1 Tukoute Jesu tuh Pachia peenaw kong thehoypaw kha hote khuapi te khua taraw hae kalan khua a ccong. Zuitu hae lu haw lae ning tuh amaw kya a mungkuh bua hae. 2 Ahoy leipaw muisaw bahkunaw te ccihawnaw kyate a dan hae paw nopi hae abang mah a cceihbua hae: raerangsaro hae lu sari a depyapaw Magdalin a ci hae paw Mary,✝ 3 Herod kya-e synriatu Khuza a zu Joanna, Susanna te mih sisua hae khate Jesu te a zuitu hae a bawmtu ccangpaw nopi hae patae a umbua hae.

4 Ccungccaw patae tuh khua takyh kyate Jesu kalan oun thua hae zah he sueluakuh hae tuh Jesu nynh tousenaw phungpaw ccangkheit a hopya hae. A hopaw tuh: 5 "Ccacii vuatu lu kheit tuh a ccacii vua lan a cceih; ccacii kha vua zah abang tuh laanpi kin ccah zah ccu te syde thua zah vaawlang e pavaw hae nynh pong a tuh hae. 6 Abang tuh lung vawlan ccah zah ccahe a po takaw mawte laedahpaw a um khyh keiccu karae arou. 7 Abang tuh hinpaw hae laku ccah zah hinpaw hae ryte a pokheih hae, te hinpaw hae nynh lethin hae zah phang a lungde hae. 8 Abang tuh lae hoy kya ccah zah a po, te leit za kheit athae a thae," a ci. E kong he a ho koute, "Thaenaw nakaring a hoipaw miakaw tuh thae sah!" cite a sia.

9 A zuitu hae nynh, "E tousenaw phungpaw asuilan tuh pawmou?" cite Jesu kha a khia hae. 10 Jesu nynh, "Pachia peenaw kya-e byakhupaw kha ny lan pya na thua oh; thuasalama mingccang hae tuh,

‘mang muih hae zah nyh khyh hae,

mang thae hae zah thaethya khyh hae,’

tukeiccuze tousenaw phungpaw te hopya athua.✝

11 "Tousenaw phungpaw tuh hynhte nynh thua: Ccacii tuh Pachia bya nynh thua. 12 Laanpi kin a ccah hae paw tuh, Pachia bya a thaetu hae nynh thua; minmin nynh a zyn khyh nawlan hae te khumnaw a mue khyh nawlan hae cite Satan nynh yn cceih zah mih thinlung kya-e Pachia bya kha phe a lawpya hae. 13 Lung vawlan a ccah hae paw tuh, Pachia bya kha he a thae hae te lungtuate a lawkuh hae paw nynh thua, thuasalama tharui hoi khyh hae, sosoh kyalya zyn hae zah tuhounaw nynh yn thuanua hae tuh phe a khuliakuh hae. 14 Hinpaw laku a ccah hae paw tuh, Pachia bya kha a thae kou hae te cceih hae zah lungvawsawnaw, hoirumnaw te pynsaw hoysahnaw hae nynh varyng ve hae zah mih thae thae kho vae khyh hae. 15 Thuasalama lae hoy kya a ccah hae paw tuh, Pachia bya kha he a thae hae te, athyaapaw te ahoypaw thinlung khate tynkaring lan ccykekuh hae zah lungsaenaw te athae thae hae paw kha nynh thua.

16 "Humhung nynh mah maeekhua kha aw zah kee te khong boi khyh, ikhung kaw lang mah nung khyh, oun tee hae paw nynh awnaw kha a muih ccaw hae cite maee awnawpaw vawlan nynh a khang.✝ 17 Pawccecize alangkuh lei lante thuruhpaw miakaw kha langsah athua cih zah, khongpaw miakaw kha hungpya athua cih.✝ 18 Tukeiccuze pawtemou na thae oh cipaw raeringkuh oh, pawccecize a hoipaw ccungccaw tuh pyachih athua cih zah, a hoi leipaw ccungccaw nynh beihtaraw ka hoi cite a tuakupaw kha heize lawpya athua cih," bua a ci.✝

19 A nung te a neitaw hae nynh Jesu kalan oun cceih hae zah ccungccaw eih alung keiccuze a kalan naekuh kho khyh hae. 20 "Na nung te na neitawpaw hae nynh nang kha ae tungkuh ry hae zah atolang nynh a thadyn hae," cite a hopya hae. 21 Jesu nynh minmin kha, "Pachia bya kha thae hae zah a zui hae paw tuh ka nung te ka neitaw hae nynh thua hae," a cipya hae.

