10 Milagres de Jesus na Bíblia: Lista com versículos e explicação

Isusul Alãxi Apa tu Yin

1 Sh-tu dzua a treia s-featsi unã numtã tu Cana a Galileiljei, shi muma al Isus eara aclo. 2 Isusul cu ucenitsilji a lui eara acljimat la numtã. 3 Cum bitisi yinlu, muma al Isus lji dzãsi a lui: "Elji nu au ma yin." 4 Isusul lji-dzãsi: "Ts-ai cu mini, muljeari? Oara a mea nu ari vinitã ninga." 5 Muma a lui lã dzãsi a huzmichearilor: "Fãtsets itsido tsi elu vã dzãtsi!" 6 Shi aclo eara bãgati shasi vasi di cheatrã, tsi s-ufilisea trã curarea a Iudeilor, shi cathiun ncãpea cãti optudzãts pãnã unã sutã shi yinghits di litri. 7 Isusul lã dzãsi: "Umplets vasili cu apã." Sh-elji li umplurã pãnã nsus. 8 Deapoea lã dzãsi: "Scutets tora sh-dutsets-lji a protlui a sãrbãtoariljei." Sh-elji lji dusirã. 9 Protlu a sãrbãtoariljei u-bãgã n-gurã apa adratã tu yin, elu nu shtia cã di iu yinea yinlu, ma shtia huzmichearlji tsi u-avea scoasã apa. Atumtsea protlu a sãrbãtoariljei acljimã dzinirli, 10 shi lj-dzãsi: "Cathi om scoati ma nãinti yinlu atsel bunlu, shi cãndu acljimatslji au biutã ghini, scoati yinlu atsel-slablu, tini fãtseshi aljumtrea, lu ai tsinutã yinlu atsel-bunlu pãnã tora." 11 Isusul featsi aestã apãrnjitã a seamnilor tu Cana a Galileiljei shi aspusi mãrirea a lui, shi ucenitsilji a lui pistipsirã la nãsu.

Isusul Vindicã un Om Amintat Orbu

1 Cãndu Isusul ma tritsea, elu vidzu un om tsi eara orbu di cãndu eara amintat. 2 Ucenitsilji a lui lu ntribarã: "Rabbi, cai ari amãrtisit, aestu icã pãrintsãlji a lui, tsi elu s-ari amintat orbu?" 3 Isusul apãndisi: "Nitsi aestu nu ari amãrtisit, nitsi pãrintsãlji a lui, ma aestã s-featsi tsi la elu si aspunã faptili a Dumnidzãlui. 4 Noi prindi s-fãtsem faptili atsilui tsi mi ari pitricut pãnã cãndu easti dzuã. Noaptea ma yini, sh-vãrã nu poati s-lucreadzã. 5 Pãnã cãndu mini escu tu lumi, escu lunjina trã lumea." 6 Dupã tsi li avea dzãsã aesti, scuche mpadi sh-featsi muzgã sh-deapoea aumsi ocljilji a orbului cu muzgã. 7 Deapoea lji dzãsi: "Du-ti, aspeal-ti la ascãldãtoarea al Shiloam" (tsi va s-dzãc "Pitricut"). Elu s-dusi, s-aspilã shi s-turnã vidzãnda. 8 Atumtsea vitsinjlji sh-atselji tsi ma nãinti lu avea vidzut cã eara orbu sh-cãfta, dzãsirã: "Nu easti aestu atsel tsi shidea mpadi sh-cãfta cu mãna teasã?" 9 Niscãntsã dzãtsea: "Elu easti." Ma altsãlji dzãtsea: "Lj-undzeashti a lui." Elu dzãtsea: "Mini escu." 10 Atumtsea elji lu ntribarã: "Cum tsã si discljisirã ocljilji?" 11 Elu apãndisi: "Un om, tsi s-acljima Isus, featsi muzgã, nji-li aumsi ocljilji shi-nji dzãsi: ‘Duti la ascãldãtoarea al Shiloam shi aspealã-ti!’ Sh-mi dush aclo, mi aspilai sh-nji-si turnã lunjina a ocljilor." 12 Shi elji lu ntribarã: "Iu easti atsel?" Elu apãndisi: "Nu shtiu."

