1 Bawipaw bya tuh ka kya yn thua zah: 2 Ccungccapaw, Tair hanlan rawkhuite um lah, 3 rili kin umpaw khua, rili kin e ram patae kya-e ccungccaw hae nynh kungkunaw hae khua athuapaw Tair kha hopya tua, Bawipaw PACHIA nynh hynhte a ho:

Pou Tair, nang nynh,

"Kae tuh ka puithyanaw

phe ccing," cite na ho vae.

4 Na ramri tuh

rili hae ngaelung nynh a um;

nang ae raetu hae nynh

na puithyanaw kha

phe ccing lan ae rae hae.

5 Senir ram e maeccaw ku hae kha

na thingphe lang a sue hae;

kohlung boei tung rae nawlan

Lebanon ram e sidar ku kha a law hae.

6 Bashan ram e phaesi thing khate

na kohlung zawnawpaw

accong kha a rae hae;

Saipras e maeccaw ku khate

na kohlung suarui kha rae hae zah

saepanua khate a ccaan hae.

7 Na kohlung kya zopaw boei tuh

Izip ram kya-e kou puithya lan

ccaanpaw boei ahoypaw

thua zah, na kohlung kya

asaekuhpaw alan hawte nynh thua;

na kohlung kya adawkuhpaw boei tuh

Elishah tuikoih kyate thuakhaepaw

meizong te sephaphuhpaw nynh thua.

8 Sidon khua te Arvad khua kya

um hae paw tuh

na kohlung a zawtu nynh thua hae;

na kyakhe ryalaw athyapaw

ccungccaw hae um hae zah,

minmin tuh na kohlung

a zawtu nynh thua hae.

9 Gebal piccan hae te

mih kuihhae ahoypaw

kohlung raetu hae tuh

na kya a um hae;

rili kya-e sanphalung balyn te

a zuitu hae tuh

nang te uccaw reku khylan

na kya a um hae.

10 Paras*, Lud* te Put* minphuin hae tuh

na rhawkawphu, athungpaw

na rhawkaw hae kya a umbua hae,

minmin nynh khawriaphua te

lukhung kha ae saepah hae zah,

phu-enaw kha ae pya hae.

11 Arvad hae te na rhawkaw hae nynh

na khualungrua po voilu lan

rhaw ae viapya hae;

Gamad hae nynh

na innhangpaw kyate

rhaw ae viapya hae.

Mih the bawng hae kha

na khualungrua po voilu lan

a baw hae; na puithyanaw kha

phe ccing lan ae raepya hae.

