1 Cartea a farãljei al Isus Hristos, hiljilu al David, hiljilu al Abraham. 2 Al Abraham lji s-amintã Isacu, al Isac lji s-amintã Iacovu. Al Iacovu lji s-amintã Iuda shi fratslji a lui, 3 al Iuda lji s-amintã di la Tamara Perezu sh-Zarah. Al Perezu lji s-amintã Hezromu, al Hezromu lji s-amintã Aramu, 4 al Aramu lji s-amintã Aminadabu, al Aminadabu lji s-amintã Nahsonu, al Nahsonu lji s-amintã Salmonu, 5 al Salmonu lji s-amintã Boazu di la Rahabi, al Boazu lji s-amintã Obedu di la Ruth, al Obedu lji s-amintã Iesseu, 6 al Iesseu lji s-amintã Davidu amirã. Al amirãlu David lji s-amintã Solomonu di la muljearea tsi eara al Uriah, 7 al Solomonu lji s-amintã Roboamu, al Roboamu lji s-amintã Abiahu, al Abiahu lji s-amintã Asafu, 8 al Asafu lji s-amintã Iosafatu, al Iosafatu lji s-amintã Ioramu, al Ioramu lji s-amintã Uziau, 9 al Uziau lji s-amintã Iothamu, al Iothamu lji s-amintã Ahazu, al Ahazu lji s-amintã Ezekia, 10 al Ezekia lji s-amintã Manaseu, al Manaseu lji s-amintã Amonu, al Amonu lji s-amintã Iosia, 11 al Iosia lji s-amintã Iekonia shi fratslji a lui tu chirolu a mutariljei tu Babilon.

12 Dupã mutarea tu Babilon, al Iehonia lji s-amintã Sealtielu, al Sealtielu lji s-amintã Zorobabelu, 13 al Zorobabelu lji s-amintã Abihudu, al Abihudu lji s-amintã Eliakimu, al Eliakimu lji s-amintã Azoru, 14 al Azoru lji s-amintã Sadocu, al Sadocu lji s-amintã Achimu, al Achimu lji s-amintã Eliudu, 15 al Eliudu lji s-amintã Eleazaru, al Eleazaru lji s-amintã Mathanu, al Mathanu lji s-amintã Iacovu, 16 al Iacovu lji s-amintã Iosifu, bãrbatilu ali Marii, di la ea s-amintã Isusul, tsi s-acljimã Hristos. 17 Ashã cã tuti gheneratsili di la Abrahamu pãnã la Davidu s-fac patrusprãdzatsi di gheneratsi, shi di la Davidu pãnã la mutarea tu Babilon, patrusprãdzatsi di gheneratsi, shi di la mutarea tu Babilon pãnã la Hristolu, patrusprãdzatsi di gheneratsi.

18 Amintarea al Isus Hristolu fu ashã: Maria, muma a lui, eara susita al Iosif, ma nãinti tsi s-apãrnjea s-bãna deadun, armasi greauã di la Duhlu Sãmtu. 19 Atumtsea Iosiful, susitlu a ljei, tsi eara un om ndreptu sh-nu vrea s-u arushina nãintea a oaminjlor, apofãsi s-u alasã ascumtã.

20 Ma, iarã minduea singur aestu lucru, lji s-afãnisi tu yis un anghil di la Domnul sh-lji dzãsi: "Iosif, hiljilu al David, s-nu ai fricã s-u ljeai Maria ca muljearea a ta, cã tsi s-acãtsã tu nãsã easti lucru di la Duhlu Sãmtu. 21 Shi ea va s-amintã un ficior, sh-tini va lji badzã numa Isus, cã elu va s-ascapã populu a lui di amãrtiili a lor."

22 Shi tutã aestã s-featsi tra si mplineascã zborlu a Domnului dupã prufitlu tsi dzãtsi: 23 "Ia, virghina va armãnã greauã sh-va amintã un ficior, tsi va lj-bagã numa Emanuel," tsi va s-dzãcã: "Dumnidzãlu cu noi." 24 Sh-Iosiful, dupã tsi si sculã di somnu, featsi ashã cum lu avea ursit anghilu a Domnului, sh-u lo ningã nãsu muljearea a lui. 25 Ma elu nu u cunuscu, pãnã-cãndu ea amintã ficiorlu a ljei sh-elu s-acljimã Isus.