1 Cãndu vini dimineatsa, tuts mãrlji a preftsãlor sh-aushlji a popului featsirã plan contra al Isus tsi s-lu vãtãma. 2 Sh-ashã cum lu ligarã, lu dusirã sh-lu prideadirã la Pilat, guvernatorlu romac. 3 Atumtsea, Iuda tsi lu avea pridatã, cãndu lu vidzu cã lu giudicarã Isusul, s-pishmãnipsi, sh-lji turnã nãpoi treidzãtsi di asimi la mãrlji a preftsãlor sh-la aushlji, 4 dzãcãnda: "Feciu amãrtii cã vindui un sãndzi fãrã cãbati." Ma elji dzãsirã: "Tsi nã mealã a noauã? Lucru ti tini!" 5 Sh-ashã Iuda, l-arcã pãradzlji di asimi la templu shi s-dusi si-spindzura. 6 Ma mãrlji a preftsãlor adunarã aesti pãradzi di asimi sh-dzãsirã: "Nu prindi s-lji bãgãm tu ayishtearea a templui, cã easti pãhãlu a sãndzilui." 7 Dupã tsi featsirã plan, cu aesti pãradzi acumpãrarã agrul a pociarlui di murmintsãlji a xenjilor. 8 Trã atsea agrul aestu s-acljeami pãnã tu dzua di azã: "Agrulu a sãndzilui." 9 Atumtsea si mplini atsea tsi fu dzãsã prit prufitlu Ieremia: "Sh-loarã treidzãtsi di pãradzili di asimi, pãhãlu tsi lu avea tinjisitã hiljilji al Israel, 10 sh-li deadirã trã agrul a pociarlui ashã cum mi dimãndã Domnul."

11 Sh-Isusul stãtu nãintea a guvernatorlui sh-elu lu ntribã: "Tini eshti amirãlu a Iudeilor?" Sh-Isusul lji dzãsi: "Tini ma dzãts." 12 Deapoea mãrlji a preftsãlor sh-aushlji lu acuzarã, ma elu nu apãndisi dip. 13 Atumtsea Pilatul lu-ntribã: "Nu avdzã cãti mãrtirii dzãc contra di tini?" 14 Ma elu nu apãndisi la nitsi un zbor, ashãtsi guvernatorlu s-ciudisi multu. 15 Cu sibepea a sãrbãtoariljei guvernatorlu avea ca adeti tsi s-lji sãlãghea a popului un hãpsãnit, atsel tsi vrea populu. 16 Avea atumtsea tu hapsi, un hãpsãnit cu anami, cu numa Baraba. 17 Cãndu s-adunarã oaminjlji, Pilatul lã ntribã atselji: "Cai vrets s-vã sãlãghescu, Baraba, ama Isusul, tsi s-numeashti Hristos?" 18 Cã elu shtia ghini cã elji lu avea pridatã di inati. 19 Sh-iarã elu shidea pri scamnu la giudicatã, muljearea a lui lj-pitricu zbor: "Nu ti mintea dip cu lucrul atsilui ndreptu, cã azã am traptã multã tu yis trã itia a lui." 20 Ma mãrlji a preftsãlor sh-aushlji lji umplurã mintea a multsãmiljei tsi s-cãfta Baraba, sh-Isusul si s-vãtãma. 21 Sh-guvernatorlu lã ntribã: "Cai di doilji vrets s-vã sãlãghescu?" Elji dzãsira: "Baraba!" 22 Pilatlu lã dzãsi a lor: "Tsi s-fac, cu Isusul, tsi s-acljeami Hristos?" Tuts lji apãndisirã: "S-crutsiseascã!" 23 Ma guvernatorlu ntribã: "Cãtse, tsi arãu ari faptã?" Ma elji aurla ma multu: "S-crutsiseascã!" 24 Atumtsea Pilatlu, vidzãnda cã nu ma agiundzea iuva, sh-aurlarea ma s-fãtsea ma vãrtoasã, lo apã sh-aspilã mãnjili nãintea a lor, dzãcãnda: "Mini escu ni-vinovat di sãndzili a aishtui ndreptu, easti lucrul a vostru." 25 Sh-tut populu apãndisinda dzãsi: "S-hibã sãndzili a lui pristi noi sh-pristi cilimenjlji a noshtri!" 26 Atumtsea elu lã sãlãghi a-lor Baraba. Dupã tsi Isusul lu bãturã, lu prideadi tsi s-lu crutsisea. 27 Atumtsea suldatslji a guvernatorlui, dupã tsi dusirã Isusul tu pretorium, adunarã ningã nãsu tutã cohorta. 28 Sh-cum lu disviscurã, lji arcarã pri pãltari un mantel roshu amirãrescu. 29 Sh-lji mplãtirã unã curunã di schinji, lji-u bãgarã pri cap, sh-lji deadirã un bãstun tu mãna atsea ndreapta sh-dzinucljãnda nãintea a lui, arãdea dzãcãnda: "Salut, amirãlu a Iudeilor!" 30 Deapoea lu ascuchearã, lji loarã bãstunlu sh-cu atsel lu agudea n-capã. 31 Dupã tsi lu pizuirã, lji-lu mutarã mantelul, lu nviscurã cu stranjili a lui, sh-lu dusirã ti crutsisiri.