12 Na sisua tuh myaryamaw lung zah, Tarshish khua ryte uccaw reku bungthungnaw kha na rae oh; phua, sivaw, ccephui, kuee kha na kungku kya yn thuakhae zah na rulaeku oh. 13 Javan, Tubal te Meshek hae ryte uccaw kungkunaw kha na raekheih oh; see te sohin angphe hae kha ae zuapya hae. 14 Beth-togarmah hae te nang tuh marang hae, rhawtuknawpaw marang hae te lann hae kha rulaekunaw na rae oh. 15 Rhodes hae ryte uccaw kungkunaw kha na raekheih oh; rili kin e ram hae tuh nang nynh uccaw na zuanaw hmin nynh thua hae; minmin nynh saepanua te thing manpaw kha amee lang nang ae pya hae. 16 Na uccaw alung keiccuze Edom te nang tuh uccaw kungkunaw kha na raekheih oh; lung hinpaw, sephaphuhpaw boeining, kou puithya lan ccaanpaw boeining, ahoypaw boeining, koral lung te patamia lung khate na uccaw kha na rulaeku oh. 17 Judah te Israel ram khate mah uccaw kungkunaw kha na raekheih oh; Minnith kyate apoupaw chanvuih, ccaw, khoitui, chitui te balm phi kha ae zuapya hae. 18 Na sisua aphuinphuin tuh myaryamaw alung keiccuze Damaskas te mah nang tuh uccaw kungkunaw kha na raekheih oh—Helbon misutui te tuuming rawpaw kha ae pya hae. 19 Vedan te Uzal kya-e Javan nynh nang te uccaw kungkunaw a rae hae; sivaw, kassia thing te ccazung epaw kha na re hae. 20 Dedan nynh marang cciku ze dekupaw kha ae zuapya. 21 Arabia ram te Kedar bawi hae balyn tuh tuutaw hae, tuutepaw hae te miaa hae kha kungkunaw na raekheih oh zah hoyte na ccuepeku oh. 22 Sheba te Raamah kya-e kungku hae ryte uccaw kungkunaw kha na raekheih oh; ahoy huaccepaw mynkhuhpaw aphuinphuin, amee rupaw lung te sui kha na rulaeku oh. 23 Haran, Kanneh, Eden, Sheba kungku hae, Asshur te Khilmad hae nynh mah nang te uccaw kungkunaw kha a rae hae. 24 Ahoypaw boeining hae, meizong boeining hae, kou hoy lan ccaanpaw boeining, azong aphuinphuin te ccaanpaw uccaw, khyndadyh lan arui te heedepaw uccaw hae kha kungkunaw na raekheih oh. 25 Tarshish sanphalung hae tuh na uccaw phupyate na kalan oun cceih hae.✝

Tukeiccuze nang tuh

rili ngaelung kya myarya ripaw

phupaw te phe na beih.

26 Kohlung zawtu hae nynh

nang kha rili lungkhu khe

ae cciakhae hae.

Nithua lang e khisan nynh

nang kha rili ngaelung khe

ae ro vae.

27 Na sisua hae, na uccaw hae,

zuathyapaw na uccaw hae,

na kohlung zuitu hae,

na kohlung a zawtu hae te

a raethuitu hae,

na uccaw a zua a retu hae,

na kya umpaw rhawkaw balyn te

na umkheih oh paw

ccungccaw aphu balyn tuh

nang kha ro na thua nin khe

rili ngaelung kya a ccah cih hae.

28 Na kohlung a zawtu hae kya-e

siaruanaw roi keiccuze

anaenaw umpaw

khua hae tuh ahy hae.

29 Kohlung zawtu balyn tuh

mih kohlung hae kyate

atolang a rung hae.

Kohlung a zuitu hae te

a zawtu balyn tuh

varang langkhe thadyn hae zah,

30 nang na hanlan accae lante

rah hae zah thawte a sia hae.

Mih lu vawlan vuiping phingkuh hae zah,

buhhaw kya a toukuh hae;

31 nang na keiccuze

mih sang kha okuh hae zah,

buriboei kha a zingku hae,

nang na hanlan mih thinlung

phe ccih lante thawte a rah a khui hae.

32 Nang na hanlan ngaethyate

rah hae zah:

"Rili ngaelung kya Tair hawte

aroh boi paw hummou a um?

33 Rili laanpi kyate na uccaw hae

he yn thua te, ccungccaw patae kha

mih lungry na ccingsah hae;

myarya lungpaw na sisua te

na zuapaw uccaw hae khate

laephi siapharan hae kha

na hoirumsah hae.

34 Atu tuh tui akhunaw kyakhe

rili khate ro na thua vae;

na zuapaw uccaw hae te

kohlung kya-e na ccungccaw hae tuh

namaw ryte na phungkuh vae oh.

35 Rili kin um hae paw balyn tuh

nang keiccuze a siikuh vae hae;

mih siapharan hae tuh myarya rih hae zah,

mih maesue kya mih rinaw alangkuh.

36 Minphuin patae laku e

kungku hae nynh nang kha

saryanaw roi ae sawnua cih hae;

nang tuh myarya ri lan umpaw

athangnaw kya na thua vae zah,

zungzae na zo vae cih," a ci hae.