Multsirea di Prota a Pãnjilor

13 Cãndu Isusul li avdzã aesti, s-nchisi di-aclo cu unã varcã shi s-dusi singur tu un loc ermu, sh-multsãmea cãndu avdzã s-dusi dupã nãsu pri cicioari dit cãsãbadz. 14 Sh-Isusul, cãndu ishi dit varcã, vidzu unã multsãmi mari, avu njilã trã elji sh-vindicã lãndzitslji a lor. 15 Deapoea cãtrã seara ucenitsilji a lui s-apruchearã di nãsu sh-lji dzãsirã: "Aestu loc easti ermu sh-oara tricu. Alasã multsãmea s-ducã prit hoari shi s-acumpãrã trã mãcari." 16 Isusul lã dzãsi a lor: "Nu easti ananghi s-ducã. Dats-lã voi s-mãcã!" 17 Sh-elji lji dzãsirã: "Noi aoa nu avem altã tsiva dicãt tsintsi pãnji sh-doi peshti." 18 Sh-elu lã dzãsi: "Adutsets-li aoa la mini." 19 Atumtsea lã ordinã multsãnjili s-sheadã mpadi pri iarbã. Deapoea lo tsintsi pãnjili sh-doi peshtili sh-dupã tsi sculã ocljilji cãtrã tser, li ghinicuvãntã, li frãmsi pãnjili sh-li deadi a ucenitsilor, sh-ucenitsilji a multsãnjilor. 20 Sh-tuts mãcarã shi s-fãnãtirã. Deapoea ucenitsilji adunarã bucãtsili tsi armasirã sh-umplurã doisprãdzatsi di coshuri mplini. 21 Sh-atselji tsi mãcarã eara anvãrliga di tsintsi njilji di bãrbats, ni misurat muljerili sh-cilimenjlji.

Isusul shi Furtuna

35 Tu seara a dzuãljei aishtei, lã dzãsi a lor: "Tritsem pri alantã parti." 36 Sh-ucenitsilji, cum u nchisirã multsãmea, lu loarã Isusul ashã cum eara tu varcã. Cu nãsu eara sh-niscãnti vãrtsi njitsi. 37 Tu oarã aestã s-featsi unã furtunã mari shi vãljurili s-plãscãnea pri varcã ahãntã multã cãt ea ma s-umplea. 38 Iarã elu durnjea tu varcã pri un cãpitinj, elji lu dishtiptarã shi lji dzãsirã: "Nvitsãtore nu ai mirachi trã noi cã ma ni nicãm?" 39 Sh-elu cum si dishtiptã lji aurlã a vimtului sh-lji gãri ali amari: "Tãtsi shi pãpsea!" Shi vimtul pãpsi shi s-featsi tãtseari mari. 40 Sh-lã dzãsi a lor: "Cãtse hits fricoshi? Cum nu avets pisti?" 41 Sh-elji lji acãtsã unã fricã mari shi dzãtsea cu un-alantu: "Cai easti aestu tsi lu ascultã sh-vimtul sh-amarea?"

25 Namisa di nãshi eara unã muljeari tsi lj-cura sãndzili di doisprãdzatsi di anji. 26 Sh-avea traptã multi di partea a doctorlor sh-avea chirutã tutã avearea a ljei ni fãrã di ufelii, sh-ma s-fãtsea ma arãu. 27 Cãndu avdzã si zbura di Isusul, intrã la multsãmea sh-di pri dupã plãtãri timsi mãna la stranjilu al Isus. 28 Ea dzãtsea: "Macã va bagã mãna la stranjili a lui, va mi vindicã." 29 Sh-trãoarã curarea a sãndzilui pãpsi shi ea sãmtsã tu truplu a ljei cã s-vindicã di atsea lãngoari. 30 Ma trãoarã Isusul sãmtsã un puteari tsi avea ishit di la nãsu, s-turnã cãtrã multsãmea sh-dzãsi: "Cai deadi di stranjili a meali?" 31 Sh-ucenitsilji a lui lji-dzãsirã: "Nu vedz cã multsãmea ma s-pindzi di tuti pãrtsãli shi tini dzãtsi: ‘Cai deadi di mini?’" 32 Elu mutrea anvãrliga s-videa cai u featsi aestã. 33 Atumtsea, muljearea mplinã di fricã sh-trimurãnda, cã shtia tsi avea pãtsãtã, vini sh-lji cãdzu pri cicioari sh-lji aspusi tutã alihea. 34 Sh-elu lj-dzãsi: "Hilje, pistea a ta ti-vindicã, imnã tu pace cã eshti vindicatã di lãngoarea a ta!"

