha a zui. 31 Gehazi nynh malang cceihlo zah hoitang kha imua mae vawlan a khang zemah pawpaw roi mah ccae khyh, hiinnaw muihsahnawpaw pawpaw mah um khyh. Tukeiccuze Elisha kha tungku khylan yn kinua zah, "Imua tuh tho khyh," a cipya.

32 Elisha nynh inn lungkhu lang he a tee tuh, achihpaw imua, a ikhung vawlan a ihpaw kha a muih. 33 Tukeiccuze tee zah thuakaw khaw zah mih lu ning te a um hae, te Bawipaw kalan saw a sang. 34 Te ikhung vawlan thokuh zah imua vawlan bakhung zah a mung kha imua mung te, a mit kha imua mit te, a kuih kha imua kuih te a tungsaku; tuhcite imua vawlan a bakhung lyakhe imua ngesaw tuh yn so.✝4.34-35: 1Si 17.21 35 Te Elisha tuh tho zah akhaan lungkhu kya cciabung cciathung a cceih, te imua vawlan bua a bakhung; imua tuh vae sari hachi zah a mit yn dae. 36 Elisha nynh Gehazi kha ko zah, "Shunam nopinung kha yn ko," cipah zah a ko. Nopinung he yn thua te, Elisha nynh, "Na ccapaw hynh hoei ccavae," a cipya. 37 Nopinung tuh yn thua zah Elisha a cculeihpaw laekhu kya a bakhung; te a ccapaw kha hoei zah a pou.