1 Malang ccyh kya Bawipaw inn

a umnaw mua tuh mua hae kyaze

ahang huaccepaw lante

thadynsah athua cih zah,

sangpyng hae luki lang hangthung athua cih.

Ccungccaw hae tuh tuh-e mua langkhe

oun thua cih hae,

2 minphuin patae tuh oun thua cih hae zah:

"Rang oh, Bawipaw mua lang,

Jakob Pachia inn lang

kaethung oh sih;

aning nynh a laanpi kha

oun ccangpah cih zah,

aening nynh a ccunoh kha

ah zui cih oh," cite a ho cih hae.

Pawccecize ccangpyanaw tuh

Zion kyate yn pou cih zah,

Bawipaw bya tuh

Jerusalem kyate yn pou cih.

3 Aning nynh minphuin patae kha

bya a pia cih hae zah,✝

asawnaw um hae paw

minphuin athung hae paw kha

a hopia cih hae.

Minmin nynh mih thaloi hae kha

thetamuin lang a suh cih hae zah,

mih ccoi hae kha rungkou lang

a suh cih hae;

minphuin phuin kheit te

phuin kheit nynh thaloi

hangnuakuh vae lan khyh hae zah,

rhawtuk thyanaw kha

ccangkuh vae lan khyh hae;

4 ccungccaw balyn nynh

mih misu ku te

mih thaeku ku kaw khe

a haung cih hae zah,

humhung nynh mah

rinaw pya vae lan khyh hae;✝

pawccecize vaaw Bawipaw nynh

phe a ho vae.

5 Ccungccaw balyn tuh

mimaw mih pachia min raveih kha

a beik hae, thuasalama aening tuh

Bawipaw ah Pachia min kha

zungzae ah beik cih oh.

6 Bawipaw nynh a hopaw tuh,

tuin nin vae tuh,

mih ccukhou hae paw kha

ka pum cih hae zah,

dee athua hae paw te vawsaw

ka teingsah hae paw kha ka suelua cih hae.

7 Mih ccukhou hae paw kha

a laehypaw lang ka rae cih hae zah,

vua athua hae paw kha

athungpaw minphuin lang

ka rae cih hae;

Bawipaw nynh minmin kha

Zion Mua kyakhe

atu te zungzae cia a uk cih hae.

8 Pou tuuphu hae kya-e rhawviainn,

Zion ccanung kya-e sangpyng,

langmawlya e uknaw kaw,

ccanung Jerusalem kya-e

kawhoinaw kha

nang nynh na muethui cih.

9 Pawccemou atu thawte na raw?

Na kya siapharan um khyh tou?

Tuanaw ae pyatupaw tuh a chih vae tou?

Neitangia accihpaw nopi hawte,

pawccemou na teing?

10 Pou Zion ccanung,

neitangia a ccihpaw nopi hawte

teingte hawkhaeku tua;

pawccecize atu khuapi kyate

na pou cih zah

ramkaw kya ryahmin na tahkuh cih;

Babilon lang na cceih cih.

Tuin kyakhe luesah na thua cih zah,

Bawipaw nynh na rhaw hae kuih kyate

ae shawkhaw cih.

11 Atu minphuin patae nynh rawsete

ae pumnuakuh hae zah,

"Zion tuh nungsikuh sah,

aning tungvaw khe

kae mit lungtua sah," a ci hae.

12 Thuasalama minmin nynh

Bawipaw tuanaw kha

nyh khyh hae; a paccynnaw kha

thaethya khyh hae,

loohcce hae kha huimin kya

a suelua hae hawte

minmin kha a suelua vae hae.

13 Pou Zion ccanung, thokuh lah,

loohcce hae kha tintua hae,

na ki kha sivaw te ka rae cih zah,

na ccukoh hae kha

sohin te ka rae cih,

minphuin patae kha

zoihtatyh lan na pae cih hae,

minmin nynh a mue hae paw

uccaw hae kha Bawipaw kalan

na pya cih,

mih sisua kha laephi pynpi

a uktu Bawipaw kha na pya cih.