1 Atumtsea Isusul lã grãi a multsãnjilor sh-a ucenitsilor a lui, 2 shi dzãsi: "Scriblji sh-Fariseilji shidzurã pri scamnul al Moisiu. 3 Trã atsea, vigljeats shi fãtsets itsi vã dzãc, ma nu fãtsets cum fac elji, cã dzãc, ma nu fac. 4 Elji leagã sartsinji greali tsi s-poarta cu zori sh-li bagã pri pãltãrili a oaminjlor, ma elji nu vor s-li minã nitsi cu dzeaditlu a lor. 5 Ma tuti faptili a lor li facã tra si s-veadã di oaminjlji, li lãrdzescu filacterili a lor sh-li lundzescu hirili a stranjilor a lor. 6 Arsescu protili locuri la uspetsi sh-protili locuri tu sinagodzi, 7 sh-ncljinãciunjili tu pãdzi, shi s-acljeamã ‘Rabbi’ di oaminjlji. 8 Ma voi, nu alãsats s-vã acljeamã ‘Rabbi’, cã mash un easti Nvitsãtorlu a vostru, sh-voi tuts hits frats. 9 Sh-pristi loc nu acljimats vãrã ‘tatãl’ a vostru, cã mash un easti Tatãlu a vostru. Elu easti tu tseruri. 10 Nu alãsats s-vã acljeamã nvitsãtor, cã un easti nvitsãtorlu a vostru: Hristolu. 11 Ma marili di voi prindi s-hibã huzmichearlu a vostru. 12 Cã cai va s-analtsã, va si apleacã, sh-cai va s-apleacã, va si analtsã.

13 Ma cavai di voi Scribi sh-Farisei ipucrits! Cã ncljidets amirãriljea a tserurilor nãintea a oaminjlor. Cã nitsi voi nu intrats, nitsi nu alãsats atselji tsi vor s-intrã.

14 [Cavai di voi Scribi sh-Farisei ipucrits! Cã mãcats tu cãsili a veduvilor, shi trã ocljilji a lumiljei fãtsets rugãciunji lundzi, trã atsea voi va s-hits giudicats.]*

15 Cavai di voi Scribi sh-Farisei ipucrits! Cã tritsets amarea sh-loclu ti fãtseari prozelits, sh-cãndu vãrã, s-fatsi ahtar lu fãtsets hiljiu a Gehenãljei, sh-di doauã ori ma arãu di voi.

16 Cavai di voi, cãlãuzi orghi tsi dzãtsets: ‘Macã vãrã si spigiurã pri templu nu easti tsiva, macã si spigiurã pri furia a templui prindi s-tsãnã spigiurarea.’ 17 Glari sh-orghi! Cai easti ma mari: furia ama templu tsi sãmtsashti furia? 18 Voi ninga dzãtsets: ‘Ma atsel tsi va si spigiurã pri altar nu easti tsiva, macã si spigiurã pri doara tsi easti pri nãsu, prindi s-tsãnã spigiurarea.’ 19 Orghi! Cai easti ma mari: doara ama altarlu tsi sãmtsashti doara? 20 Ma atsel tsi va si spigiurã pri altar, si spigiurã pri nãsu sh-pri tuti lucrili tsi suntu pristi nãsu. 21 Atsel tsi si spigiurã trã templu, si spigiurã trã nãsu sh-trã Dumnidzãlu tsi bãneadzã aclo. 22 Ma atsel tsi va si spigiurã pri tser, si spigiurã pri thronlu al Dumnidzãu sh-pri atsel tsi shãdi pri nãsu.

23 Cavai di voi Scribi sh-Farisei ipucritsi! Cã voi lugursits a dzatsea di mentã, di mãrar, di chimion sh-alãsats dupã mãnã lucrili atseali ma greali a legiljei: ndriptatea, njila sh-pistea. Aesti lucri prindi s-li fãtsets ni alãsat dupã mãnã altãli. 24 Cãlãuzi orghi, tsi sticurats biutura tra s-mutats cunuplu, sh-ascãpitats cãmila!

25 Cavai di voi Scribi sh-Farisei ipucritsi! Cã curats partea di nafoarã a cupãljei, sh-a piatãljei, iarã di nãuntru suntu mplini di arãchiri sh-di zãlumi. 26 Fariseu orbu! Curã ma nãinti di nãuntru cupa sh-piata, sh-di nafoarã va hibã curatã.

27 Cavai di voi Scribi sh-Farisei ipucrits! Cã undzits ca murmintsãlji alghiti, tsi di nafoarã s-veadã mushati, ma nãuntru suntu mplinji di oasili a mortsãlor sh-cu multã lãvushiturã. 28 Ashã shi voi di nafoarã vã aspunets a oaminjlor ca ndreptsã, ma di nãuntru hits mplinji di ipucrizii sh-di anapudii.

29 Cavai di voi Scribi sh-Farisei ipucrits! Cã adrats murmintsãlji a prufitsilor shi stulsits murmintsãlji a ndreptsãlor, 30 sh-dzãtsets: ‘Ma s-aveam bãnat tu chirolu a pãpãnjilor a noshtri, nu va earam pãrtashi cu nãshi, la vãtãmarea a prufitsilor.’ 31 Zburãnda ashãtsi voi mãrtirsits contra di voi, cã hits hiljilji atsilor tsi vãtãmarã prufitsilji. 32 Voi u-tritsets misura a pãpãnjilor a voshtri.

33 Sherchi, pulji di nãpãrtitsi! Cum va s-ascãpats di giudicarea a Gehenãljei? 34 Trã atsea, ia mini ma pitrec la voi prufits, shtiutsi shi scribii. Voi niscantsã di nãshi va lji vãtãmats, sh-va lji crutsisits. Niscãntsã altsã va lji bãtets tu sinagodzãli a voastri, sh-va lji avinats dit un cãsãbã tu altu, 35 tra s-cadã pri voi tutã sãndzili a ndreptsãlor, virsatã pri loc, di la sãndzili a ndreptului Abel pãnã la sãndzili al Zaharia, hiljiu al Barahia, tsi voi lu vãtãmat namisa di templu sh-di altar. 36 Dealihea ma vã dzãc cã tuti aesti lucri va s-cadã pri aestã farã.

37 Ierusalem, Ierusalem, tsi lji vatsãnji prufitsilji sh-li vatsãnji cu chetri atselji pitricutslji la tini! Di cãti ori am vrutã s-adun hiljilji a tãlji ashãtsi cum aduni clocea puljilji a ljei sum areapti, ma voi nu vrutã! 38 Ia, templu a vostru ma armãni shcretã. 39 Cã mini ma vã dzãc, cã di tora sh-nclo nu va mi videts ma pãnã cãndu s-dzãtsets: ‘Ghinicuvintat s-hibã atsel tsi yini tu numa a Domnului!’"✝