1 Vaekheih lyaze ccungccaw

phe abeihpaw khuapi tuh

a makhaete kharouh um vae rei!

Minphuin hae lakuze alesaenung tuh

nomaenung hawte phe thua vae rei!

Ram hae kyaze ram uktunung

a la thuapaw aning tuh

see lang nynh a tang vae.

2 Khuazi khe thawte rah zah

a byaki kya a mitphi alua;

amaw a sungsah hae paw

balyn laku kya lungtangnaw

a pyatu lu kheit san um khyh,

a ruiban hae balyn tuh

a tungvaw lungzinaw hoi leite,

a rhaw hae lang nynh a tang vae hae.

3 Judah tuh ramccang lang

sue thua zah, vawsawnaw te

myarya ccihpaw seetangnaw kha

a teing;

minphuin hae laku khe khuasah zah,

haeungnaw hmin muihkuh khyh;

a lungriathae lyakhe

a deehuitu hae balyn nynh a phya hae.

4 Poi kalan a cceihpaw

lu kheit san a um khyh keiccuze

Zion lang ccianaw laanpi tuh

a rah a khui; a koikua balyn tuh

ccungccaw phe adae,

a ranpibawi hae tuh rawkhuite a um hae;

a liaccaw hae tuh mih ngaethah,

amaw mah myarya a thinlungccih.

5 Aning te a rhawkuh hae paw tuh

bawi lang tang hae zah,

a rhaw hae tuh hoynaw a mue hae,

pawccecize a cyiseimenaw alung keiccuze

Bawipaw nynh aning kha de a tah;

rhaw hae nynh a ccaaw hae kha

kyng hae zah ccaring a cciakhae hae.

6 Ccanung Zion a lesaenaw balyn tuh

azo vae.

Jerusalem e bawi hae tuh

rampaeenaw a muihkuh leipaw

sazuh hae hawte nynh athua vae hae;

minmin a deehuitu hae malang khe

thawzung hoi leite a ccue hae.

7 Jerusalem nynh a riathae ccyh lyate

a khiavuiku lyakhe

langmawlya a la hoipaw

aphutepaw uccaw balyn kha a liathui.

A ccungccaw hae tuh

rhaw hae kuih kya thua hae zah

bawmtu lu kheit sanmah

he a um khyh tuh,

a rhaw hae nynh do hae zah

a ccawbungpaw kha a nuinse hae.

8 Jerusalem tuh myarya a sei keiccuze

nuinsepaw lang a tang vae;

a tungvaw saw a la tua hae paw balyn nynh

a sasete a umpaw kha

a muih hae keiccuze

a dothatheih vae hae;

amaw mah rawkhuite um zah

ccungccaw kha do ngan vae khyh.

9 A boeipae kya athupaw abekuh;

a malang ccyh kha tua khyh;

a khuliakunaw tuh ri lan a um,

lungtangnaw a pya lanpaw

lu kheit san um khyh.

"Pou Bawipaw , ka riathaenaw hynh

yn muihpya tua,

pawccecize ka rhaw hae nynh

yn tae vae hae!" a ci.

10 Aphutepaw a uccaw kha

rhaw hae nynh mih kuih a dyngnua hae;

na ccungccaw zapi hae kalan

tee lan na ua lei hae paw

minphuin ccangpaw hae nynh

a beikinnthyaa lungkhu lang

a tee hae paw kha

aning nynh a muih.

11 A ccungccaw balyn tuh hawkhaekute

looh a ccungkuh hae;

mih thawzung a umthui nawlan

mih sisua kha looh lang a zua hae.

Pou Bawipaw , hohcihtemou

ccungkia leipaw lang

ka tang vae cipaw hynh

yn do lah yn muihtua.

12 Laanpi kya a cceih hae paw

nanning balyn, e hynh nanning hanlan

accakaepaw tou athua?

Do oh lah yn muihpya tua oh,

Bawipaw nynh myarya

a thinria nin khe

ka tungvaw thuasah zah

yn teingsahpaw

riathaenaw te alokuhpaw

ccangpaw riathaenaw a um zawtou?

13 Ahangnaw kyate maee kha yn sah zah,

ka ru lungkhu lang po a tee;

ka ccu kha kaang yn syakhaw zah,

nulang bua yn kisah;

lungriathaete yn nung zah

anin ninlang ka thawzung yn tingsah.

14 Ka cyiseimenaw kha taphu kyakhe

a kuih te heede zah,

ka nging kya yn khiide keiccuze

ka thaw yn thangsah;

Bawipaw nynh ka thadynnua

kho lei hae paw

ccungccaw hae kuih kalan

kae kha yn ap.

15 Ka lungkhu umpaw arawthungpaw

ka rhawkaw hae balyn kha

Bawipaw nynh a vua vae hae;

ka ccangvae hae kha ro khylan

ccyh yn khyanua vae;

misu mianaw khu kya

miade hawte Bawipaw nynh

ccanung liaccady Judah kha

a syde vae.

16 E uccaw hae keiccuze kae tuh

ka rah; ka mit kyate mitphi tuh alua;

ka thawzung bua yn umsahtu te

lungtangnaw yn pyatu

ka pepan um khyh;

rhaw nynh a tae hae keiccuze

ka ccaaw hae tuh a lanme vae hae.

17 Zion nynh a kuih kha

dyngtua zahmah

aning kha lungtangnaw

a pyatu um khyh;

Jakob innpaw hae kha

Jakob rhaw lang tang khylan

Bawipaw nynh kaw a pya vae hae;

Jerusalem tuh minmin laku kya

anungsikuhpaw lang a tang vae.

18 Bawipaw tuh ading,

a bya kha ka rawsesei vae;

nanning minphuin hae balyn,

ngaetua oh,

ka teingnaw hynh yn muihpya tua oh;

ka liaccaw hae te ka ccangvae hae kha

kyng hae zah a cciakhae vae hae.

19 Yn sungsah hae paw kha

ka ko hae zahmah

kae kha yn ling hae;

ka ranpibawi hae te ka piccan hae tuh

mih thawzung a umthui nawlan

looh a ccungku lya hae khe,

khuapi lungkhu kya a chih hae.

20 Pou Bawipaw , pawcih baban mou

ka lungriathae, beih yn dotua;

ka vuepi tuh thawte a thyhleihkuh,

ka lungkhu kya ka bung phe buleihkuh,

nang kha kae la rawse keiccu nynh thua.

Laanpi kya thaloi nynh

chizo ngaethyanaw a umsah;

inn lungkhu kya chinaw te

alokuhpaw a um.

21 Lungtangnaw yn pyatu um leite,

ka hawkhaekunaw kha

minmin nynh a thae hae.

Ka rhaw hae balyn nynh

ka vawsawnaw kha a thae hae;

na cyipaw hynh mih lungtua.

Na khya vae paw accyh kha

yn thuasah ccavae lah,

kae hawte minmin mah

tung hae sah.

22 Ahoy leipaw mih cyisahnaw balyn kha

na malang thua vae sah;

ka cyiseimenaw balyn keiccuze

ka tungvaw na cyi hawte

minmin kha mah cyih hae;

pawccecize ka hawkhaekunaw tuh

myarya lung zah,

ka lungthawthang vae.