1 Pou Bawipaw , kae tungvaw

acyihkuhpaw hynh beih tuatua;

kae thethyanaw hynh

oun dotua lah, oun nytua!

2 Kae rho athuapaw ram tuh

minphuin ccang hae kalan

pya thua vae zah, kae inn hae tuh

ramccang hae kalan

pya athua vae.

3 Kaening tuh paaw hoi leipaw

ngawraw hae lang kae tang vae;

kae nung hae tuh

nomae hae hawte nynh athua vae hae.

4 Kae niapaw tui mee kha pya aho vae;

thing mah reku aho vae.

5 Kae nging vawlan taphu khangte

thawte rya oun reih hae;

kae thawbang zemah

oun haeungsah khyh hae.

6 Looh phe zaw lan mueku khylan

Izip te Assiria hae ryte

nawccawnaw kae rae vae.

7 Kae minpaaw hae tuh

la sei hae zah, atu tuh um vae khyh hae,

te minmin hoyleinaw kha

kaening nynh kae teing.

8 See hae nynh kaening kha

oun uk hae; mih kuih kyate

oun luesah lanpaw

lu kheit san um khyh.

9 Ramkaw e thaloi rhaw keiccuze

chi ze chi ci ciate

looh kae ccungkuh.

10 Maee lang ruapaw

ccakanccinaw keiccuze

kae ngesaw tuh

lungthuh hawte aman.

11 Zion khua kya nopi hae te

Judah khua hae kya

liaccady hae kha

kyngdete a ikhae hae.

12 Bawi hae kha mih kuih te

a saethung hae;

cciakhaetu hae kha mah

sawtua khyh hae.

13 Ccangvae hae kha nangsete

looh a miasah hae,

pise taraw hae tuh

myarya ripaw thing puihte

vyavya khuliakuh hae.

14 Paawpi hae nynh

khuapi koikua kha cciataw hae zah,

ccangvae hae nynh

mih tintang kha a cciataw vae hae.

15 Kae lungtuanaw tuh

zya adae vae; kae lawnaw tuh

rawkhuinaw lang nynh a tang vae.

16 Bawilukhung tuh

kae lu kyate accah vae;

kae sei vae keiccuze

kaening hanlan ngaethya lan kou um!

17 E keiccuze kae lungroh vae,

e uccaw hae keiccuze

kae mit tuh hoyte

ngawmuih vae khyh:

18 Zion Mua tuh

ccungccaw adae vae keiccuze,

a vawlan khe suizaw hae tuh

a khiakuh bungthung hae.

19 Thuasalama, pou Bawipaw ,

nang nynh zungzae na uk;

na bawitungkhung tuh

she takyh kya po atyn.

20 Pawccemou kaening hynh

kharouh nae ning vae?

Pawccemou kaening hynh

khaw cia nae vua?

21 Pou Bawipaw , kaening nynh

namaw kalan bua kae ki kho nawlan,

namaw kalan beih oun kisah;

langmawlya hawte

kae ccyh hynh beih oun thawsahpah—

22 tuhkhyhze kaening hynh

khaleih nae vua vae cih tou?

Tou kho lei lan ciate

kae tungvaw na thinria cih tou?