1 Tu atsel chiro Herodu, *domnitorlu a Galileiljei, avdzã ti anamea al Isus, 2 sh-lã dzãsi a huzmichearilor a lui: "Aestu easti Ioan Pãtidzãtorlu. Elu s-nyie dit mortsã sh-trã atsea puterili suprãnaturali ma lucreadzã la nãsu." 3 Herodul, lu avea acãtsat Ioanul, lji avea bãgatã prãnghili sh-lu avea hãpsãnit, trã itia a Herodiadãljei, muljearea al Filipu, fratili a lui. 4 Cã Ioanul lji dzãtsea: "Nu easti volje s-bãnedz cu nãsã!" 5 Sh-cu tutã cã vrea s-lu vãtãma, Herodul avea fricã di populu tsi lu lugursea Ioanul prufit. 6 Cãndu ma si sãrbãtorea dzua a amintariljei a Herodului, hiljea a Herodiadãljei giucã nãintea a oaspitslor shi lj-arsi a Herodului ahãntu multu, 7 cãt elu lji tãxi a ljei cu spigiurari cã va lji dãdea itsi va lji cãfta. 8 Shi ea, pimtã di muma a ljei, dzãsi: "Dã-nji aoa, tu unã tãpsii caplu al Ioan Pãtidzãtorlu." 9 Amirãlu si-nvirinã, ma trã itia a spigiurariljei nãintea a acljimatslor tsi eara cu nãsu la measã, ordinã s-lji lu aduc. 10 Ashã elu pitricu un tu hapsi s-lji talji caplu al Ioan Pãtidzãtorlu. 11 Sh-caplu a lui lu adusirã tu unã tãpsii sh-lji-lu deadirã ali feati, shi ea lji-lu deadi ali mumi. 12 Deapoea vinirã ucenitsilji al Ioan, loarã truplu a lui sh-lu ngruparã. Atumtsea, elji s-dusirã shi lj-aspusirã al Isus.

13 Cãndu Isusul li avdzã aesti, s-nchisi di-aclo cu unã varcã shi s-dusi singur tu un loc ermu, sh-multsãmea cãndu avdzã s-dusi dupã nãsu pri cicioari dit cãsãbadz. 14 Sh-Isusul, cãndu ishi dit varcã, vidzu unã multsãmi mari, avu njilã trã elji sh-vindicã lãndzitslji a lor. 15 Deapoea cãtrã seara ucenitsilji a lui s-apruchearã di nãsu sh-lji dzãsirã: "Aestu loc easti ermu sh-oara tricu. Alasã multsãmea s-ducã prit hoari shi s-acumpãrã trã mãcari." 16 Isusul lã dzãsi a lor: "Nu easti ananghi s-ducã. Dats-lã voi s-mãcã!" 17 Sh-elji lji dzãsirã: "Noi aoa nu avem altã tsiva dicãt tsintsi pãnji sh-doi peshti." 18 Sh-elu lã dzãsi: "Adutsets-li aoa la mini." 19 Atumtsea lã ordinã multsãnjili s-sheadã mpadi pri iarbã. Deapoea lo tsintsi pãnjili sh-doi peshtili sh-dupã tsi sculã ocljilji cãtrã tser, li ghinicuvãntã, li frãmsi pãnjili sh-li deadi a ucenitsilor, sh-ucenitsilji a multsãnjilor. 20 Sh-tuts mãcarã shi s-fãnãtirã. Deapoea ucenitsilji adunarã bucãtsili tsi armasirã sh-umplurã doisprãdzatsi di coshuri mplini. 21 Sh-atselji tsi mãcarã eara anvãrliga di tsintsi njilji di bãrbats, ni misurat muljerili sh-cilimenjlji.

22 Trãoarã dupã aestã Isusul lã ordinã ucenitsilji a lui s-intrã tu varcã shi s-arucã di napãrti, pãnã-cãndu elu s-alasã s-fugã multsãnjili. 23 Dupã tsi alãsã multsãmea s-fugã, s-alinã singur pri munti s-roagã. Sh-cãndu tunicã elu eara aclo singur dip. 24 Tu aestã oarã varca eara tu mesea di amari, shi s-plãscãnea di vãljurili cã vimtul eara contra. 25 Cãtrã apiritã, Isusul s-dusi aproapi di nãshi, imnãnda pri amari. 26 Ucenitsilji vidzãnda cãtrã elu tsi imna pri amari, ahurhirã s-aurlã di fricã sh-dzãsirã: "Easti vãrã fantazmã!" 27 Ma trãoarã Isusul lã grãi a lor: "Arihãtipsits-vã! Mini escu, s-nu avets fricã!" 28 Sh-Petrul lj-dzãsi: "Doamne, macã eshti tini, mi ursea s-yin la tini pri apã!" 29 Elu lj-dzãsi: "Haidi!" Sh-Petrul dipunã dit varcã sh-imnã pri apã, s-njidzea la Isusul. 30 Ma, vidzãnda cã vimtul eara vãrtos, s-aspãre, sh-apãrnjinda s-afundã aurlã: "Doamne, ascapã-mi!" 31 Sh-Isusul lj-timsi trãoarã mãna, lu acãtsã shi lj-dzãsi: "Om putsãn-pistimen, cãtse fushi nisigur?" 32 Apoea, cãndu intrarã tu varcã, vimtul pãpsi. 33 Atumtsea elji tsi eara tu varcã si ncljinarã la nãsu, dzãcãnda: "Dealihea tini eshti Hiljiu a Dumnidzãlui!" 34 Apoea, dupã tsi agiumsirã tu alantã parti, vinirã tu loclu a Ghenezaretlui. 35 Sh-oaminjlji atsilui loc, macãt lu cunuscurã, pitricurã zbor tu tutã loclu di anvãrliga. Sh-adusirã la elu tuts nipututslji. 36 Sh-lji-si rugarã tra s-putea s-bãga mãna tu mardzina a stranjilui a lui, shi tuts atselji tsi bãgarã mãna la stranjiu s-vindicarã.