Demonizatul Gadarean

1 Ashã agiumsirã tu alantã parti a amariljei tu locurili a Gherasenjilor. 2 Shi macãt Isusul dipunã dit varcã, trãoarã lji ishi nãinti dit murmintsã* un om umplut cu un duh nicurat, 3 elu bãna tu murmintsã sh-vãrã nu avea putut s-lu liga cu singir. 4 Di multi ori lu avea ligatã cu prãnghi shi singir, ma elu totãna frãndzea singirili sh-arupea prãnghili, sh-nitsiunu nu putea s-lu imireadzã. 5 Dipriunã noaptea sh-dzua, prit murmintsã sh-prit muntsã, tritsea aurlãnda shi tãljãnda truplu a lui cu chetri. 6 Cãndu elu lu vidzu Isusul di diparti, imnã shi s-ncljinã nãintea a lui. 7 Sh-cu unã aurlari mari dzãsi: "Tsi ari namisa di mini sh-di tini, Isus, Hiljilu al Dumnidzãu atsel multu analtu? Mini mi spigiurã pri numa al Dumnidzãu, nu mi munduea!" 8 Cã Isusul lji-avea dzãsã: "Duh nicurat, eshi dit aestu om!" 9 Atumtsea Isusul lu ntribã: "Cai easti numa a ta?" Shi elu apãndisi dzãcãnda: "Mini mi acljeamã Leghion, cã him multsã." 10 Sh-multu lji fãtsea rigeai tra s-nu lu aĝuneascã dit loclu atsel. 11 Aclo la coasta a muntilui eara unã cupii mari di portsi tsi pãshtea. 12 Atumtsea tuts demonjlji s-rugarã dzãcãndã: "Pitreatsi-nã la portsi tra s-intrãm tu nãshi." 13 Sh-Isusul trãoarã lã deadi volje a lor, sh-duhurili nicurati dupã tsi ishirã, intrarã la portslji, sh-cupia s-arcã nghios di tu ripã tu amari. Era aproapi doauã njilji di capiti tsi s-nicarã tu amari.

14 Atselji tsi pãshtea portslji fudzirã sh-u scurpisirã hãbarea tu cãsãbã sh-pri hoari. Sh-oaminjlji vinirã s-videa tsi avea undzitã. 15 Cãndu vinirã la Isusul, vidzurã demonizatlu mpadi, nviscut sh-cu mintea ntreag, atsel tsi avea leghionlu, shi avurã fricã. 16 Atselji tsi lu avea vidzutã, lji spusirã a lor cã tsi lji avea undzitã a demonizatlui shi a portsilor. 17 Atumtsea atselji ahurhirã s-lji fac rigeai al Isus s-fugã di sinurili a lor. 18 Cãndu elu ma intra tu varcã, atsel tsi eara demonizat lji si ruga tra s-putea s fudzea cu nãsu. 19 Ma Isusul nu lji deadi volje, sh-lji dzãsi: "Imnã la casa a ta, la-a tãlji shi aspunã a-lor tsi lucri mãri featsi Domnul shi cum ti njilui." 20 Sh-elu fudzi shi ahurhi s-predica pri locurili di Decapolis trã tuti atseali tsi avea faptã Isusul shi tuts s-ciudisirã.

Muljearea cu Curarea a Sãndzilui

21 Shi cãndu Isusul tricu nãpoi tu alantã parti cu varcã, unã multsãmi mari s-adunã anvãrliga di nãsu, sh-elu armasi mardzina di amari. 22 Deapoea vini un di ma mãrlji a sinagogãljei, cu numa Iair, tsi cãndu lu vidzu, lj-cãdzu la cicioari. 23 Sh-multu lji-si ruga dzãcãnda: "Hiljea a mea ma moari, haidi shi bagã mãnjili pri nãsã, tra s-vindicã shi s-bãneadzã." 24 Sh-elu s-dusi cu nãsu, sh-unã multsãmi mari njidzea dupã nãsu shi s-pindzea anvãrliga di nãsu. 25 Namisa di nãshi eara unã muljeari tsi lj-cura sãndzili di doisprãdzatsi di anji. 26 Sh-avea traptã multi di partea a doctorlor sh-avea chirutã tutã avearea a ljei ni fãrã di ufelii, sh-ma s-fãtsea ma arãu. 27 Cãndu avdzã si zbura di Isusul, intrã la multsãmea sh-di pri dupã plãtãri timsi mãna la stranjilu al Isus. 28 Ea dzãtsea: "Macã va bagã mãna la stranjili a lui, va mi vindicã." 29 Sh-trãoarã curarea a sãndzilui pãpsi shi ea sãmtsã tu truplu a ljei cã s-vindicã di atsea lãngoari. 30 Ma trãoarã Isusul sãmtsã un puteari tsi avea ishit di la nãsu, s-turnã cãtrã multsãmea sh-dzãsi: "Cai deadi di stranjili a meali?" 31 Sh-ucenitsilji a lui lji-dzãsirã: "Nu vedz cã multsãmea ma s-pindzi di tuti pãrtsãli shi tini dzãtsi: ‘Cai deadi di mini?’" 32 Elu mutrea anvãrliga s-videa cai u featsi aestã. 33 Atumtsea, muljearea mplinã di fricã sh-trimurãnda, cã shtia tsi avea pãtsãtã, vini sh-lji cãdzu pri cicioari sh-lji aspusi tutã alihea. 34 Sh-elu lj-dzãsi: "Hilje, pistea a ta ti-vindicã, imnã tu pace cã eshti vindicatã di lãngoarea a ta!"

