1 Sui tuh azong aleih vae,

sui ccipaw tuh arulaekuh vae!

Athyaapaw lung hae tuh

laanpi atungkunaw takyh kya

phiariphiarae a um hae.

2 Sui hoypaw hawte

akhinccite amee um zah

aphutepaw Zion ccaaw hae tuh

ang raetu nynh a raepaw

laephi ang lang nynh

ria athua vae hae!

3 Suizaw hae nynh heize

mih taw hae kha

matei tuapakuh hae zah a zusah hae,

thuasalama ka ccungccaw hae tuh

ramkaw e kalauh pavaw hawte

mih rysawthah vae.

4 Nosi hae tuh mateitui kanmaw hae zah,

mih lae tuh mih dankhaling kya abekuh vae;

ccaaw hae nynh looh a ngiaku hae zemah

humhung nynh mah

ccapyh san pya khyh hae.

5 Looh athuathuapaw

a la ae he hae paw tuh

laanpi kya aroh vae hae;

boeining hoypaw a la

lawkuh he hae paw tuh

buhhaw apumkuhpaw kya nynh

a pum vae hae.

6 Kuih hangnua leite,

vaekheihmawte Sodom khua kya

accahpaw detahnaw laeze✝

ka ccungccaw hae tungvaw e

detahnaw tuh alehua.

7 A bawi hae tuh vuiraw laeze

thyaahua hae zah

mateitui laeze arawhua hae;

mih ngesaw tuh

lung sepaw laeze asehua,

mih sang tuh nilar lung te nynh aloku.

8 Atu vae tuh, mih mae tuh

angmae laeze manhua zah,

laanpi kya syntaw lan

um vae khyh hae.

mih ving tuh mih ru vawlan

dawkadae lan cih zah,

thing hawte nynh arou vae.

9 Thaloi te a chih hae paw tuh

kanmaw te a chih hae paw laeze

lungtuapaw nynh athua hae.

Loo kyate apoupaw looh hoi leite,

mih hiinnaw tuh azo.

10 Thawccih thyapaw

nungpi hae kuih nynh

mih ccaaw hae toulou kha

saw lang a thungku vae hae;✝

ka ccungccaw hae aro ccyh lya hae khe

mih ccaaw hae tuh

mih looh lang a tang hae.

11 Bawipaw nynh a thinrianaw kha

khaleih a pousah;

maee lang ruapaw

a thinrianaw kha buu zah,

Zion khua kha maee te a soi,

te khua a thonaw aleihpaw cia

phe ccung lan a u.

12 Rawsetu nynh thuasah,

rhaw nynh thuasah

Jerusalem koikua lungkhu lang

a tee kho hae cipaw kha

laephi siapharan hae te

laephi ccungccaw

lu kheit nynh sanmah zyn khyh hae.

13 Tuh-e tuh Jerusalem e

profeh hae te ranpibawi hae

hoyleinaw keiccu nynh thua,

minmin nynh Jerusalem ngaelung khe

miding hae chii kha a luasah hae.

14 Minmin tuh mingaee hae hawte

laanpi kya a khiavuikuh hae,

mih boeining tuh chiise te nungsikuh zah,

hum nynh sanmah ty ngan khyh hae.

15 Ccungccaw hae nynh

minmin kha, "Cceih oh!

A thyaa lei hae paw!

Ccaring cceih oh! Yn ty

nan oh!" cite a sianua hae.

Tuhcite minmin tuh a ccue hae paw te

a khiavuikuh hae paw lang a tang hae;

minphuin ccangpaw hae nynh,

"Minmin tuh e kya khaw cia

um vae lan khyh hae," cite

a hoku hae.

16 Bawipaw ccaccei maw nynh

minmin kha phiariphiarae

a nung vae hae,

minmin kha pawlangria

vae lan khyh hae;

ccungccaw hae nynh

ranpibawi hae kha

sawtua vae khyh hae,

cciakhaetu hae kha

maedo vae khyh hae.

17 Bawmnaw mue khylan

alakaw lan kae dohannaw ze

kae mit phe ccih vae;

kaening oun khum kho leipaw

minphuin kha thawmuinte

phang kae ngaw.

18 Kae laanpi kya

kae ccia kho khyh nawlan,

minmin nynh kae ccunoh kha

oun zui hae; kae thangnaw ccyh

anae vae; kae ccyh athang vae;

kae thangnaw a thua vae.

19 Kaening oun deehuitu hae tuh

vaawlui e lantaw hae laeze

aranghua hae;

mua vawlan khe kaening kha

oun ccung hae,

ramkaw khe mah

oun buhkhaw hae.

20 Kae hiinnaw hy athuapaw,

Bawipaw nynh chitui thuhpaw,

ccangpaw minphuin hae laku kya

amaw mynlyh kaw khe ah um cih oh,

cite amaw kong kae la hokupaw kha

rhaw hae nynh hunghua

lungkhu lang a saw vae hae.

21 Pou ccanung Edom,

lungtua lungpawte umtua,

Uz ram kya um hae paw nanning,

lungtua lungpawte um oh;

thuasalama nang na kalan mah

banang yn thua cih;

na rui cih zah na boeining

phaekute na sasete na um cih.

22 Pou Zion ccanung,

na seinaw keiccu

detahnaw tuh accing vae,

kyngte ramccang lang

cciakhae na thua vae lan khyh.

Pou ccanung Edom,

na seinaw keiccu de ae tah cih zah,

na seinaw kha a langsakuh cih.