1 Bawipaw bya tuh ka kya yn thua zah: 2 Ccungccapaw, Tair uktu bawi kha hopya tua, Bawipaw PACHIA nynh hynhte a ho:

Lysakunaw thinlung na hoi zah,

"Kae tuh pachia nynh ka thua;

rili ngaelung kya,

pachia hae haungnaw kya

ka haung," na ci,

pachia hawte na tuaku zemah

pachia na thua khyh,

ccungccaw nynh na thua.

3 Nang tuh Daniel laeze

na hawhua ccaccing;

nang na malang phei khopaw te

thuruh khopaw um khyh;

4 na hawnaw te na nythyanaw liate

sisua patae na tungku vae,

na sisua bawng lungkhu khe

sui te ngun kha na sueluaku vae.

5 Kungkunaw kya myarya na haw liate

na sisua kha na lungthungsaku vae,

tuh-e na sisua keiccuze

lysakunaw thinlung na hoi vae.

6 Tukeiccuze Bawipaw PACHIA nynh a hopaw tuh:

namaw toulou kha pachia hawte

na tuaku keiccuze

7 minphuin hae kyaze ri lan um huaccepaw

ramccang hae kha kae konua cih hae;

minmin nynh aphutepaw

na hawnaw kha mih thaloi

ae thuaanuakuh cih hae zah,

na lesaenaw kha a thusah cih hae.

8 Nang kha Hunghua lungkhu lang

ae tuu cih hae zah,

rili ngaelung khe

myarya ccihpaw chinaw te

na chih cih.

9 Nang ae theih hae paw kuih kyakhe

nang tuh pachia thua leite,

ccungccaw mang na thua pite,

nang ae theihtu hae malang khe

"Kae tuh pachia nynh

ka thua," cite na ho ung cih tou?

10 Vingdungawkuh lei hae paw nynh

a chi hae hawte,

ramccang hae kuih khate na chih cih;

pawccecize Bawipaw PACHIA nynh,

phe ka ho vae, a ci.

11 Tuhpiaze Bawipaw bya tuh ka kya yn thua zah: 12 Ccungccapaw, Tair siapharan hanlan na ngaethah sah lah, aning kha hopya tua, Bawipaw PACHIA nynh hynhte a ho:

Nang tuh ccingnaw tazeih nynh na thua,

hawnaw te phe na beih zah

na puithyanaw tuh phe accing.

13 Nang tuh Pachia khokhu,

Eden kya na um;

aphutepaw lung

aphuinphuin khate na ccaanku,

tuh-e lung hae tuh patamia, khrisolaih,

awrarihpaw lung, topaz, beryl,

oniks, jasper, nilar lung,

karbankal te emeral lung nynh thua hae;

sui te raepaw uccaw hae kha

na hoi.

Nang kha rae na thua nin khe

khah-e hae kha na hanlan

paccynpya athua vae.

14 Chitui thuh athuapaw cherub kha

nang ae rintu lang kae nungpya;

nang tuh athyaapaw

Pachia mua vawlan khe na um;

phaephae akpaw

lung hae laku khe na cceih.

15 Na pui nin kyate na tungvaw kya

hoyleinaw muih athua mawlaezung

na cyisahnaw tuh ccaenaw um khyh.

16 Na kungkunaw tuh myarya

alung keiccuze puathonaw te

phe na beih zah na sei vae;

tukeiccuze nang kha

athyaa leipaw uccaw hawte

Pachia mua kyate kae vua,

nang ae rintu cherub nynh

phaephae akpaw

lung hae laku kyate

nang kha ccaring ae dee.

17 Na puithya keiccuze

na thinlung tuh alysakuh;

na minthaannaw hanlan

na hawnaw kha na roku.

Nang kha laekhu lang kae vua;

siapharan hae nynh

nang kha dote

mih lungpaw ccaw cite

mih malang khe kae nung.

18 Ahme leipaw kung na kunaw kya

na hoyleinaw alung keiccuze

na beikinnthyaa hae kha na thusah.

Tukeiccuze na lungkhu kya

maee ka tyh zah

nang kha maee te kae u,

nang ae muih hae paw balyn malang khe

laephi vawlan khe

nang kha buhhaw lang kae tangsah.

19 Minphuin hae laku

nang ae nyhpaw balyn tuh

nang keiccuze a siikuh hae;

nang tuh ri lan umpaw

athangnaw kya na thua vae zah,

zungzae na zo vae cih.

20 Bawipaw bya tuh ka kya yn thua zah:✝ 21 Ccungccapaw, Sidon khua langkhe hawi lah, profehbya kha hynhte honua tua, 22 Bawipaw PACHIA nynh hynhte a ho:

Pou Sidon, nang kha kae rawse,

na ngaelung khe

phu-enaw ka mue cih.

Sidon khua kha bya ka pia zah,

ka thyaanaw kha

he ka langsakuh te,

kae tuh Bawipaw

ka thuapaw kha a nyh cih hae;

23 Sidon khua kha

shethya ka sawnua cih zah,

khua lungkhu e laanpi hae kya

chiise ka luasah cih;

khua kha voilute

a rawsepaw thaloi keiccuze

michi hae tuh khua ngaelung khe

a khuliakuh cih hae.

Tetuh minmin nynh kae tuh

Bawipaw ka thuapaw kha

a nyh cih hae.

24 Israel hae nynh minmin a dothatheih hae paw mih innpaw hae balyn kyakhe athuingthyapaw hinpawbu te hinpaw ahepaw kha muih vae lan khyh hae. Te minmin nynh kae tuh Bawipaw PACHIA ka thuapaw kha a nyh cih hae.

25 Bawipaw PACHIA nynh hynhte a ho: Israel hae kha phiariphiarae nung athuanaw minphuin hae kyate he ka suelua hae te, ka ryalahtu Jakob ka pyapaw mimaw laephi kyakhe a um cih hae. 26 Tuin kyakhe khyndadyh lan a um cih hae, inn a sakkuh cih hae zah misu khokhu kha a raekuh cih hae. Minmin kha a la dothatheih hae paw mih innpaw hae balyn tungvaw bya he ka pia hae te, minmin tuh khyndadyh lan a um cih hae. Tetuh kae tuh Bawipaw mih Pachia ka thuapaw kha minmin nynh a nyh cih hae.