1 Bawipaw nynh thinriate

Zion ccanung kha maethya

phe a law vae rei!

Israel a lesaenaw kha

vaawlang te laephi kalan

a sawbung vae;

a thinria nin kya a ccu

a khangnawpaw kha

liathui vae khyh.

2 Bawipaw nynh thawcci leite

Jakob a umnaw hae balyn kha a ro vae;

a thinria keiccuze ccanung Judah kya-e

rhawlungrua hae kha a ting vae;

peenaw te uktu hae kha thethyasahte

laephi kalan a sawbung hae.

3 Myaryamaw a thinria zah

Israel a thungnaw balyn kha

phe a paepya; rhaw hae malang khe

a ranglang kuih kha minmin kyate

a khin vae, a pepan

umpaw balyn kha pong a upaw

maeesoi hawte Jakob kha a u vae.

4 Rhaw hawte a li kha koi zah,

rhaw hawte a ranglang kuih khate

phang a nungde;

Zion ccanung bu kya umpaw kaening nynh

kae lungrythuakhaekupaw balyn kha

aning nynh a chia vae hae;

a thinrianaw kha maee hawte

a ruasah vae.

5 Bawipaw tuh rhaw hawte nynh athua vae;

aning nynh Israel kha a ro vae;

a siapharan inn balyn te

a rhawlungrua hae kha roh zah,

ccanung Judah kyakhe

rawkhuinaw te

ngaethyanaw kha a lungsah.

6 A umnaw bu kha khokhu hawte phou zah

a beikbu kha a ro vae;

Bawipaw nynh Zion kyakhe

beiknaw poi te

sabbath nin kha zosah zah,

myaryamaw a thinria keiccuze

siapharan te ranpibawi kha a vua hae.

7 Bawipaw nynh a silawhang kha sarya zah,

a beikinnthyaa kha a vua vae;

a siapharan inn hae kya-e pang hae kha

rhaw hae kuih kalan a pya vae hae;

poitua lya hawte Bawipaw inn kyakhe

mih roi accae.

8 Bawipaw nynh Zion ccanung kya-e

khualungrua kha ro lan a tuaku;

arui kha po a raw; ronaw kyate

a kuih kha synkuh khyh;

atolang asanpaw khualungrua te

khualungruapi kha

mih ngaethyasah hae zah,

parouh mawte aroh hae.

9 A koikua hae tuh lae kaw lang

accahbung hae;

koikua hae kha roh hae zah

accong hae kha a khya hae;

a siapharan te a uktu bawi hae tuh

minphuin ccangpaw hae

laku kya nynh a um hae;

phung ccangpyakunaw um vae khyh,

a profeh hae nynh Bawipaw kyate

vizin mue khyh hae.

10 Ccanung Zion kya-e piccan hae tuh

laekhu kya daebabi lan a haung hae;

mih lu kya vuiping phingkuh hae zah

buriboei kha a zingku hae;

Jerusalem liaccaw hae nynh mih lu kha

laekhu lang a bakhung hae.

11 Ka rawnaw ze ka mit phe phing vae;

ka vuepi tuh thawte a thyhleihkuh,

ka ccungccaw hae tuh

aro hae keiccuze,

ka nyngkhaw atui tuh

laekhu kya lae athua,

pawccecize nosi hae te

imua taraw hae tuh

khuapi kya-e laanpi hae kya

mih thawthang.

12 Khuapi kya-e laanpi hae kyakhe

vaemaw a muepaw hawte

mih thawthang lya te

mih hiinnaw kha

mih nung hae by vaw kya

a nung lya hae khe,

"Looh te misutui teimou a um?" cite

mih nung hae kha a rawnua hae.

13 Pou ccanung Jerusalem,

na hanlan pawmou

ka ho kho cih zah, nang kha

pawtemou kae khinkhia cih?

Pou ccanung liaccady Zion,

nang kha lungtangnaw pya khylan,

pawtemou nang kha

kae khinkhia kho cih?

Na kya-e ronaw tuh rili hawte

ale keiccuze nang kha

hum nynh mou ae raethui kho cih?

14 Na profeh hae nynh akyh leipaw te

lingnawpaw vizin hae kha

na hanlan a muih vae hae;

nang kha langmawlya hawte

bua thuasah khylan,

minmin nynh na hoyleinaw kha

langsaku leite, akyh leipaw te

cciaseinawpaw hawnaw bya kha

a muih vae hae.

15 Laanpi kya a cceihpaw balyn nynh

nang kha mih kuih ae bianua hae;

ccanung Jerusalem kha

saryanawpaw roisawnua hae zah,

mih lu a thuhpya hae;

"Puithyanaw phe accingpaw,

laephi pynpi lungtuanawpaw, cite

a ko hae paw khuapi tuh,

e hynh tou athua?" a ci hae.

16 Na rhaw hae balyn nynh

nang kha mih khalang ae awnua hae;

saryanaw roi ae sawnua hae zah,

mih haw ae zynua hae,

"Aning kha phe ah laang vae oh!

E nin hynh aening nynh

ah ngaehoi oh paw nin thua zah,

nyathyakou tuh ah muih

vae oh!" cite a sia hae.

17 Bawipaw nynh

a paccynkupaw kha a cyi vae,

langmawlya a la ho thyhte

a bya kha a ccingsah vae,

thawcci leite a ro vae;

na rhaw kha na tungvaw

a lungtuasah zah,

na rhaw thawzung kha

a hangthung.

18 Pou Zion ccanung kya-e

khualungrua,

Bawipaw kalan thawte siatua!

Mitphi tuh vawkhutui hawte

khuazi khuadae lua sah!

Haeungtaw nan,

na mitphi tuh po lua sah!

19 Khuazi khe thokuh lah, siatua!

Bawipaw malang khe

na thinlung kha tui hawte moh laetua!

Mih vuelaw keiccuze

mih thawthang zah

laanpi atungkunaw takyh kya

um hae paw

na ccaaw hae hiinnaw hanlan

amaw kalan na kuih hangtua.

20 Pou Bawipaw , beih dotua lah,

hoyte tuatua!

E hynh hum tungvaw mou na cyi?

Nungpi hae nynh a saahku hae paw

mih ccaaw hae kha

ae lan accan zawtou?

Ranpibawi hae te profeh hae kha

Bawipaw beikinnthyaa kya

chia lan accan hae zawtou?

21 Zawthaw hae te kum tang hae paw tuh

laanpi kya laekhu khe a huekuh hae;

ka liaccaw hae te ka ccangvae hae tuh

thaloi te a chih vae hae;

na thinria nin khe thawcci leite

minmin kha na chia vae hae.

22 Poi lyaze ccungccaw ko hawte,

ka pepan balyn kyate

ka rhaw hae kha nae konua hae;

Bawipaw a thinria nin kya tuh

lu kheit sanmah lue khyh zah hiin khyh;

ka saahkuh hae zah

ka kuaku hae paw ka ccaaw hae kha

ka rhaw nynh a chia vae hae.