1 Minmin ryte kae phiakuh koute sanphalung te kae cceih, lawbabin lan kae cceih zah Kos tuikoih kya kae thua, awkhualan tuh Rhodes tuikoih kya kae thua, te tuin kyate Patara khua kya kae thua. 2 Foenisia ram lang a cceih cih paw sanphalung kha kae muih zah kae ccikuh bua zah kae cceihbua. 3 Saipras tuikoih kha he kae muih tuh, ranglang khe kae maekuh zah Siria ram lang po kae cceih, te sanphalung nynh a phupaw uccaw kha Tair khua kya saw khylan sanphalung tuh tuin khua kya a thadyn. 4 Zuitu hae kha kae muih hae zah tuin kya nin sari kae um; Jerusalem lang a cciathung khyh nawlan minmin nynh Paul kha Muisaw liate a hopya hae. 5 Nin sari he aro te, kae pou zah kae cceih; minmin balyn nynh mih zu mih ccaaw hae ryte khua khunglang cia oun dohaw hae. Rili kin kya ccukharutungte saw kae sang. 6 Lu kheit te lu kheit kae beihkuh sya zah kaening tuh sanphalung vawlan kae kae, te minmin tuh inn lang a ki hae.

7 Tair khua kyate kae tho zah rili kyate cciapaw khuaccongnaw kha he kae thangsah te, Ptolemai khua kya kae thua, tuin kya-e zyntu hae kha kae beih hae zah nin kheit kae umkheih. 8 Awkhualan tuh kae pou zah Sisaria khua kae thua; evangelist lu sari kyaze lu kheit athuapaw Filip inn kya kae thua.✝ 9 Tuh-e paw nynh profehbya ho hae paw, tungtuh loh lei hae paw ccanung lu pali a hoi. 10 Tuin kya nin patae kae um koute Akabus a ci hae paw profeh lu kheit tuh Judea ram kyate yn thua.✝ 11 Kae kalan he yn thua tuh, Paul kya-e taeccia kha lawkuh zah a kuih te a ccu kha heekuh zah, "Thyaa Muisaw nynh hynhte a ho: Hynh-e taeccia a hoipaw ccungccapaw hynh Jerusalem kya Judah hae nynh hynhcite a he cih hae zah Zenta hae kuih kalan a ap cih hae," a ci. 12 Tuh-e bya he kae thae tuh, tuin kya um hae paw te kaening nynh Jerusalem lang a ccia khyh nawlan Paul kha kae soihbia. 13 Paul nynh, "Pawccemou na rah oh zah ka thinlung nae koisah oh? Bawipaw Jesu min hanlan Jerusalem kya khiiku lanpaw kyalya thua leite chi lan heize paccynkute ka um," a ci. 14 Hopya kho a um vae khyh keiccuze, "Bawipaw rynaw thyhte thua vae sah," kae ci zah zya kae dae vae.

15 Tuin kya sosoh kae um koute kae paccynkuh zah Jerusalem lang kae cceihthung. 16 Sisaria khua e zuitu hae abang mah kae kya a cceihbua hae, minmin nynh kaening kae thua cihnaw Mnason inn langkhe oun cciakhae hae, Mnason tuh Saipras paw thua zah a kum tang vae paw zuitu nynh thua.

17 Jerusalem kya he kae thua tuh, zyntu hae nynh lungpawte oun cciadue hae. 18 Awkhualan tuh James kalan paebua lan Paul ryte kae cceih zah Khriccaaw piccan hae balyn a la um hae. 19 Paul nynh minmin kha bya a beih kou hae te, a ryalawnaw liate Pachia nynh Zenta hae laku kya a cyipaw kha ccangkheit koute ccangkheit marya a hopya hae. 20 Minmin nynh tuh-e bya a thae hae tuh, Pachia kha the a hoysah hae. Tukoute Paul kha, "Kae neitaw, Judah hae laku kya zyntu hae thong hohzeih nynh a um hae cipaw kha na ny, minmin balyn tuh Kawbya kha lungthote a thadynkhae hae paw nynh thua hae. 21 Zenta hae kya umbua hae paw Judah hae balyn kyakhe mih ccaaw hae kha vingdungaw ho vae khyh, Judah phung mah zui ho vae khyh cite Moses kawbya vua lan na ccangpya hae cipaw kong kha minmin nynh a thae vae hae. 22 Tukeiccuze pawte cyi lan? Na thua vae cipaw kha minmin nynh solei a thae cih hae. 23 Tukeiccuze kaening nynh kae hopya thyhte cyitua. Byakinkunaw a rae vae hae paw ccungccaw lu pali kae hoi.✝ 24 Minmin kha cciakhae hae lah, minmin ryte ccikankunaw rae oh, mih sang a ngoku ccaw hae amee kha la pyapah hae; tuhte na cyi zetuh ccungccaw balyn nynh na konglang a thae hae paw kha accakaepaw nynh thua cipaw a nyh cih hae zah, namaw mah kawbya na zui zah kawbya thyhte na um cipaw a nyh cih hae. 25 Thuasalama zyntu lang a tang vae hae paw Zenta hae konglang tuh, zohtuh hae kalan silawnaw hae paw looh thuasah, chii thuasah, nging-ote a chia hae paw saw thuasah, nopi pise seinaw thuasah minmin nynh a sungku nawlan hae byapaenaw kae rae zah ccaw kae ky vae hae," cite a hopya hae.✝ 26 Paul nynh tuh-e lu pali hae tuh a cciakhae hae, te awkhualan khe minmin ryte ccikankunaw kha a raekuh hae, tukoute beikinn lungkhu lang tee zah ccikankunaw ccyh athang cih nin kha thuasah, minmin lu raveih hanlan silawkunaw nin kha thuasah ranpibawi kalan a thaesah.