Hiljea al Iair

35 Iarã Isusul ninga ma grea, vinirã niscãntsã di la casa a primarlui a sinagogãljei dzãcãndã: "Hiljea a ta muri. Cãtse lu cãrteshti ninga nvitsãtorlu?" 36 Ma Isusul cãndu avdzã zboarili tsi s-dzãsirã, lji dzãsi a primarlui a sinagogãljei: "Nu ti aspari, mash pistipsea!" 37 Nu alãsã s-lu urmeadzã vãrã altã, dicãt mash Petrul, Iacovul shi Ioanul, fratili al Iacov. 38 Shi dupã cum agiumsi la casa a primarlui a sinagogãljei, vidzu unã mintiturã mari shi oaminji tsi plãndzea shi vãita cu boatsi. 39 Intrã sh-lã dzãsi a lor: "Cãtse aurlats shi plãndzets? Feata nu muri, ma doarmi." 40 Elji s-pizuirã, ma elu dupã tsi lji scoasi tuts nafoarã, lo cu nãsu tat-su shi mã-sa ali feati sh-atselji tsi eara cu nãsã, sh-intrã aclo iu eara feata. 41 Elu u lo feata di mãnã sh-lji dzãsi: "Talitha cumi", tsi va s-dzãcã: "Featã, a tsãia ma tsã-dzãc: Scoalã-ti!" 42 Trãoarã feata si sculã sh-imnã singur. Ea eara di doisprãdzatsi di anji. Sh-elji s-ciudisirã multu. 43 Ma elu lã deadi ordin tsi vãrã s-nu shtibã. Sh-lã ursi si lj-da ali feati ti mãcari.

Isusul Imnã pri Apã

22 Trãoarã dupã aestã Isusul lã ordinã ucenitsilji a lui s-intrã tu varcã shi s-arucã di napãrti, pãnã-cãndu elu s-alasã s-fugã multsãnjili. 23 Dupã tsi alãsã multsãmea s-fugã, s-alinã singur pri munti s-roagã. Sh-cãndu tunicã elu eara aclo singur dip. 24 Tu aestã oarã varca eara tu mesea di amari, shi s-plãscãnea di vãljurili cã vimtul eara contra. 25 Cãtrã apiritã, Isusul s-dusi aproapi di nãshi, imnãnda pri amari. 26 Ucenitsilji vidzãnda cãtrã elu tsi imna pri amari, ahurhirã s-aurlã di fricã sh-dzãsirã: "Easti vãrã fantazmã!" 27 Ma trãoarã Isusul lã grãi a lor: "Arihãtipsits-vã! Mini escu, s-nu avets fricã!" 28 Sh-Petrul lj-dzãsi: "Doamne, macã eshti tini, mi ursea s-yin la tini pri apã!" 29 Elu lj-dzãsi: "Haidi!" Sh-Petrul dipunã dit varcã sh-imnã pri apã, s-njidzea la Isusul. 30 Ma, vidzãnda cã vimtul eara vãrtos, s-aspãre, sh-apãrnjinda s-afundã aurlã: "Doamne, ascapã-mi!" 31 Sh-Isusul lj-timsi trãoarã mãna, lu acãtsã shi lj-dzãsi: "Om putsãn-pistimen, cãtse fushi nisigur?" 32 Apoea, cãndu intrarã tu varcã, vimtul pãpsi. 33 Atumtsea elji tsi eara tu varcã si ncljinarã la nãsu, dzãcãnda: "Dealihea tini eshti Hiljiu a Dumnidzãlui!"