32 Sh-cara ishirã afoarã, aflarã un om dit Tsirenea, tsi s-acljima Simon, sh-lu strimsirã s-purta crutsea al Isus. 33 Cãndu agiumsirã tu loclu tsi s-acljima Golgota, tsi va s-dzãcã "Loclu a Cafcãljei", 34 lji deadirã s-bea yinã puscã misticat cu heari. Ma elu, dupã tsi u bãgã tu gurã, nu vrea s-u bea. 35 Dupã tsi lu crutsisirã, mpãrtsãrã cu soarti stranjili a lui, [tra si mplineascã tsi eara dzãsã di la prufitlu: "Mpãrtsãrã namisa di nãshi stranjili a meali sh-arcarã soarti di tunica a mea."]* 36 Deapoea shidzurã sh-lu vigljea. 37 Pristi caplu a lui, bãgarã tutashã scriatã acuza ti giudicata a lui: "Aestu easti Isusul, Amirãlu a Iudeilor." 38 Atumtsea s-crutsisirã deadun cu nãsu sh-doi rebilji, unlu tu nandreapta sh-alantu tu nastãnga. 39 Sh-atselji tsi tritsea cãtrã aclo, lu ngiura giucãnda caplu, 40 sh-dzãcãnda: "Tini tsi lu aspardzã templul sh-lu adarã ti trei dzãli, ascapã-ti! Macã eshti Hiljiu a Dumnidzãlui, dipunã-ti di crutsi!" 41 Tutashã, sh-mãrlji a preftsãlor, deadun cu scriblji sh-cu aushlji, s-pizuea sh-dzãtsea: 42 "Elu ascãpã altsã, ma tora nu poati si s-ascapã. Macã easti amirãlu a Israelui, s-dipunã tora di crutsi sh-noi va pistipsim la nãsu. 43 Elu ari pistipsitã tu Dumnidzã, sh-macã elu lu va s-lu ascapã tora, cã ari dzãsã: ‘Mini escu Hiljiu a Dumnidzãlui.’" 44 Tutashã, lu ngiura sh-rebiljilji tsi eara crutsisit cu nãsu. 45 Di tu njeadzãdzuã* pãnã la oara trei ti mirindi* scutidlu anvãli tut loclu. 46 Anvãrliga di oara trei dupã prãndzu*, Isusul aurlã cu boatsi analtã, dzãcãnda: "Eli, Eli, lema sabacthani?",✝ tsi va s-dzãcã: "Dumnidzãlu a meu, Dumnidzãlu a meu, cãtse mi ai alãsatã?" 47 Sh-niscãntsã di atselji tsi shidea aclo, cãndu lu avdzãrã, dzãsirã: "Aestu ma lji greashti al Elia." 48 Sh-tu atsea oarã, un di atselji s-dusi dalaga, lo un sfungu, lu mulje tu yin acrã shi, dupã tsi lu bãgã tu mãyeaua di un cãlami, lji deadi s-bea. 49 Ma alantsã dzãtsea: "Alãsats-lu s-videm va yinã Elia s-lu ascapã." 50 Sh-Isusul aurlã ninga unã oarã cu boatsi analtã, sh-deadi suflitlu. 51 Sh-ia, velul a templui s-arupsi pi doauã pãrtsã di nsus pãnã nghios, loclu cutremburã shi shcãnghili s-disicarã, 52 murmintsãlji s-disfeatsirã, sh-multi di trupuri a sãmtsãlor tsi avea murit, s-nyearã. 53 Elji ishirã dit murmintsã dupã nyearea a Isusului, intrarã tu sãmtul cãsãbã shi s-aspusirã la multsã. 54 Tora tsenturionlu sh-atselji tsi deadun cu nãsu vigljea Isusul, cãndu vidzurã cutremburarea sh-atseali tsi s-featsirã, s-aspãrarã multu, sh-dzãsirã: "Dealihea aestu eara Hiljiu a Dumnidzãlui!" 55 Aclo eara sh-multi muljeri tsi mutrea di diparti. Eali avea urmatã Isusul di Galilea tsi s-lji huzmitipsea. 56 Namisa di nãsi eara Maria Magdalena, Maria, muma al Iacov sh-al Iosif, sh-muma a hiljilor al Zebedeu.

57 Sh-cum ntunicã, vini un om avut di Arimatea, cu numa Iosif, cai eara sh-nãsu uceniclu al Isus. 58 Elu s-dusi la Pilatlu sh-lji cãftã truplu al Isus. Atumtsea Pilatul deadi ordin tsi s-lj dãdea truplu. 59 Sh-Iosiful, dupã tsi lu lo truplu lu anvãrti cu unã pãndzã curatã 60 sh-lu bãgã tu murmintul atsel noulu, tsi elu avea disfaptã tu un cheatrã. Deapoea arucuti unã cheatrã mari tu intrata a murmintului, sh-fudzi. 61 Sh-Maria Magdalena sh-alanta Marii shidea aclo, nãintea a murmintului. 62 Sh-tu alantã dzuã, tsi eara dupã dzua a adãrariljei, mãrlji a preftsãlor sh-Fariseilji s-adunarã la Pilatul, 63 dzãcãnda: "Doamne, nã adusim a minti cã atsel arãditor, cãndu eara yiu, dzãsi: ‘Dupã trei dzãli mini va mi nyedz.’ 64 Trã atsea dã ordin tsi murmintul si s-veaglji ghini pãnã tu dzua a treia, s-nu yinã ucenitsilji a lui noaptea shi s-lu furã truplu sh-deapoea s-lji dzãcã a popului: ‘Si-sculã dit mortsã,’ sh-ashã arãdearea di ma napoea, va s-eara ma arãu di atsea di ma nãinti." 65 Pilatlu lji dzãsi a lor: "Vigljitorlji lã avets, dutsets-vã shi siguripsits-lu, cum vã si veadi ma ghini." 66 Sh-elji s-dusirã sh-lu siguripsirã murmintul, bãgarã vigljitorlji sh-vulusirã cheatra.