1 Bawipaw nynh hynhte a ho:

Moab nynh atu te atu seinaw a rae keiccuze

detah leite ka um lan khyh;

aning nynh Edom siapharan ru kha

buhhaw lang phe tang lan maee te a u.✝

2 Tukeiccuze Moab ram kha

maee ka sawnua cih zah,

tuh-e maee nynh Kerioth

rhawlungrua hae kha a u cih,

myarya ccae lan siathungnaw,

siaruanaw te mungkae roi laku khe

Moab hae tuh a chih cih hae;

3 Moab ram angaelung khe

uktu bawi kha ka vua cih zah,

amaw ryte a kuihkaw e

bawi hae balyn kha ka theih cih hae, cite

Bawipaw nynh a ho.

4 Bawipaw nynh hynhte a ho:

Judah nynh atu te atu

seinaw a rae keiccuze

detah leite ka um lan khyh;

pawccecize minmin nynh

Bawipaw kawbya kha vua hae zah,

a phungbya kha zui khyh hae,

mih minpaaw hae nynh

a zui hae paw hynbya khate

minmin kha cciakhaesei athua vae hae.

5 Tukeiccuze Judah tungvaw

maee ka sawnua cih zah,

tuh-e maee nynh Jerusalem

rhawlungrua hae kha a u cih.

6 Bawipaw nynh hynhte a ho:

Israel nynh atu te atu seinaw a rae keiccuze

detah leite ka um lan khyh;

pawccecize minmin nynh

miding hae kha ngun lang zua hae zah,

minyaa hae kha phanah

bua kheit lang a zua hae—

7 ryachi hae lu kha laekhu e

vuiping kya syde hae zah,

zakawsang hae paw kha

laante langkhe a tu hae;

ka min thyaapaw kha thusah khylan

paaw te ccaaw nynh

nopi lu kheit kha a teenua hae;

8 silawhang miakaw pe khe

a lawku hae paw ponpaw

boeining vawlan a i hae;

detahnaw kyate a mue hae paw

phua te a reku hae paw

misutui kha mih Pachia inn kya a nia hae.

9 Tuhzemah sidar thing

ahang hawte hang zah,

phaesi thing hawte a thungpaw

Amor minphuin kha

mih malang khe ka ro;

avawlan umpaw Amor thae te

akawlan umpaw Amor tharui kha ka ro.✝

10 Amor hae ram kha ccou khylan,

Izip ram kyate kae poukhae oh zah,

ramkaw kya kum sung pali

kae cciakhae oh.

11 Nae ccaaw hae abang kha

profeh lang ka hangthung hae zah,

nae mino hae abang kha

nazir* hae lang ka hangthung hae.

Pou Israel ccungccaw hae,

tuh-e bya tuh ahmepaw

thua ccaccing khyh tou? cite

Bawipaw nynh a ho.✝

12 Thuasalama nanning nynh

nazir hae kha misutui na niasah oh zah,

profeh hae kha, "Profehbya

na ho lan khyh," cite kaw na pya oh.

13 Tukeiccuze phe beih lan

tarouhkuhpaw loohcce nynh

le kha a nethin hawte,

nae umnaw hmin kyakhe

nanning kha kae nethin cih oh.

14 Arangte a ccue khopaw nynh

ccue man lan khyh zah,

a thawsaepaw nynh a thawzung kha

thua man lan khyh.

A thungpaw nynh a hiinnaw kha

khumkuh lan khyh;

15 li a ccyngkuhpaw nynh

thadyn man lan khyh zah,

arangte a ccue khopaw nynh mah

amaw kha khumkuh man lan khyh,

marang rhawkaw nynh mah

a hiinnaw kha khumkuh man lan khyh;

16 tuin nin kya tuh a thung hae paw laku e

mih thinlung tang hae paw nynh mah

mih sasete a ccue cih hae, cite

Bawipaw nynh a ho.