Paralizatlu al Capernaum

1 Dupã ndoauã dzãli, Isusul vini nãpoi tu Capernaum shi s-avdzã cã elu eara la casã. 2 Trãoarã s-adunarã ahãntsã multsã oaminji cãt nu aflai loc nitsi dininti ali poarti. Sh-elu lã nvitsa zborlu. 3 Atumtsea vinirã niscãntsã, tsi adusirã un om paralizat tsi lu-purta patru ishi. 4 Ma niputãnda s-apruchea di itia a multsãmiljei, dizvãlirã plocili a citiiljei iu eara Isusul, sh-dupã tsi disfeatsirã unã guvã lu-dipusirã patlu pi cai stãtea paralizatlu. 5 Isusul vidzãnda pistea a lor lji-dzãsi a paralizatlui: "Hilje, amãrtiili a tali tsã suntu ljirtati!" 6 Ma atsia shidea niscãntsã scribi tsi tu ininjli a lor minduea: 7 "Cãtse vahi aestu ma blastimã? Cai poati s-ljeartã amãrtiili, dicãt mash unlu, Dumnidzãlu?" 8 Ma Isusul tsi trãoarã aduchi tu suflitlu a lui cã elji ma minduea aesti lucri cu mintea-a lor, lã dzãsi: "Cãtse li minduits aesti lucri tu ininjli a voastri? 9 Tsi easti ma lishor s-lji dzãts a paralizatlui: ‘Amãrtiili a tali tsã-suntu ljirtati’, ama s-lji dzãts: ‘Scoalã-ti, ljea patlu a tãu sh-imnã!’? 10 Ma tra si-shtits cã Hiljiu-a Omlui ari puteari s-ljeartã amãrtiili pri loc, 11 mini ma lj-dzãc: ‘Scoalã-ti, ljea patlu sh-imnã la casa a ta!’" 12 Sh-elu si sculã trãoarã, lo patlu a lui, sh-ishi afoarã dininti a tutulor, sh-ashã tuts s-ciudisirã sh-alãvdarã Dumnidzãlu dzãcãnda: "Unã ahtari thavmã nu u-avem vidzut pute!"

