1 Mih ikhung vawlan khe

ahoy leipaw cyisahnaw kong kha

khua a khankuh hae paw hanlan

ngaethya lan kou um!

Khua he yn dae tuh,

ccyhhoy he a mue hae te,

tuh-e tuh a cyi hae.

2 Milae loo kha duaa hae zah

a luade hae; inn kha

a duaa hae ze, a lawpyaku hae;

inn te innbyn hae kha thuasah,

ccungccaw hae te

mih rho kha thuasah luadete

a tuaa a sah hae.

3 Tukeiccuze Bawipaw nynh hynhte a ho:

E innbyn hae hynh rawsete

hoyleinaw kha ka paccyn cih zah,

tuh-e hoyleinaw kyate

nae nging na hang kho lan khyh oh;

lysakute na cceih kho lan khyh oh,

pawccecize tuh-e ccyh tuh

ccyh thyapaw athua cih.

4 Tuin nin vae tuh,

ccungccaw hae nynh

nae konglang hynh

ronaw tousenawpaw lang

a mang cih hae zah,

ngaethyanaw hlaw kha a sah cih hae,

"Kaening tuh khaleih ro kae thua vae;

Bawipaw nynh kae ram kha a law vae;

kaening oun kyng hae zah

oun cciakhaetu hae kalan

a pya vae hae," a ci cih hae.

5 Tukeiccuze ram kha

Bawipaw ccungccaw hae kalan

ccungthydungte he a neekuh hae te,

nanning lu kheit sanmah

neebua na thua lan khyh oh.

6 Ccungccaw hae nynh,

"Profehbya oun hopah nan,

tuhcihawpaw kong tuh ho nan,

Pachia nynh thethyanaw

oun ccousah lan khyh," a ci hae.

7 Pou Jakob ciihan hae,

Bawipaw kya-e

ngaesangnaw tuh phe thang vae tou?

E hae hynh aning nynh

a cyipaw athua tou?

Hmerarih lan a hiinpaw kha

ka bya nynh hoynaw pya leite

a um zawtou? cite

byakhia lan accan zawtou?

8 Thuasalama nanning nynh

ka ccungccaw hae kha

rhaw hae hawte na rhaw oh zah

na thonuaku oh;

rhawtuknaw kyate oun ki hae zah,

daebabi lan a um hae paw kha

mih angkiccua na khahpyaku oh.

9 Ka ccungccaw hae kya-e nopi hae kha

mih lungryccingnaw

mih inn kyate na dee oh zah,

mih ccaaw taraw hae kyate

ka phu-enaw kha na law zungzae oh.

10 Tho oh lah cciatua oh;

e ram hynh adaenaw hmin thua vae khyh,

nungsikunaw keiccuze

thinlungcci lan umpaw

ronaw khate aroh cih.

11 Cceih bungthung zah

accakaepaw hynbya

a hopaw lukhakheit nynh,

"Misutui te ruimangpaw

niapaw kong kha profehbya

kae hopah cih oh," cite a ho lanze,

tuh-e ccungccaw tuh

hynh-e ccungccaw hae hanlan

profeh athua cih!

12 Pou Jakob ciihan hae,

nanning balyn kha solei

kae suelua cih oh,

a hiinhypaw Israel hae kha

ka suelua cih hae; tuukhia kya-e

tuu hae hawte thuasah,

rampaeekunaw kya

a umpaw tuuphu hawte thuasah

minmin kha pynkheihlan

ka suelua cih hae;

mih ram kya ccungccaw hae

roi tuh myarya accae cih.

13 Laanpi a hungtupaw tuh

mih malang a cceih cih;

minmin nynh koikua kha

a khya cih hae zah,

tuin kyate a pou cih hae.

Mih siapharan tuh

mih malang khe a cceih cih,

Bawipaw nynh mih malang te

a cciakhae cih hae.