22 Nin kheit tuh Jesu nynh a zuitu hae ryte kohlung lungkhu lang tee hae zah minmin kha, "Tuili khuraw lang khuin zua oh sih," cipah hae zah kohlung te a cceih hae. 23 A ccia lya hae khe Jesu tuh a ih. Tuili kyakhe khise yn tho zah kohlung tuh tui phe a bia keiccuze minmin tuh vawsaw a tung hae. 24 Zuitu hae nynh amaw kha ccianuate tho hae zah, "Bawipaw, Bawipaw, aening ah chih vae cih oh!" cite a hopya hae. Jesu nynh thokuh zah khise te tuileih athopaw tuh kaw a pya; tuileih te khise tuh daebabi lan zya adae vae. 25 Jesu nynh minmin kha, "Nae zynnaw tuh pawkyamou?" a cipya hae. Minmin tuh rih hae zah mih ngaeangthua; "E paw hynh pawtecihpaw ccungccaw mou! Khise te tuileih kha heize kawpya zah minmin nynh a kaw a ngae hae!" cite lu kheit te lu kheit a hoku hae.

26 Minmin tuh Galilee ram te arawsekuhpaw Garasene ram lang a thua hae. 27 Jesu tuh varang lang a zua koute tuin khua e ccungccapaw, raerangsaro a bahkuhpaw nynh yn tungku. Aning tuh ccyh hynhsepi cia angki kiku leite, innvaw mah um leite, shawku kya leih umpaw nynh thua. 28 Jesu kha he a muih tuh, a malang khe bakhung zah, "Ahang Huaccepaw Pachia Ccapaw Jesu, nang te kae tuh pawmou ah sekuh? Kae hynh vawsaw nae pya khyh nawlan kae ngiaku," cite thawte a sia. 29 Pawccecize Jesu nynh athyaa leipaw muisaw kha tuh-e paw kyate pou lan kaw phe a pya vae. Pawccecize tuh-e muisaw nynh amaw kha avae patae a la kyng; sivawrui te ccukhiinawpaw te khii hae zah khia kya a nung hae; thuasalama aning nynh a khiinaw hae paw kha thoh pae zah raerangsaro nynh ramkaw langkhe leih a dee. 30 Jesu nynh, "Na min hummou?" cite a khia. Aning nynh, "Legion," a ci; pawccecize raerangsaro hae patae tuh amaw lungkhu lang a tee hae keiccu nynh thua. 31 Raerangsaro hae nynh Jesu kha, "Akhupaw laekarung kalan beih oun sah nan," cite a ngiaku hae.

32 Tuin pe mua vawlan khe rampaeekuh hae paw voh hae tuh aphupi te a um hae, te minmin nynh tuh-e hae lungkhu lang tee lan kaw a ua nawlan hae ngiakuh hae zah Jesu nynh kaw a ua hae. 33 Raerangsaro hae tuh ccungccapaw kyate pou hae zah voh hae lungkhu lang a tee hae; te voh phu tuh apannaw kyate tuili lungkhu lang thawmawte ccuebung hae zah pong a phungkuh hae.

