1 Bawipaw bya tuh ka kya yn thua zah: 2 Ccungccapaw, na mae kha Jerusalem langkhe hawi lah, beikinnthyaa hae kha rawsenaw bya hotua; Israel ram rawsenawpaw profehbya kha hotua, 3 Bawipaw nynh hynhte a ho cite Israel ram kha hopya tua: Nang kha rawsete ka thaloi kha abu kyate ka thuaakuh cih zah, na kya umpaw miding thuasah, ccungccaw hoyleipaw thuasah parouh mawte ka bae cih hae. 4 Adingpaw te ahoy leipaw na ccungccaw hae kha parouh mawte ka bae lan hae paw athua keiccuze, alia langte palung lang cia ccungccaw balyn kha rawsete ka thaloi tuh abu kyate thuaa athua cih; 5 Bawipaw nynh ka thaloi kha abu kyate a thuaa vae cipaw ccungccaw balyn nynh a nyh cih hae; tuh-e thaloi tuh abu lungkhu lang bua sangthui thua vae lan khyh. 6 Tukeiccuze ccungccapaw, hawkhaeku tua; mih malang khe thinlung koite myarya ngaethyate hawkhaeku tua. 7 Minmin nynh nang kha, "Pawccemou na hawkhaeku?" cite ae khia hae ze, nang nynh minmin kha, "Oun thuapaw thongpang keiccu nynh thua. Ccungccaw miakaw tuh myarya rih cih hae zah, mih kuih tuh a thawzya cih, mih lungroh cih zah mih ccukharu athyngkuh cih. Tuh-e tuh yn thua cih zah yn ccing cih," cite Bawipaw PACHIA nynh a ci.

8 Te Bawipaw bya tuh ka kya yn thua zah: 9 Ccungccapaw, profehbya ho lah, Bawipaw nynh hynhte a ho cite hopya tua hae:

Thaloi, thaloi tuh taw athua vae,

awrarih lan nuih athua vae.

10 Thaloi tuh chianaw khylan

taw athua vae,

khozawlaekuhpaw hawte

phaephae ak lan taw athua vae!

Pawtemou lungtuanaw kha

ah rae kho ung cih oh?

Ccungngue te thuiheinaw balyn kha

pawlang na ria khyh oh.

11 Thaloi kha awrarih lan nuih khylan te

kuih te kyng khylan pya athua vae.

Thaloi kha ccungccaw

a theihtu kuih kya pya khylan

taw thua vae zah awrarih lan

nuih athua vae.

12 Pou ccungccapaw, siaruate rawtua,

pawccecize tuh-e thaloi nynh

ka ccungccaw hae kha a rawse hae;

Israel bawi balyn kha mah a rawse hae;

minmin tuh ka ccungccaw hae ryte

thaloi kalan vua athua hae.

Ezou! cite nae phae kha tuku tua oh!

13 Tuh-e tuh syntawtuanaw nynh thua. Ccungngue kha pawlang na ria khyh oh lanze, tuh-e tuh cyihkuh lan khyh tou? cite Bawipaw PACHIA nynh a ci.

14 Ccungccapaw, profehbya ho lah,

na kuihbia tua.

Thaloi nynh vae ning,

vae thum baetua sah;

tuh-e tuh chianaw lanpaw

thaloi nynh thua.

Ccungccaw patae chianaw hanlan

thaloi thua zah,

minmin kha phang a koihlu hae;

15 tukeiccuze mih lungroh zah,

ccungccaw patae a khuliakuh hae.

Koikua balyn kyakhe

thaloi kha ka nung vae.

Thaloi kha phaephae ak lan rae thua zah,

chia nawlan awrarih lan nuih athua.

16 Na thaloi haw a hawinaw miakaw lang,

voilang ranglang khe baetua!

17 Kae nynh mah ka kuih ka bia cih zah,

ka thinrianaw kha ka daesah cih;

kae, Bawipaw nynh ka ho vae.

