1 Pentekos nin yn thua tuh minmin balyn tuh ahmin san kheit kya pong a um hae. 2 Myarya arupaw khise thopaw hawte roi tuh vaawlang te vaekheihmawte yn ccae zah minmin a dahungnaw hae inn kyakhe phe abeih. 3 Te maeesoi a lopaw lae hae tuh minmin kya oun langkuh zah milu raveih tungvaw kya accah. 4 Minmin balyn tuh Thyaa Muisaw te beih hae zah Muisaw nynh ho khonaw a pya hae thyhte minmin nynh ccangpaw bya te a ho hae.

5 Tuh ccyh lyakhe vaawlui zakaw umpaw ram takyh kyate beiknaw lang a zuakuh hae paw Judah hae tuh Jerusalem kya oun thua hae. 6 Tuh-e roi he accae te ccungccaw zapi tuh oun sueluakuh hae; zuitu hae nynh a ho hae paw kha mimaw bya raveihte a thae hae keiccuze mih ngaeangthua. 7 Minmin tuh ngaeangthuate mih khuaruaru zah, "Hynhte bya a ho hae paw balyn hynh Galilee hae thua khyh hae tou? 8 Pawtemou ahmaw ah thokeinaw bya raveihte ah thae oh? 9 Aening tuh Parthia hae, Media hae, Elam ram te Mesopotamia ram, Judea ram, Kappadosia ram, Pontas ram, Asia ram, 10 Frikia ram, Pamfilia ram, Izip ram te Libia ram kya-e Sirin pepan kya um hae paw te Rom ram kyate oun thuapaw mikhia hae, Judah hae te Judah beiknaw kalan a tee thaw hae paw, 11 Kretan hae te Arab hae nynh ah thua oh, thuasalama hynh-e hae nynh a ho hae paw ngaeangthua lan umpaw Pachia ryalaw kong kha aening nynh ahmaw bya raveihte ah thae oh," cite a hoku hae. 12 Minmin balyn tuh ngaeangthua thinphangte, "Hynh-e hynh paw suilan mou?" cite lu kheit te lu kheit a hokuh hae. 13 Thuasalama ccungccaw abang nynh, "E hae tuh misutui thawpaw nynh a rui hae," cite sarisarya lante a ci hae.

14 Thuasalama Peter nynh lu haw lae kheit hae ryte thadyn zah a roi phe ccae lante minmin a hopya hae paw tuh: "Judah ccungccaw hae, nanning te Jerusalem kya na um oh paw nae balynte hynh-e hynh nyh oh lah ka bya hynh yn ngaepya tua oh. 15 Pawccecize hynh-e ccungccaw hae tuh nanning nynh na tua oh hawte rui khyh hae, pawccecize atu tuh awkhua suimilan ccangtakua khaw acih ung. 16 E tuh profeh Joel nynh a la hosyapaw nynh thua:

17 ‘Pachia nynh a hopaw tuh,

nyathya nin kya hynhte yn cyihkuh cih.

Ccungccaw balyn tungvaw kya

ka Muisaw ka bu cih;

nae ccapaw hae te

nae ccanung hae nynh

profehbya a ho cih hae,

nae paawpi hae nynh

maan a sah cih hae.

18 Tuin nin kya vae tuh,

ka seenung hae te

ka seepaw hae kya heize

ka Muisaw kha ka bu cih zah

profehbya a ho cih hae.

19 Luki lang vaawlui kya

ngaeangnaw hae kha ka langsah cih zah

akaw lang laephi vawlan chii,

maee te maeekhuh muihsahnaw hae

ka langsah cih.

20 Bawipaw kya-e alesaepaw te

aphu-epaw nin a thua mawkhe

khuanin tuh amoh cih zah

sawpaw tuh chiise lang yn tang cih.

21 Tetuh Bawipaw min

a kopaw miakaw tuh

khum athua cih,’ a ci.

22 Israel ccungccaw hae, ka bya hynh ngaetua oh: naemaw nynh mah na ny oh hawte, Nazareth khuapaw Jesu tuh nanning laku kya Pachia nynh nawccawkhaepaw ccungccaw nynh thua, Pachia nynh amaw liate nanning laku kya ngaeang lan umpaw ryalaw hae, khuaruarunaw hae te muihsahnaw hae kha a langsaku. 23 Pachia kya-e nytynaw te paccyn typaw khuakhannaw thyhte Jesu tuh nae kuih kalan pya athua, nanning nynh na kyng oh zah kawbya zui lei hae paw kuih te vaelantung kya na khiade oh zah phe na chia oh. 24 Thuasalama Pachia nynh chinaw kyate thoosah zah chinaw kyate a luesah vae, pawccecize amaw tuh chinaw huhan nynh kyngde kho khyh. 25 Pawccecize amaw konglang te David nynh a hopaw tuh:

‘Bawipaw tuh ka mitmaevaw kya

tyty a um; aning tuh

ka ranglang khe a um keiccuze

pawpaw nynh mah

yn piasah kho lan khyh.

