1 Dupã tsi Isusul li ascãpã ti spuneari aesti nvitsãturi, s-nchisi di Galilea, sh-vini tu loclu a Iudeiljei, napãrti di Iordan. 2 Multsãnji mãri l-urma sh-elu lji vindicã aclo. 3 Atumtsea lji s-apruchearã niscãntsã Farisei s-lu cãrtea, sh-lji dzãsirã: "Easti tu lege tsi bãrbatlu s-u dispartã muljearea di itsido itii?" 4 Sh-elu apãndisinda lã dzãsi a lor: "Nu avets cãntatã cã atsel cai lji adrã di tu apãrnjitã ‘lji adrã mascru sh-theaminã.’✝ 5 Sh-Dumnidzãlu dzãsi: ‘Trã aestã bãrbatul va s-alasã tatãl sh-muma a lui sh-va si s-mpriuneadzã cu muljearea a lui, sh-amindoilji va hibã un trup singur’?✝ 6 Sh-ashã elji nu suntu ma doi, ma un trup. Atsea tsi Dumnidzãlu ari mpriunatã, omlu s-nu u-dispartã." 7 Elji lji dsãsirã: "Atumtsea cãtse Moisiul ursi s-lji si da cartea di dispãrtsãri shi si-u alasã."✝ 8 Elu lã dzãsi a-lor: "Moisiul vã deadi volje s-li alãsats muljerili a voastri trã itia a nchitririljei a ininjilor a voastri. Ma tu ahurhitã nu eara ashã. 9 Ma mini vã dzãc cã caitsido tsi u-alasã muljearea a lui, dicãt mash trã itia a putãnsiriljei, shi si nsoari cu unã altã, ncalcã curuna. [Sh-atsel tsi si nsoari cu muljeari alãsatã, ncalcã curuna.]"* 10 Ucenitsilji a lui lji dzãsirã: "Macã cunditsili a bãrbatlui cãtrã muljearea suntu ahtãri, ma ghini si nu si nsoarã dip." 11 Ma elu lã dzãsi a lor: "Nu tuts lã aduchescu aesti zboari, ma singur atselji a cui lã easti datã. 12 Suntu eunuchi*, cai suntu amintats ashã dit pãnticlu a mumãljei, shi suntu eunuchi cai suntu faptã di la oaminji, shi suntu eunuchi cai au apofãsitã singur s-facã eunuchi trã amirãriljea a tserurilor. Atsel tsi poati s-aducheascã, s-aducheascã."

13 Atumtsea adusirã cilimenji njitsi la Isusul tra s-bãga mãnjili pri nãshi, shi s-ruga, ma ucenitsilji a lui lji vãrghirã. 14 Atumtsea Isusul dzãsi: "Alãsats cilimenjlji atselji njitslji s-yinã la mini sh-nu li nchidicats, cã a lor easti amirãriljea a tserurilor." 15 Atumtsea elu bãgã mãnjili pri elji, sh-deapoea s-nchisi di aclo.

16 Sh-ia, s-apruche un la Isusul sh-lu ntribã: "Nvitsãtore, tsi buneatsã prindi s-fac tsi s-amintã bana eternã?" 17 Sh-elu dzãsi: "Cãtse mi ntreghi tsi easti bun? Singur un easti bun. Macã vrei s-intsri tu banã, veaglji dimãndãrili." 18 Elu ntribã: "Cai?" Atumtsea, Isusul lj-apãndisi: "Nu vatãmã, nu ncalcã curuna, nu furã, nu dã mãrtirii arãdioasã, 19 tinjisea tatãl a tãu sh-muma a ta, shi s-vrei aproapilu a tãu ca cum ti vrei tini." 20 Tinirlu lj-dzãsi: "Tuti aesti lucri mini li am vigljeatã. Tsi nji lipseashti altã?" 21 Isusul lj-dzãsi: "Macã vrei s-hii perfectu, duti sh-vindi tsi ai, sh-dã-li a niavutslor, shi tini va s-ai un ayishteari tu tser. Deapoea haidi sh-urmeadzã-mi." 22 Ma tinirlu cãndu li avdzã aesti zboari, fudzi nvirinat, cã avea multã aveari. 23 Atumtsea, Isusul lã dzãsi a ucenitsilor a lui: "Dealihea vã dzãc cã un avut cu zori va s-intrã tu amirãriljea a tserurilor. 24 Sh-nãpoi ma va dzãc: Easti ma lishoarã s-treacã cãmila tu guva a aclui, dicãt avutlu s-intrã tu amirãriljea a Dumnidzãlui." 25 Cãndu li avdzãrã aesti zboari, ucenitsilji a lui s-ciudisirã multu shi ntribarã: "Atumtsea, cai va s-ascapã vahi?" 26 Sh-Isusul mutrinda cãtrã nãshi dzãsi: "Trã oaminjlji aestã easti nipututã, ma trã Dumnidzãlu itsido easti putut." 27 Atumtsea Petrul lj-apãndisi: "Ia, noi li alãsãm tuti sh-vinim dupã tini, ma tsi va s-amintãm noi?" 28 Sh-Isusul lã-dzãsi a lor: "Dealihea ma vã dzãc, tu adãrãtura atsea noaua, cãndu Hiljiu a Omlui va sheadã pri thronlu a mãririljei a lui, sh-voi tsi mi avets urmat, va shidets pi doisprãdzatsi thronuri ti guidicari di doisprãdzatsi fãrili a Israelui. 29 Sh-caitsido tsi ari alãsat trã numa a mea cãsi, fratsi, surãri, tatã, mumã, [muljeari]*, cilimenji, agri, va ljea unã sutã di ori ma multu, sh-va aibã banã eternã. 30 Ma multsã di protslji va hibã tu coadã, sh-atselji di tu coadã va hibã protslji."