Nyearea al Lazar

1 Vãrãoarã eara un lãndzit, Lazarul di Betania, di hoara ali Marii sh-ali Marti, sora a ljei. 2 Maria eara atsea tsi aumsi cu njir Domnul shi lji-ashtearsi cicioarili a lui cu perlji a ljei di cap, iarã fratili a ljei, Lazaru eara lãndzit. 3 Trã atsea surãrili lji pitricurã zbor al Isus dzãcãnda: "Doamne, ia, atsel tsi tini lu vrei, easti niputut." 4 Sh-Isusul, cum avdzã aesti, dzãsi: "Atsea lãngoari nu easti ti moarti, ma ti mãrirea a Dumnidzãlui, tsi prit ea s-multumãreascã Hiljilu a Dumnidzãlui." 5 Isusul u vrea Marta, sora a ljei Maria sh-Lazarul. 6 Cãndu avdzã cã Lazarul eara lãndzit, armasi ninga doauã dzãli tu loclu iu eara. 7 Deapoea, dupã aestã, lã dzãsi a ucenitsilor: "S-nã turnãm napoi tu Iudea." 8 Ucenitsilji lji-dzãsirã: "Rabbi, deaneavra ti cãfta Iudeilji s-ti vãtãma cu chetri sh-tini ma ti duts nãpoi aclo?" 9 Isusul apãndisi: "Nu suntu vahi doisprãdzatsi orili a dzuãljei? Macã vãrã imnã dzua, nu s-ncheadicã, cã veadi prit lunjina aishtei lumi. 10 Ma macã vãrã imnã noaptea, s-ncheadicã, cã lunjina nu easti tu nãsu." 11 Dupã tsi li dzãsi aesti zboari, adãvgã: "Oaspili a nostru, Lazaru lu ari acãtsat somnu, ma mini ma mi duc s-lu dishteptu." 12 Atumtsea ucenitsilji a lui lji dzãsirã: "Doamne, ma s-doarmã, va s-vindicã." 13 Ma Isusul lã-avea zburãtã trã moartea a lui, iarã elji minduirã cã Isusul avea zburãtã trã durnjirea. 14 Atumtsea Isusul lã dzãsi a lor discljis: "Lazarul muri. 15 Sh-mini mi hãrsescu trã voi cã nu earam aclo tra s-pistipsits, ma haidets s-nã dutsem la nãsu." 16 Atumtsea Toma, acljimatã Dzeaminu, lã dzãsi alãntor ucenitsi: "S-nã dutsem sh-noi, s-murim cu nãsu." 17 Cãndu vini Isusul, lu aflã Lazarul di patru dzãli tu murmintu. 18 Ma Betania eara tsinsprãdzatsi di stadi*aproapi di Ierusalem. 19 Sh-multsã di Iudei avea vinit la Marta sh-la Maria trã lishurari durearea ti fratili a lor. 20 Marta, cum avdzã cã ma yinea Isusul, lji-ishi nãinti. Iarã Maria shidea la casã. 21 Atumtsea Marta lji-dzãsi al Isus: "Doamne, ma s-earai aoa, fratili a meu nu va s-avea moartã, 22 ma sh-tora shtiu cã tuti atseali tsi lji caftsã a Dumnidzãlui, elu va tsã li da." 23 Isusul lji dzãsi: "Fratili a tãu va s-nyeadzã!" 24 Marta lji apãndãsi: "Shtiu cã va s-nyeadzã tu nyeari, tu dzua di soni." 25 Isusul lji dzãsi: "Mini escu nyearea sh-bana. Cai pistipseashti la mini, va s-bãneadzã, sh-macã va s-moarã. 26 Sh-caitsido tsi bãneadzã shi pistipseashti tu mini, nu va s-moarã pute tu etã. Pistipseashti tini tu aestã?" 27 Ea lji dzãsi: "Ie, Doamne, mini pistipsescu cã tini eshti Hristolu, Hiljilu a Dumnidzãlui, tsi yini tu lumi." 28 Sh-cum dzãsi ashã, s-dusi s-acljeamã pri ascumtu Maria, sora a ljei, dzãcãnda: "Nvitsãtorlu easti aoa sh-ma ti acljeami." 29 Macãt Maria avdzã, ea si sculã trãoarã shi vini la elu. 30 Ma Isusul ninga nu avea agiumtã tu hoarã, meti s-afla tu loclu iu Marta lji avea ishitã nãinti. 31 Atumtsea Iudeilji tsi eara cu Maria la casã, trã dari curaiu, cãndu vidzurã cã ea si sculã trãoarã shi ishi, s-dusirã dupã nãsã, dzãcãnda: "Ea ma s-dutsi la murmintu tra s-plãngã aclo." 32 Cãndu Maria vini la loclu iu s-afla Isusul sh-lu vidzu, lji cãdzu la cicioari dzãcãnda: "Doamne, ma s-earai tini aoa, fratili a meu nu va avea murit." 33 Isusul, cãndu u-vidzu plãngãnda sh-Iudeilji tsi avea vinit cu nãsã tutashã plãndzea, suschirã tu duh shi s-tulburã, 34 sh-ntribã: "Iu lu avets bãgatã?" Elji lji dzãsirã: "Doamne, haidi s-vedz!" 35 Isusul s-lãcrimã. 36 Atumtsea Iudeilji dzãsirã: "Videts, cãt lu vrea!" 37 Ma niscãntsã di elji dzãsirã: "Aestu tsi lji discljisi ocljilji a orbului, nu putea s-fãtsea tsiva tsi sh-aestu s-nu murea?" 38 Trã atsea Isusul suschirãnda napoi di nãuntru, vini la murmintu. Aestã eara unã pishtireauã sh-avea nãinti unã cheatrã. 39 Isusul dzãsi: "Mutats-u cheatra!" Marta, sora a mortului, lji-dzãsi: "Doamne, elu tora amputi, cã ari patru dzãli." 40 Isusul lji dzãsi: "Nu tsã dzãsh cã ma s-pistipseashti, va s-vedz mãrirea a Dumnidzãlui?" 41 Atumtsea elji u scularã cheatra di murmintu, sh-Isusul sculã ocljilji nsus dzãcãnda: "Tate, ti hãristisescu cã mi ascultash. 42 Mini u shtiam cã tini totãna mi ascultsã, ma li am dzãsã aesti trã itia a multsãmiljei tsi easti anvãrliga, tra s-pistipseascã cã tini mi pitricush." 43 Shi, dupã tsi dzãsi aesti, grãi cu boatsi analtã: "Lazar, easã nafoarã!" 44 Atumtsea mortul ishi, cu mãnjili shi cicioarili ligati cu fãshi di pãndzã sh-fatsa anvãrtitã cu unã pitsetã. Isusul lã dzãsi a lor: "Dizligats-lu sh-alãsats-lu s-imnã!"