Atos 16

Thonginn kya Paul te Silas

16 Nin kheit tuh kaening nynh sawsangnaw kalan kae ccia lyakhe, muisaw bahkuh zah malang e konglang a hodaethyapaw seenung taraw lu kheit te kae tungkuh. Malang yn cyihkuh lanpaw kong a hodaenaw liate a bawi a zua hae kha phua patae a muepya hae. 17 Tuh-e nung nynh Paul te kaening kha oun zui zah, "E ccungccaw hae tuh Ahang Huaccepaw Pachia see hae thua hae zah khumnaw laanpi kong ae hopah oh paw nynh athua hae," cite thawte a sia. 18 Aning nynh tuhcite nin patae cia a cyi. Paul nynh myarya thinsote nulang hawi zah muisaw kha, "Hynh-e nung lungkhu te pou, Jesu Khri min te kaw kae pya," a cipya. Tuh ccyh lya mawtuin muisaw tuh po a pou.

19 Tuh-e nung a bawi hae nynh phua muenaw elang ngaehoinaw um vae khyh cipaw kha he nyh hae tuh, Paul te Silas kha kyng hae zah kungkunaw hmin kalan kawhoitu hae malang a thuakhae hae. 20 Minmin kha bawi hae kalan cciakhae hae zah, "E ccungccaw hae tuh Judah hae thua hae zah ah khua kha vawsawnaw oun pya hae. 21 Aening Rom hae nynh lawku lan accan leipaw te zui lan accan leipaw phung hae kha oun ccangpya hae," cite a hopya hae. 22 Ccungccaw zapi hae tuh minmin a rawsetu hae kalan a panbua hae, te bawi hae nynh mih boeining kha seii hae zah tungbang te bua lan kaw a pya hae. 23 Avae patae a bua kou hae te, thonginn kya sah hae zah thong uktupaw kha hoyte rin lan kaw a pya hae. 24 Tuhte kaw a pya hae thyhte, thong uktupaw nynh minmin kha alungkhu e thong kyakhe nung hae zah mih ccu kha thingtung te lua a saw hae.

25 Ziraccyng khe Paul te Silas tuh sawsang hae zah Pachia thehoysahnaw hlaw a sah hae; te thongccah hae nynh a ngae hae. 26 Tualeipite innry thawte yn suekuh zah thonginn leihpaw tuh pong ahy; vaekheihmawte thuakaw hae balyn pong oun hungkuh zah thongccah hae miakaw kya-e sivawrui tuh pong akhahkuh. 27 Thong uktupaw tuh a inaw kyate yn thaekuh zah thonginn thuakaw hae pong ahungkuhpaw kha he a muih tuh, thongccah hae pong ccue vae cih hae cite tua zah amaw te amaw chiaku lan cite a thaloi kha a thuaaku. 28 Thuasalama Paul nynh thawte sia zah, "Namaw te namaw vawsaw pyakuh nan, pawccecize kae balynte hein kya pong kae um," a cipya. 29 Thong uktu nynh maee kha kokhae hae zah arangte tee zah Paul te Silas malang thyngku biate a bakhung. 30 Tukoute minmin kha poukhae hae zah, "Sazae oh, khumnaw mue khylan pawmou ka cyih cih?" cite a khia hae. 31 Minmin nynh, "Bawipaw Jesu Khri kha zyn lah nang tuh khum na thua cih, te na innbyn hae mah khum athua cih hae," a cipya hae. 32 Minmin nynh tuh-e paw te a inn kya um hae paw balyn kha Bawipaw bya a hopya hae. 33 Aning nynh Paul te Silas kha tuh-e khuazi, tuh-e ccyh kya mawtuin cciakhae hae zah mih vaemaw kha a singpya hae; te aning te a innbyn hae balyn tuh baptisma palou a in hae. 34 Aning nynh minmin kha a inn lang hoei hae zah looh a dang hae; aning tuh Pachia zyntu lang tang zah a innbyn hae balyn ryte myarya mih lungtua.

35 Khua yn dae tuh bawi hae nynh palih bawi hae kha saw hae zah, "Tuh-e ccungccaw hae tuh cceih hae sah," a cipya hae. 36 Thong uktu nynh tuh-e bya tuh Paul kalan hopah zah, "Bawi hae nynh ccungccaw oun saw hae zah nanning kha cciasah lan bya oun taw hae, tukeiccuze atu toikuh oh lah daebabi lan la cceih ccavae oh," a cipya. 37 Thuasalama Paul nynh, "Rom accozah kya-e ramccungccaw kae thuapaw kaening hynh akaw-aleih byakhia leite zapi malang oun bua hae zah thonginn kya oun saw hae; atu aruh lante tou hung oun saw cih hae? Tuhte thua khyh! Mimaw ccaccei oun cceih hae sah lah kaening hynh oun pousah hae sah," cite a khung hae. 38 Palih bawi hae nynh tuh-e bya tuh bawi hae kalan a hopya hae. Paul te Silas tuh Rom accozah kya-e ramccungccaw hae nynh athua hae cipaw he a nyh hae tuh a rih vae hae. 39 Tukeiccuze bawi hae tuh oun cceih hae zah minmin kha thawte a bohku hae; te thonginn kyate pousah hae zah, tuin khua kyate a toiku nawlan hae a ngia hae. 40 Paul te Silas tuh thonginn kyate pou hae zah Lidia inn lang a cceih hae; minmin nynh uno hae kha muih hae zah thawpyanaw bya a hopah kou hae te, a pou hae.