1 Izip ram kyate minphuin pynpi te ka poukhae hae paw, pou Israel ccungccaw hae, Bawipaw nynh nanning ae honua oh paw e bya hynh ngaetua oh:

2 Laephi vawlan e minphuin hae balyn kyaze

nanning kyalya kha kae ny oh;

tukeiccuze nae hoyleinaw balyn hanlan

de kae tah cih oh.

3 Ccungccaw lu ning nynh

nawccawnaw hoity leite pynkheihlan

khua a ccongkheih thya hae zawtou?

4 Chindeih tuh teipaw saw a hoi leite

ramkaw kya a sia zawtou?

Chindeih anopaw tuh

pawpaw sanmah a kyngkuh leite

a karung kyate a sia zawtou?

5 Lae vawlan khe kaangsya leite,

pavaw tuh kaang a kae zawtou?

Kaang tuh a pheihtu a um leite

a seihkuh boi zawtou?

6 Khua lungkhu kya

mungkae kha tu athua ze,

khuaccaaw hae tuh ri leite

a um hae zawtou?

Bawipaw nynh ronaw a thuasah leite,

khua lungkhu kya ronaw a thua zawtou?

7 Bawipaw PACHIA nynh a paccynpaw kha

a ryalahtu profeh hae kya

a langsakuh leite,

pawpaw sanmah cyih khyh.

8 Chindeih nynh he a sia vae ze,

hummou ri leite a um cih?

Bawipaw PACHIA nynh bya he a ho vae ze,

hummou profehbya ho leite a um kho?

9 Ashdod te Izip kya-e rhawlungrua hae kha

thaesah hae lah,

"Samaria mua vawlan pumkuh oh,

Samaria khua lungkhu kya

siarisiaraepaw roi te

tuaasahkunaw a umpaw kha

dotua oh," cite hopah hae.

10 Minmin nynh akyhpaw cyi lanpaw kha

nykuh khyh hae, mih inn

ahoyhoy hae paw kyakhe

puathonaw te a luade hae paw

uccaw hae kha a ccakhung hae, cite

Bawipaw nynh a ci.

11 Tukeiccuze Bawipaw PACHIA nynh hynhte a ho:

Rhaw nynh ram kha a koihlu cih zah,

na koihkhawkupaw kha ae phoupah cih;

na inn ahoyhoy hae paw kha

luadete a roh cih hae.

12 Bawipaw nynh hynhte a ho: Tuurinpaw nynh tuu accu ccangning khyhze nakua ccapyh kha chindeih khalang kyate a khum hawte, Samaria khua umpaw iphae adung te ikhung apaekua vawlan a haung hae paw Israel hae beihtaraw kha khum athua cih hae.

13 Bawipaw PACHIA, vaaw Pachia nynh

a hopaw kha ngae oh lah,

Jakob ciihan hae kha honua oh:

14 Israel kha a seinaw keiccuze

de ka tah nin khe,

Bethel kya umpaw silawhang hae kha

de ka tah cih hae,

silawhang a ki hae kha moi athua cih hae zah

laekhu lang a ccah cih hae.✝

15 Khuaccih ccyh lya-e inn te

hawnin ccyh lya-e inn kha

ka phou cih hae;

saepaw nua te a ccaan hae paw

inn hae kha ka roh cih,

myarya lepaw inn hae tuh

a zo vae cih hae, cite

Bawipaw nynh a ho.