1 Zion kya lungdaete a um hae paw te

Samaria Mua vawlan

khyndadyh lan a um hae paw,

minphuin hae kyaze

asung-e huapaw lante alangkuhpaw,

Israel hae nynh a doliaku hae paw hanlan

ngaethya lan kou um!

2 Kalneh khua lang

la cceih oh lah, la dotua oh;

tuin kyate myarya lepaw

Hamath khua lang la cceih oh;

te Filistin ram e Gath khua langkhe

la cceihbung oh.

Nanning tuh e ram hae laeze

na hoyhua oh tou?

Nae ram tuh mih ram laeze akohua tou?

3 Nin thahpaw nin kha

ccaring na nue oh zah,

puathote ukkunaw nin kha

na naesah oh.

4 Saepaw nua te raekuhpaw

ikhung vawlan ih hae zah,

mih iphae vawlan a huekuh hae paw,

tuuphu kya-e tuutaw hae te

vaetua khia kya-e vaetuataw hae kha

a ae hae paw hanlan thuasah,

5 tintang khuakute hlaw huataw kha sah hae zah,

David hawte khuakupaw uccaw kha

a raekuh hae paw hanlan thuasah,

6 misutui kha banang lepaw te neih hae zah,

chitui ahoyhoypaw kha

a thuhku hae zemah Josef nynh

ronaw a teingpaw kha

mih ngaethah lei hae paw hanlan thuasah

ngaethya lan kou um!

7 Tukeiccuze minmin kha masaty

a kyng cih hae zah a cciakhae cih hae,

kalouhkalouh huekuh hae paw kya-e

lungpawnaw tuh athang cih.

8 Bawipaw PACHIA ccaccei nynh

bya a kinku vae (Bawipaw ,

vaaw Pachia nynh a ho):

Jakob nynh a lysakunaw te

a rhawlungrua hae kha ka hua;

khuapi te a lungkhu um hae paw balyn kha

rhaw hae kalan ka ap cih hae.

9 Inn innkheit lungkhu ccungccaw lu haw a laehy hae ze, a chih cih hae. 10 Michi te puizia athua hae paw lu kheit nynh michi rhua kha maee te u khylan inn lungkhu te a poukhae cih, te inn lungkhu umpaw lu kheit kha, "Na umkheih oh paw lukhakheit a um ung tou?" cite a khia lanze, "Um vae khyh," cite a khung cih. Tetuh tuh-e a puiziapaw tuh nynh, "Daebabi lan zya um! Bawipaw min kha ho lanpaw thua khyh," a cipah cih.

11 Dotua, Bawipaw nynh kawpya keiccuze,

inn lepaw kha phiariphiarae

pong um lan phou athua cih zah,

inn dihpaw kha zoihtatae lan

phou athua cih.

12 Marang hae tuh lung pipi vawlan

a ccue hae zawtou?

Ccungccaw nynh rili kha tangnuapaw te

lei lang a thue zawtou?

Thuasalama nanning nynh dingnaw kha

sy lang na paleih oh zah,

dingnaw thae kha

eccangkary lang na paleih oh—

13 nanning nynh Lodebar khua kya

nae lungpaw zah,

"Karnaim kha ahmaw thawzung te

ah lah khyh oh tou?" na ciku oh.

14 Thanccingte, pou Israel hae,

nanning kha rawse khylan

minphuin phuin kheit ka langsakuh cih zah

minmin nynh nanning kha

Lebo-hamath kyate Arabah Accya kyacia

ae tuaa ae sah cih oh, cite Bawipaw ,

vaaw Pachia nynh a ci.