26 Tukeiccuze ka thinlung tuh

a lungpaw zah ka lae tuh

a lungtua; tuhpiaze ka pyn tuh

ngaehoinaw kya a hiin cih.

27 Pawccecize ka muisaw kha

michi khua kya

na vuasya lan khyh zah,

namaw kya-e Athyaapaw kha mah

na thuhsah lan khyh.

28 Hiinnaw laanpi kha nae nysah vae;

na umnaw kyakhe kae kha

lungtuanaw te phe nae biasah cih,’ a ci.

29 "Uteno hae, aening ah minpaaw David kong hynh ccaerarih lan kae hopya tua oh. David tuh chih zah uu athua; a shawku tuh aening kya atunin cia a um. 30 Aning tuh profeh athua keiccuze a ciihan lu kheit kha a bawitungkhung vawlan dahungsah lan Pachia nynh amaw kya bya a kinpaw kha phe a ny. 31 Hynh-e hynh muihty te, David nynh Messiah thoothuinaw kong kha,

‘Aning tuh michi khua kya

vuasya thua khyh,

a ngesaw mah thuh khyh,’

cite a ho. 32 Hynh-e Jesu hynh Pachia nynh phe thoosah vae, hynh-e konglang kaening balyn tuh ccaekia hae nynh kae thua. 33 Tukeiccuze aning tuh Pachia ranglang khe hangthung thua vae zah, byakinpyakupaw Thyaa Muisaw kha Paaw kyate a mue vae; atu na muih oh zah na thae oh paw hynh-e Thyaa Muisaw hynh ah tungvaw kya phe oun bu vae. 34,35 Pawccecize David tuh vaawlang kae khyh; thuasalama

‘Bawipaw nynh ka Bawipaw kha,

"Na rhaw hae kha na ccusy lang

ka raepya makhia tuh,

ka ranglang khe dahung,"

a cipya,’

cite David nynh a ci. 36 Tukeiccuze vaelantung kya na khiade oh paw Jesu ccaccei kha Pachia nynh Bawi lang te Messiah lang phe a rae vae cipaw kha Israel minphuin balyn nynh ccaerarih lan nyh oh," cite Peter nynh a ci.

37 Hynh-e bya hynh he a thae hae tuh, mih thinlung myarya tung zah Peter te ccangpaw locceihtu hae kha, "Uteno hae, pawmou kae cyih cih?" cite a khia hae. 38 Peter nynh minmin kha, "Nae seinaw ngethya athua nawlan ngaesikuh oh lah, nae balyn te Jesu Khri min te baptisma in oh; tetuh Thyaa Muisaw lasung kha na mue cih oh. 39 Pawccecize Pachia byakin tuh nanning hanlan, nae ccaaw hae hanlan te ah Bawipaw Pachia nynh a ko hae paw laansaw lang um hae paw balyn hanlan nynh thua," a cipya hae. 40 Peter nynh ccangpaw bya patae te ccaekiakhan zah, "E ahoy leipaw ciihan kyate khumnaw muetua oh," cite thawte a hyy hae. 41 A bya kha a lawkuhpaw ccungccaw hae tuh baptisma a in hae; tuin nin kya ccungccaw thong thum loukaw a lungchih hae. 42 Minmin tuh locceihtu hae ccangpyanaw kha ngae hae zah vaeccawkunaw, sanlou mangkheihnaw te sawsangnaw kha po a rae hae.

43 Locceihtu hae nynh ngaeangnaw patae te muihsahnaw hae kha a rae hae keiccuze ccungccaw miakaw tuh rawri sawtuanaw a hoi hae. 44 Zyntu hae balyn tuh pynkheihlan um hae zah pawpaw balyn kha a hoikheih hae. 45 Mih hoipaw te mih uccaw hae kha zua hae zah ccungccaw miakaw kalan ahobou thyhte a nee hae. 46 Minmin tuh beikinn kya nin takyh tungkuh hae zah mih inn kyakhe sanlou iathungkute lungtuate hysahnaw thinlung te mih looh kha leih a aekheih hae. 47 Pachia kha thehoysah hae zah ccungccaw hae balyn malang maehoynaw a mue hae. Bawipaw nynh khumnaw a mue hae paw kha nin takyhte milu a lungsah chih.