1 Te kae nynh ka ho:

Nanning Jakob ciihan

cciakhaetu hae te

Israel ciihan uktu hae, ngaetua oh!

Dingnaw kha na ny lan oh

ccan khyh tou?—

2 Hoynaw kha na hua oh zah

hoyleinaw kha na ry oh,

ka ccungccaw hae ving kha

na lae oh zah, mih ru kya-e

mih ngesaw kha na louh oh;

3 ka ccungccaw hae saw kha

na ae oh zah, mih ving kha

na lae oh, mih ru kha

zoihtatyh lan na khya oh zah,

ang lungkhu kya umpaw

sange awkuhpaw hawte,

na aw oh.

4 Tetuh minmin nynh

Bawipaw kalan a sia cih hae,

thuasalama ngaepah lan khyh hae;

minmin nynh hoyleinaw kha

a rae hae keiccuze

tuin ccyh kya tuh a mae kha

a retawkuh cih hae.

5 Ka ccungccaw hae kha

cciakhaesei hae zah

ae lanpaw a hoi ccyh hae khe,

"Daenaw a um cih," cite sia hae zah,

mih khalang lungkhu lang

paw sanmah a baw lei hae paw kya tuh

rhaw atho cih cite a hothya hae paw

profeh hae konglang kha

Bawipaw nynh hynhte a ho.

6 Tukeiccuze vizin muih leite

nae hanlan khua azi cih,

byaphy kha ho leite

nae hanlan amoh cih.

Profeh hae hanlan khuanin accah cih zah,

minmin hanlan khuadae ccyh tuh amoh cih;

7 hodaetu hae tuh mih thethah cih zah,

a pawe hae paw tuh

maethyanaw a mue cih hae;

Pachia nynh a khungru khyh hae keiccuze

mih balynte mih khalang

a huhkuh cih hae.

8 Thuasalama kae tuh, Jakob kha

a seimenaw hopya khylan te

Israel kha a seinaw hopya khylan

huhan te thuasah,

Bawipaw muisaw te thuasah,

byading te thungnaw te thuasah

phe ka beih.

9 Byading kha hua hae zah

dingnaw balyn kha a paleih hae paw,

Jakob ciihan uktu hae nanning te

Israel ciihan lupi hae nanning,

e bya hynh ngaetua oh!

10 Chiise luasahnaw khate

Zion khuapi kha na rae oh zah,

dingleinaw khate

Jerusalem khuapi kha na rae oh!

11 Khuapi a uktu hae nynh

pyaruh kha mue khylan

bya a pia hae, ranpibawi hae nynh

amee mue khylan a ccangpya hae,

profeh hae nynh phua mue khylan

malang ccyh hanlan a hodae hae;

tuhzemah minmin nynh

Bawipaw kha ngeikute,

"Bawipaw tuh aening kya

a um ccaccing!

Ah tungvaw vawsawnaw

ccah lan khyh," a ci hae.

12 Tukeiccu tuh, nanning keiccuze

Zion kha lei hawte thue athua cih zah,

Jerusalem tuh arohpaw

apumkuhpaw lang a tang cih,

beikinn a umnaw mua tuh

tuhpi lang a tang cih.✝