18 Ka kalan yn thuapaw Bawipaw bya tuh: 19 Ccungccapaw, Babilon siapharan thaloi nynh a cceih cihnaw laanpi ccangning kha syntawnaw raetua; tuh-e laanpi ccangning mawte ram ramkheit kyate a pou cih hae. Te khuapi kalan a cceihpaw laanpi aphiakunaw kyakhe syntawnawpaw kha raetua; 20 Ammon hae khua Rabbah lang thuasah, Judah ram e sihkakinpaw Jerusalem khua lang thuasah tuh-e thaloi a cceih cihnaw laanpi kha syntawnaw raetua. 21 Pawccecize Babilon siapharan tuh laanpi ccangning aphiakunaw kyakhe ccungthydung khylan a thadyn; the hae kha a thyhleih, terafim khozi kha tuanaw a ngia, saw athin kha a do. 22 Jerusalem cite zeikuhpaw ccungthydungnawpaw the kha a ranglang kuih nynh a kyng, tuh-e the nynh aning kha rhawtuknawpaw zunghe raenua lanpaw, chia khylan siarua lanpaw, rhawtuk khylan siarua lanpaw, koikua te arawsekuh lante rhawtuknawpaw zunghe raenua lanpaw, laephi dohsah lanpaw te rhawvianawpaw innhangpaw hae sak lanpaw kha a hopya. 23 Thuasalama phuring-unaw tuh Jerusalem ccungccaw hae hanlan ahme leipaw phuring-unaw hawte nynh athua; pawccecize minmin nynh atynpaw byakinkunaw kha a rae vae hae; thuasalama siapharan nynh minmin kha kyng khylan mih hoyleinaw kha a syntaw. 24 Tukeiccuze Bawipaw PACHIA nynh hynhte a ho: Nae seinaw kha nae cyisahnaw balyn kya langsaku khylan, nae cyiseinaw kha phykute milae na nysah oh keiccuze milae kuih kya na thua cih oh. 25 Anungsikuhpaw ccungccapaw, Israel uktu bawi,

nyathya detahnaw ccyh nynh

ae thuanua vae.

26 Bawipaw PACHIA nynh hynhte a ho:

Na pungde kha nung lah,

na bawilukhung kha khahku tua;

uccaw hae tuh arulaekuh vae.

Anyaapaw kha hangthungtua lah,

ahangkuhpaw kha nyaasah bung tua.

27 Ronaw, ronaw, ronaw—

tuh-e ronaw tuh ka thuasah cih!

(Tuhcihawpaw tuh cyihkuh boi khyh.)

Tuh-e ronaw a rae cih paw

he yn thua te, tuh-e tuh ka pya cih.

Amaw kha tuh-e khuapi tuh ka pya cih.

28 Ccungccapaw, profehbya ho lah, hopya tua hae, Amon hae te thuasah, mih saryanaw te thuasah asekuh lante Bawipaw PACHIA nynh hynhte a ho:✝

Thaloi, thaloi!

Chia nawlan thuaaku athua,

maemih nawlan,

khozawlaekuhpaw hawte

awrarih lan taw athua.

29 Vizin na muih oh paw tuh

ahme leipaw thua zah,

malang hanlan na hodae

oh paw bya tuh

hynbya nynh thua, nanning tuh

ccungccaw hoyleipaw te

ccungccaw thyapaw

na thua oh zah,

nanning nyathya detahnaw

ccyh tuh yn thua vae.

Thaloi tuh nae nging vawlan accah cih.

30 Thaloi kha abu kalan sangtua oh!

Nanning kha rae na thuanaw oh hmin kya,

na thokeinaw oh ram kyakhe

bya kae pia cih oh.

31 Ka thinrianaw kha

nae tungvaw ka bu cih,

ka thinrianaw maee te

kae mung cih oh.

Mih rysawthah zah

ro a thya hae paw kuih kalan,

kae ap cih oh.

32 Nanning tuh maee hanlan

maeething na thua cih oh,

nae chii tuh laephi kalan a tee cih.

Nanning tuh liathui

na thua vae lan khyh oh,

pawccecize kae, Bawipaw nynh phe ka ho vae.