27 Nin sari vyavya he accing te, Asia ram kyate oun thua hae paw Judah hae nynh Paul kha beikinn kya he a muih hae tuh, ccungccaw hae balyn kha hyy hae zah Paul kha a kyng hae. 28 Minmin nynh, "Israel ccungccaw hae, oun bawm oh! E paw tuh hmin takyh kalan cceih zah ah ccungccaw hae kha thuasah, ah Kawbya kha thuasah, hynh-e hmin hynh thuasah rawsete ccungccaw balyn kha a ccangpahpaw nynh thua, tuhpiaze Grik hae kha mah beikinn lungkhu lang teekhae hae zah hynh-e athyaapaw hmin hynh a thusah vae," cite a sia hae. 29 (Pawccecize anulang lyakhe Efesa khuapaw Trofimas kha Paul ryte khualae lungkhu muih hae zah, Paul nynh tuh-e paw tuh beikinn lungkhu lang a teekhae cite a tua hae keiccu nynh thua).✝ 30 Khualae balyn ngaluin-ngaluin accae, ccungccaw hae nynh oun ccue hae zah Paul kha kyng hae zah beikinn atolang khe a sue hae, vaekheihmawte beikinn thuakaw hae kha a khaw hae. 31 Minmin nynh Paul kha chia lan cite a nounuaku lya hae khe, Jerusalem tuh akhuapi mawte byalungnaw a um cipaw kha rhawkaw thong kheit uktupaw rhawbawipaw nynh a thae. 32 Tetuh rhawkaw hae te rhawkaw za kheit uktupaw rhawbawi hae kha arangte ko hae zah zapi hae kha a ccuenua bung hae; minmin nynh rhawbawipaw te rhawkaw hae kha he muih hae tuh, Paul kha bua vae khyh hae. 33 Rhawbawipaw nynh Paul kha ccianua zah a kyng koute sivawrui ccangning te khii lan kaw a pya hae. Tukoute, "Aning tuh hummou? Paw seinaw mou a rae?" cite a khia hae. 34 Ccungccaw zapi laku khe abang nynh ccangte sia hae zah abang nynh ccanglang te a sia hae keiccuze rhawbawipaw nynh ahmepaw ccaccing kha a ny kho khyh keiccuze Paul kha rhawkaw-inn kalan cciakhae lan kaw a pya hae. 35 Ccungccaw zapi hae tuh myarya a puatho hae keiccuze nawkui kya he a thua te, rhawkaw hae nynh Paul kha hang hae zah a cciakhae hae. 36 Pawccecize ccungccaw zapi nynh, "Theih oh!" cite sia hae zah a zuibia hae.

37 Paul kha rhawkaw-inn kalan a teekhae dyn hae khe Paul nynh rhawbawipaw kha, "Bya kae hopya tua ze?" a cipya. Rhawbawipaw nynh, "Grik bya na hothya tou? 38 Nang hynh anulang lyaze rhaw thosah zah damiah thong pali kha ramkaw lang a cciakhaepaw Izip paw kha na thua khyh tou?" cite a khia. 39 Paul nynh, "Kae tuh Silisia ram, Tarsas khua kya a puipaw Judah paw nynh ka thua, a minthaanpaw khuapi kya umpaw nynh ka thua, e ccungccaw hae kalan byahonaw kaw yn pyabua, kae ngiaku," a cipya. 40 Rhawbawipaw nynh kawpya zah Paul tuh nawkui vawlan thadyn zah ccungccaw hae kha a dae nawlan hae a kuih te a tangpya hae. "Daebabi lan khaw cia a um hae te, Paul nynh Hebru bya te ho zah: