1 Kae tuh Pachia thinrianaw

ccungngue te riathaenaw

a tung vae paw nynh ka thua;

2 kae kha yn cciakhae zah

awnaw papin a um leinaw

mohnaw lungkhu langkhe yn saw;

3 kae kyalya kha anin ninlang

a kuih te atu te atu yn bia bungthung.

4 Ka ngesaw te ka ving kha

phe yn zoihsah zah,

ka ru hae kha yn khya vae;

5 kae kha phang yn koihlu zah,

teingnaw te vawsawnaw khate

phang yn lungde;

6 a chinaw asaw vae paw michi hawte

kae kha mohnaw kya yn haungsah.

7 Ka pou kho khyh ccaw cite

pang kha yn thungkhaw zah

aripaw sivawrui te yn khii;

8 bawmnaw mue khylan

ka ko zah ka sia zemah

ka sawsangnaw kha yn vuapya;

9 ka laanpi kha a-awkuhpaw

lungtungpi te yn pingpah zah

ka ccianaw kha yn kousahpya.

10 Aning tuh kae yn buhkhawpaw vong,

a rekuhpaw chindeih nynh thua;

11 ka laanpi kyate yn cciasah sei zah

zoihtatyh lan yn pae;

kae kha yn vuasya;

12 a li kha koi zah, kae kha

a the nynh a tung lanpaw

themuing lang yn taw.

13 A the bawng lungkhu e a the hae khate

ka kin kha yn kaw;

14 Kae tuh ka ccungccaw hae balyn kyaze

nuinsepaw lang ka tang vae zah,

anin ninlang mih hlawke

a sahnua hae paw lang ka tang vae.

15 Akhahpaw te phe yn bynsah zah,

eccangkary khate phe yn ruisah vae.

16 Lung vawlan khe ka haw kha

yn king zah, buhhaw te yn phing.

17 Ka hiinnaw tuh daenaw um khyh;

lungtuanaw tuh pawmou

athua cipaw phe ka ning vae;

18 tukeiccuze, "Ka phu-enaw azo vae,

Bawipaw kyate

ka la ngaehoipaw balyn tuh

phe azo vae," cite ka ho.

19 Ka lungriathaenaw te

inn lei loo leite ka vaevuipaw hynh

ka tua vae ze, eccangkary te

sanyngkhaw khya hawte nynh akhya!

20 Tuh-e tuh apaekuh lei lan ka tua zah,

ka lungkhu kya ka ngaethah.

21 Thuasalama e hynh

ka tuathui keiccuze

ngaehoinaw ka hoi.

22 Bawipaw sungsahnaw atynpaw tuh

kharouh pae boi khyh,

a thawccinaw tuh

kharouh thang boi khyh;

23 tuh-e a sungsahnaw te

a thawccinaw tuh

awkhua takyhte athaw hae;

na lungzinaw tuh myarya ale.

24 "Bawipaw tuh ka hanpaw nynh thua,

tukeiccuze amaw kya

ka ngaehoi cih," cite

ka muisaw nynh a ho.

25 Bawipaw tuh amaw

a ngaehoikuh hae paw te

amaw a ccung hae paw hanlan ahoy.

26 Bawipaw khumnaw kha

daebabi lan ngaw tuh ahoy.

27 Ccungccaw nynh a zawthaw lyakhe

puihnawpaw ccong kha

a puih lanpaw nynh thua.

28 Bawipaw nynh tuh-e

puihnawpaw ccong kha

a puihsah lyakhe

a makhaete daebabi lan

a haung ze ahoy,

29 (ngaehoinaw a um kho cite tuate),

a mung kha vuiping kya

phang a nae ze ahoy,

30 a biatu kalan khe

a byaki kha tuakute

saryanaw a teing ze ahoy.

31 Pawccecize Bawipaw nynh

zungzaete vua lan khyh.

32 A ngaethyasah zemah,

zungzae tynpaw a sungsahnaw tuh

myarya ale thyhte ngaethya a umsah cih;

33 ccungccaw hynh ruaruate

riathaesah ry khyh zah

ngaethyasah ry khyh.