34 Voh a rintu hae nynh tuh-e acyihkuhpaw tuh he a muih hae te, ccue hae zah tuh-e kong tuh khuapi te khua taraw hae kya a ho hae. 35 Ccungccaw hae nynh acyihkuhpaw kha do khylan oun cceih hae zah Jesu kalan oun thua hae, te a kyate raerangsaro hae a poupaw ccungccapaw tuh Jesu cculeihpaw khe haung zah boeining lawkute a lung akyhpaw kha a muih hae tuh a rih hae. 36 Raerangsaro bahkuhpaw ccungccapaw tuh pawcihte nynh a dan cipaw a muihpaw ccungccaw hae nynh oun thua hae paw kha a hopya bua hae. 37 Garasene ram kya um hae paw ccungccaw zapi balyn nynh eih rih kaesy hae zah mih kyate a pou nawlan Jesu kha a ngia hae; tukeiccuze Jesu tuh kohlung lungkhu lang tee zah phe a ki. 38 Raerangsaro nynh a poutawpaw ccungccapaw nynh Jesu kya umbua lan a ngiaku. Thuasalama Jesu nynh, 39 "Na inn lang la ki lah Pachia nynh na hanlan ae cyipyapaw kong kha la ho," cipah zah a kisah. Aning nynh cceih zah Jesu nynh a hanlan a cyipyapaw kong kha khuapi po lekuh lan a hopya hae.

40 Jesu tuh he a ki te, ccungccaw zapi nynh a cciadue hae, pawccecize minmin nynh amaw kha a ngaw hae keiccu nynh thua. 41 Sinakok uktu Jairas a ci hae paw nynh yn thua zah Jesu cculeihpaw khe bakhung zah a inn lang ccia lan a ngia.

42 Pawccecize aning nynh kum haw lae ning loukaw acih vae paw, ccanung lu kheit kyalya hoi zah tuh-e nung tuh vyavya a chih. Jesu a ccia lyakhe ccungccaw hae nynh phang a lungnuaku hae. 43 Kum haw lae ning cia chiilua ccinaw a hoinung lu kheit a um, aning nynh a hoipaw balyn kha sibawi hae kya marya thangkuh salamah humhung nynh mah dansah kho khyh. 44 Jesu nulang te yn naekuh zah a boei dung kha zya a hae; tetuh vaekheihmawte a chii luapaw tuh phe akan. 45 Jesu nynh, "Hummou yn hae?" cite a khia hae. Ccungccaw hae balyn nynh kae nyh khyh he a ci hae tuh Peter nynh, "Bawipaw, ccungccaw zapi nynh ae koihlu hae zah ae eihsei hae paw ngawrei," cite a hopya. 46 Jesu nynh, "Lukhakheit nynh yn hae, pawccecize ka kyate huhan a poupaw kha ka ny," a ci. 47 Nopinung nynh ka pheikuh kho vae lan khyh cipaw he a nyh tuh thyngkute cceih zah Jesu malang khe bakhung zah paw keiccu nynh ka hae cipaw te vaekheihmawte phe a dannawpaw kong kha ccungccaw balyn malang khe a hopya. 48 Jesu nynh, "Ka ccanung, na zynnaw nynh ae dansah vae, ngaengante la cceih ccavae," a cipya.

49 Tuhte a ho cciamang lyakhe sinakok uktupaw inn kyate ccungccaw lu kheit yn thua zah Jairas kha, "Na ccanung phe chih vae, sazaepaw kha vawsaw pya nan vae," a cipya. 50 Jesu nynh tuh-e tuh he a thae te Jairas kha, "Rih nan, zyn kyalya zyn lah na ccanung tuh a dan cih," cite a hopya. 51 Inn kya he a thua te Peter, James te Johan, te imuanung a nung te a paaw laelan hum sanmah inn lungkhu lang tee lan Jesu nynh ua khyh hae. 52 Ccungccaw hae balyn tuh a rah a khui hae; thuasalama Jesu nynh, "Rah nan oh, imuanung tuh chih khyh, a ihpaw nynh thua," a cipya hae. 53 A chih cipaw phe ny hae paw thua zah minmin nynh Jesu kha a nuinse hae. 54 Jesu nynh imuanung kha a kuih te kyng zah, "Imuanung, thokuh!" a cipya. 55 A hiinnaw tuh yn kithui zah, vaekheihmawte po yn thokuh. Te Jesu nynh aepaw pya oh cite kaw a pya hae. 56 A paaw te a nung tuh mih ngaeangthua, Jesu nynh tuh-e acyihkuhpaw kong tuh humhung kya mah la ho nan oh cite kaw a pya hae.