Lucas 1

Jesu Pui lanpaw Hotynaw

26 Sawpaw sah taruhnaw lyakhe Pachia nynh vaawpaw Gabriel kha Galilee ram, Nazareth a ci hae paw khua kya umpaw liaccady*1.26 Liaccady: Pise te a ihkheih boi leipaw liaccaw. kalan a saw, 27 tuh-e liaccady tuh David ciihan athuapaw a min Josef a ci hae paw ccungccapaw elang a dypya vae hae paw thua zah a min tuh Mary acikuh.✝1.27: Mat 1.18 28 Vaawpaw nynh tuh-e nung kalan yn thua zah, "Maehoynaw a ccounung, na tungvaw hythuanaw um sah! Bawipaw tuh na kya a um," a cipya. 29 Mary nynh tuh-e bya a thae te, a lungriathae zah, e byabeihnaw hynh pawcihawpaw mou athua cite a tua. 30 Vaawpaw nynh, "Mary, rih nan, pawccecize Pachia nynh nang kha maehoynaw ae pya. 31 Ccaaw na poi cih zah Ccapaw na saah cih, a min tuh Jesu cite na phu cih.✝1.31: Mat 1.21 32 Aning tuh a lesaepaw athua cih zah Ahang Huaccepaw Pachia Ccapaw cite ko athua cih, Bawipaw Pachia nynh amaw tuh a minpaaw David kya-e bawitungkhung kha a pya cih.✝1.32-33: 2Sa 7.12, 13, 16; Isa 9.7 33 Aning nynh Jakob ciihan kha zungzae a uk cih zah a peenaw tuh thang boi lan khyh," a cipya. 34 Mary nynh vaawpaw kha, "Kae tuh liaccady nynh ka thua, pawtemou tuh-e tuh athua kho cih?" a cipya. 35 Vaawpaw nynh, "Thyaa Muisaw tuh na tungvaw yn thua cih zah Ahang Huaccepaw thungnaw tuh na tungvaw yn um cih; Tukeiccuze na saah lanpaw Ccapaw tuh athyaapaw athua cih zah Pachia Ccapaw cite ko athua cih. 36 Dotua, na pui oh paw Elizabeth, a tiinnung a ci hae paw mah a taw vae mawte ccaawpoi zah atu hynh sawpaw sah taruh acih vae. 37 Pawccecize Pachia nynh a cyi kho leipaw pawpaw mah um khyh," a cipya.✝1.37: Gen 18.14 38 Mary nynh, "Kae tuh Bawipaw seenung nynh ka thua, na bya hawte ka tungvaw thua vae sah," a ci. Te vaawpaw tuh Mary kyate phe a cceih.