1 Tukoute Paul tuh Athen khua kyate cceih zah Korin khua kya a thua. 2 Tuin kyakhe Pontas ram kya a puipaw Akuila a ci hae paw Judah paw te a tungkuh hae; tuh-e Akuila tuh a zu Prisilla ryte Italy ram kyate a la thuanaw hae asaw loh leipaw nynh thua, pawccecize Judah hae balyn tuh Rom khua kyate marya a pou cih hae cite Klaudias siapharanpaw nynh kaw a la tho; Paul tuh minmin te tungku khylan cceih zah, 3 mih ryalaw aloku keiccuze mih kya umbua zah rya a lahkheih hae; minmin tuh anuekuh thyapaw bu a raetu hae nynh thua. 4 Sabbath nin takyh Paul nynh sinakok kya bya hokhae hae zah Judah hae te Grik hae kha a hyy hae.

5 Silas te Timote nynh Mesidonia ram kyate he oun thua hae tuh, Paul nynh a ccyh balyn kha phungho nawlan mang zah, Jesu tuh Messiah nynh thua cite Judah hae kalan ccaekia a khan. 6 Judah hae nynh Paul kha rawse hae zah a thethyasah hae keiccuze, Paul nynh a boeining kya-e vuiping kha thyngnua hae zah, "Nae chii tuh naemaw lu vawlan thua vae sah! Kae tuh ka thyaa; atu te Zenta hae kalan nynh ka cceih vae cih," a cipya hae. 7 Paul tuh sinakok kyate pou zah Pachia a beikpaw, Titias Jastas a ci hae paw ccungccapaw inn lang a tee; tuh-e paw inn tuh sinakok te phang abekuh. 8 Sinakok uktupaw Krispas tuh a innbyn hae balyn ryte Bawipaw kha a zyn hae; te Paul bya a thaepaw Korin khuaccaaw hae patae mah zyn hae zah baptisma a in hae. 9 Khuazi khe Bawipaw nynh Paul kha vizin te bya hopah zah, "Rih nan, ho ccaleih lah umtaw nan; 10 pawccecize na kya ka um zah vaemaw muesah lan hum nynh san ae zia lan khyh; pawccecize hynh-e khua kya ccungccaw patae ka hoi," a cipya. 11 Tuin kyakhe Paul tuh kum kheit sah taruh cia um zah Pachia bya kha a ccangpya hae.

12 Kalio nynh Akhai ram kya mangki bawi lang a tang lyakhe Judah hae nynh lungngingte Paul kha kyng hae zah byapianaw zung lang thuakhae hae zah, 13 "E paw nynh Kawbya te arawsekuh lante Pachia kha beik lan ccungccaw hae kha a soih hae," cite a ho hae. 14 Paul nynh byaho lan he a cih tuh, Kalio nynh Judah hae kha, "Pou Judah hae, tuh-e tuh aseipaw uccaw te ahoy leipaw uccaw athua lanze, kae nynh nae byathan kha lehkhan lan accan. 15 Thuasalama tuh-e tuh bya konglang, min konglang te nae kawbya konglang te asekuhpaw byakhianaw athua zetuh naemaw te naemaw bya la piakuh oh; pawccecize tuhcihawpaw konglang tuh bya kae pia ry khyh oh," a cipya hae. 16 Minmin kha byapianaw zung kyate pong a dee hae. 17 Grik hae balyn nynh sinakok uktupaw Sosthenes kha kyng hae zah byapianaw zung malang khe a bua hae. Thuasalama Kalio nynh tuh-e tuh pawlangria khyh.

18 Paul tuh tuin kya khaw cia a um koute, zyntu hae kha beihsya hae zah Siria ram lang Prisilla te Akuila ryte sanphalung te a cceih hae. Byakinkunaw a rae vae keiccuze Kenkhrea khua kyakhe a sang a ngoku sya.✝ 19 Efesa khua a thua hae tuh, Paul nynh minmin kha tuin kya a cciataw hae; amaw tuh sinakok lang tee zah Judah hae ryte bya a hokuh hae. 20 Minmin nynh Paul kha khaw cia umkheih lan ngia hae zah Paul nynh a nawccah khyh. 21 Minmin kyate a ccia mawkhe beihsya hae zah, "Pachia rynaw athua zetuh nae kalan bua kae ki cih,"* a cipya hae. Tukoute Efesa khua kyate sanphalung te a cceih.

22 Paul nynh Sisaria khua he a thua te, Jerusalem lang kaethung zah khriccaawbuu kha a beih hae, tukoute Antiok lang a cceihbung. 23 Tuin kya azawlya a um koute Paul tuh cceih zah Galatia ram kyate Frikia ram kya po khuaccong zah zuitu hae balyn kha thawzung a pya hae.

24 Alexandria khua kya pui zah byaho kou apuakuhpaw te Ccathyaa kou nyhpaw Apollos a ci hae paw Judah paw lu kheit tuh Efesa khua lang yn thua. 25 Tuh-e paw tuh Bawipaw Laanpi konglang hoyte a ccangkuhpaw nynh thua; Jesu konglang kha lungthote ho zah hmerarih lan a ccangpya hae; tuhzemah Johan baptisma kong rou nynh a ny. 26 Aning nynh sinakok kyakhe rawhoyte phunghonaw kha a tho vae; Akuila te Prisilla nynh a hopaw kha he a thae hae tuh, amaw kha ccanglang hoei hae zah Pachia Laanpi kha houh ahme lante a ccaesahpya hae. 27 Apollos nynh Akhai ram lang he a cceih ry tuh, zyntu hae nynh amaw kha thawzung pya hae zah leh a khan ccaw hae cite zuitu hae kalan ccaw a zeipya hae; aning nynh he a thua tuh, Pachia thawccinaw liate zyntu lang a tang hae paw kha patae a bawm hae; 28 Pawccecize Jesu tuh Messiah nynh thua cipaw kha Ccathyaa kya-e langsapyate ccungccaw zapi malang Judah hae kha rawhoyte a ei kho hae.