1 Atumtsea Duhlu lu adusi Isusul tu irnjii, tsi draclu s-lu cãrtea. 2 Shi dupã tsi tsãnu pãreasinji patrudzãtsi di dzãli sh-patrudzãtsi di noptsã, ma napoi u acãtsã foama. 3 Atumtsea cãrtitorlu, dupã tsi lji s-apruche, lji dzãsi: "Ma s-hii Hiljiu a Dumnidzãlui, dzã tsi chetrili aesti si s-facã pãnji." 4 Ma elu lj-apãndisi: "Scritura dzãtsi: ‘Omlu nu bãneadzã mash cu pãni, ma cu cathi zbor tsi easi dit ✝gura a Dumnidzãlui.’" 5 Atumtsea draclu lu adusi tu sãmtul cãsãbã sh-lu bãgã tu mãyeaua a templui, 6 sh-lji dzãsi: "Ma s-hii Hiljiu a Dumnidzãlui, arucã-ti nghios, cã Scritura dzãtsi: ‘Elu va da ordin a anghiljilor a lui trã tini, sh-atselji va ti tsãnã tu mãnjili a lor tsi s-nu agudeshti cu ciciorlu a tãu vãrã ✝cheatrã.’" 7 Isusul lj-dzãsi: "Scritura dzãtsi tutashã: ✝‘S-nu lu cãrteshti Domnul, Dumnidzãlu a tãu.’" 8 Draclu lu dusi dinou pri un munti multu analtu sh-lji aspusi tuti amirãriljili a lumiljei sh-mãrirea a lor, 9 sh-lji dzãsi: "Mini va tsã li dau tuti aesti, macã tini cadz pri dintsã nãintea a mea sh-va-nji ti-ncljinji." 10 Atumtsea Isusul lji dzãsi: "Fudzi, Satane, cã easti scriatã: ‘✝Alavdã Domnul, Dumnidzãlu a tãu, sh-huzmitipsea mash nãsu.’" 11 Atumtsea draclu lu alãsã, sh-ia, s-apruchearã anghilji tra s-lji huzmitipsea.

12 Cãndu Isusul avdzã cã Ioanul fu bãgat tu hapsi, s-trapsi tu Galilea. 13 Deapoea alãsã Nazaretul shi s-dusi s-bãneadzã la Capernaum, cãsãbã ningã amari, tu sinurili al Zabulon shi Neftali, 14 tsi si mplineascã tsi eara dzãsã di la prufitlu Isaia cai dzãsi: 15 ✝"Loclu al Zabulon sh-loclu al Neftali, mardzina a amariljei, loclu napãrti di Iordan, Galilea a pãngãnjilor, 16 populu tsi bãna tu scutidi ari vidzutã unã lunjinã mari, sh-pristi atselji tsi stãtea tu loclu a aumbriljei a moartiljei, arãsãri lunjina." 17 Di atumtsea Isusul apãrnji s-predica shi s-dzãtsea: "Mitãnjiusits-vã cã amirãriljea a tserurilor easti aproapi."

18 Cãndu ma fudzea ningã amarea a Galileiljei, Isusul vidzu doi frats: Simonul tsi s-acljima Petru, sh-Andrea, frati-su, tsi ma arca plãsili tu amari cã eara piscari. 19 Sh-lã dzãsi a-lor: "Haidets dupã mini sh-mini va vã facã piscari di oaminji." 20 Sh-dinãoarã elji alãsarã plãsili sh-lu urmarã.

21 Sh-cum s-dusi ma nclo, vidzu doi altsã frats: Iacovul, hiljiu al Zebedeu sh-Ioanul, fratili a lui, tu varcã deadun cu Zebedeu tatili a lor, tsi ma ndridzea plãsili. Sh-lji acljimã. 22 Elji alãsarã trãoarã varca sh-tatãl a lor shi s-dusirã dupã nãsu.

23 Isusul strãbãtea tutã Galilea, nvitsãnda tu sinagodzili a lor, predicãnda evanghelu a amirãriljei sh-vindicãnda itsi lãngoari sh-itsi niputeari eara tu popul. 24 Ashã anamea a lui si arãspãndi tu tutã Siria, sh-lji adutsea tuts lãndzitslji tsi s-munduea di niputeari sh-dureari soi di soi, demonizatsi, epileptitsi sh-paralizatsi, sh-elu lji vindica. 25 Sh-un multsãmi mari di oaminji njidzea dupã nãsu dit Galilea, dit Decapoli, dit Ierusalem, dit Iudea sh-di napãrti di Iordan.