34 Ram lungkhu e thongccah hae kha

ccu te sydenaw,

35 Ahang Huaccepaw Pachia malang khe

ccungccaw nynh mue lan

accanpaw kha muesah leite,

36 lukhakheit byathan kha

he a buleihpya hae ze,

Bawipaw nynh muih khyh tou?

37 Bawipaw nynh kawpya khyh lanze,

hum nynh mou kawpya kho zah

khah-e kha a cyisakuh kho?

38 Ahoypaw te athahpaw hynh

Ahang Huaccepaw Pachia

a munglae kyate yn toikuh khyh tou?

39 Ahiinpaw lukhakheit nynh

a seinaw keiccu detahnaw

a muepaw kha

pawccemou a bokhaeku?

40 Aening nynh ah laanpi kha

dothuite syntawtua oh sih lah,

Bawipaw kalan ki oh sih.

41 Vaawlang umpaw

Pachia kalan khe

ah kuih kyalya thua leite

ah thinlung balyn kha

hangthung oh sih.

42 Kaening tuh kae sei vae zah

kae dou vae, kae seinaw kha

nae ngaethya vae khyh.

43 Thinrianaw te phang na

lungdekuh zah nae deehui,

ngaethyaumsah leite

kaening kha nae chia;

44 kae sawsangnaw nynh

po a zuake kho khyh ccaw cite,

maeking khate phang na lungde.

45 Minphuin hae laku khe kaening kha

anungsikuhpaw te

athupaw lang nae rae vae.

46 Kae rhaw hae balyn nynh

mih khalang kha oun awnua vae hae;

47 rinaw, hunghua akhupaw,

maemihnaw te ronaw nynh

kae tungvaw oun thuanua vae.

48 Ka ccungccaw hae tuh

ronaw a tung hae keiccuze

ka mitphi tuh vawpi hawte alua.

49,50 Vaawlang umpaw Bawipaw nynh

yn dobung zah yn muih mawlaezung,

ka mitphi tuh apaekuh lei lan

dae leite po alua cih.

51 Ka khua kya-e

liaccaw hae tungvaw

acyihkuhpaw kha

ka muih zah ka ngaethah.

52 Akonglang um leite

kae yn rhawtu hae nynh

pavaw bi hawte bi hae;

53 Ka hiin pite hunghua

lungkhu lang yn vua hae zah,

lung te yn nethin hae;

54 ka lu kha tui nynh yn vu zah,

"Ka chih vae," ka ci.

55 Pou Bawipaw ,

akhunaw lungkhu te

na min kha kae ko;

56 "Bawmnaw mue khylan

ka siaruanaw hynh

na nakaring hutawku leite

bawmnaw beih yn pyatua!" cite

kae ngiakunaw kha nae thaepya.

57 Nang kha kae koku vae ze,

nae naenuakuh zah,

"Rih nan!" nae cipya.

58 Pou Bawipaw, ka byathan kha

ccaring nae lawpah zah,

ka hiinnaw kha nae luesah vae.

59 Pou Bawipaw , ahme leite

ka tungvaw yn cyi hae paw kha

nae muihpya vae;

ka byathan hynh bya beih yn piapya tua.

60 Kae yn rhawnaw hae balyn te

aruh lante yn paccynnuaku

hae paw balyn kha phe na muih vae.

61 Pou Bawipaw ,

yn saryanaw hae te

aruh lante yn paccynnuaku

hae paw balyn kha

phe na thae vae.

62 Ka rhaw hae nynh

anin ninlang ka thanhote

kae kha yn rawse hae.

63 A haung hae ze thuasah,

a thadyn hae ze thuasah beih dotua hae,

kae tuh saryanawpaw

hlaw lang nynh yn sah hae.

64 Pou Bawipaw ,

mih kuih nynh rya a law thyhte

mih cyisahnaw kha liaru hae!

65 Lungriathaenaw pya hae lah,

minmin kha thyalawtua hae!

66 Thinriate minmin kha deehui hae lah,

Bawipaw vaawlui zakaw kyate rotua hae.