1 Cãndu lji s-apruchearã a Ierusalemlui sh-agiumsirã tu Betafaghe, aproapi di Muntili a Masnjilor, Isusul pitricu doi ucenitsi, 2 dzãcãnda a lor: "Imnats tu hoara tsi easti nãintea a voastrã, sh-atsia va aflats unã gumarã ligatã sh-gumãriclu cu nãsã. Dizligats-lji sh-adutsets-lji la mini! 3 Sh-macã vãrã vã dsãtsi tsiva, dzãtsets-lji cã, ‘Domnul ari ananghi trã nãshi,’ sh-atsel va li sãlãgheascã trãoarã." 4 Tora aestã s-featsi tra si mplineascã tsi eara dzãsã di la prufitlu:

5 "Dzãtsets-lji a hiljiljei a Sionlui:

‘Ia, ma ts-yini amirãlu a tãu,

inimã-moali, ncãlicat pri unã gumarã,

njicã ca un gumãric, fãtat di un pravdã ti ngãrcari.’"✝

6 Ucenitsilji s-dusirã sh-featsirã ashã cum lji avea ursit Isusul. 7 Adusirã gumara sh-gumãriclu, ashtirnarã pri nãsi mantelili a lor sh-Isusul s-alinã. 8 Sh-unã multsãmi multu mari ashtirna mantelili a lor pri cali, iarã altsãlji frãndzea dedzi di ponji sh-li ashtirna pri cali. 9 Multsãnjili tsi yinea nãinti sh-atseali tsi lu urma, aurla, dzãcãnda:

"Hosana, a Hiljilui al David!

Ghinicuvintat s-hibã atsel tsi yini tu numa a Domnului!

Hosana tu locurili multi analti!"✝

10 Cãndu intrã Isusul tu Ierusalem, tutã cãsãbãlu si sculã pri cicioari, sh-dzãsi: "Cai easti aestu?" 11 Shi multsãmea apãndisi: "Aestu easti Isusul, prufitlu di Nazaretul a Galileiljei."

12 Deapoea Isusul intrã tu templu sh-lji aĝuni tuts atselji tsi vindea sh-acumpãra tu templu sh-arãsturnã measili a alãxitorilor di pãradz shi scamnili a vinditorilor a purunghilor. 13 Sh-lã dzãsi a lor: "Easti scriatã:

‘Casa a mea va s-acljemã casã di rugãciuni,’✝

ma voi u avets turnatã ca unã pishtireauã di furii."

14 Atumtsea vinirã la nãsu tu templu orghi shi shcljiochi sh-Isusul lji vindicã. 15 Ma mãrlji a preftsãlor shi scriblji s-nãrãirã cãndu vidzurã thavmatili tsi elu avea faptã shi cilimenjlji tsi dzãtsea cu harauã tu templu: "Hosana a Hiljilui al David!" 16 Sh-lji dzãsirã: "Ma avdzã tini tsi dzãc aeshti?" Isusul lã dzãsi a lor: "Ie! Nu avets cãntatã pute:

‘Dit gura a njitsilor sh-a bebilor tini ai adratã alãvdari’✝?"

17 Sh-dupã tsi lji alãsã atselji, ishi dit cãsãbã cãtrã Betania, sh-aclo tricu noaptea.

18 Dimineatsa curund, cãndu ma s-turna tu cãsãbã, lu lo foama. 19 Pri cali vidzu un hic sh-lji si-apruche, ma nu aflã tsiva, dicãt mash frãndzãli sh-dzãsi: "S-nu s-leagã frut pute la tini di totãna!" Sh-hiclu s-uscã trãoarã. 20 Sh-cãndu vidzurã aestã ucenitsilji s-ciudisirã sh-dzãsirã: "Cum s-uscã hiclu trãoarã!" 21 Sh-Isusul apãndisi: "Dealihea vã dzãc, ma s-avets pisti shi s-nu vã ndoits, va s-fãtsets nu mash atsea tsi mini lji-feciu a hiclui, ma sh-canda s-lji dzãtsets aishtui munti: ‘Scoal-ti di aclo sh-arucã-ti tu amari’, aestã va si s-facã. 22 Sh-itsido tsi s-cãftats tu rugãciuni, pistipsinda, va u-loats."

23 Cãndu intrã tu templu, mãrlji a preftsãlor sh-aushlji a popului lji s-apruchearã cãndu ma lji nvitsa, sh-lu ntribarã: "Cu tsi autoritati li fatsi tini aesti lucri? Sh-cai ts-ari datã aestã autoritati?" 24 Sh-Isusul apãndisi: "Sh-mini va vã fac unã ntribari, sh-macã voi va nj-apãndisits, mini tutashã va vã dzãc, cã cu tsi autoritati li fac tuti aesti lucri. 25 Pitedzlu a Ioanului di iu vini? Dit tser icã di la oaminjlji?" Sh-elji minduea namisa di nãshi, dzãcãnda: "Ma s-lji dzãtsem dit tser, elu va nã dzãcã: ‘Cãtse atumtsea nu lji pistipsit?’ 26 Macã va lj-dzãtsem, ‘di la oaminjlji,’ avem fricã di multsãmea, cã tuts lu acljeam Ioanul prufit." 27 Sh-lji-apãndisirã a Isusului, dzãcãnda: "Nu shtim." Atumtsea elu lã dzãsi a lor: "Nitsi mini nu va vã dzãc cã cu tsi autoritati li fac aesti lucri."

28 "Tsi minduits? Un om avea doi hilji sh-cum s-dusi cãtrã protlu, lji dzãsi: ‘Hilje, duti azã s-lucredzi tu ayinji!’ 29 Elu apãndisi: ‘Nu voi,’ ma, ma nãpoi s-mitãnjusi shi s-dusi. 30 Deapoea tatãl s-turnã cãtrã a doilu shi lj-dzãsi sh-a lui unã soi. Sh-elu lj-apãndisi sh-dzãsi: ‘Ie, doamne,’ ma nu s-dusi. 31 Cai di dolji lu featsi vrearea a tatãlui?" Elji lj-dzãsirã: "Protlu." Isusul lã dzãsi a lor: "Dealihea vã dzãc cã taxidarlji sh-putanili va intrã nãinti di voi tu amirãriljea a tserurilor." 32 Cã Ioanul vini la voi trã spuneari calea a ndriptatiljei, sh-voi nu lu pistipsit, iarã taxidarlji sh-putanili l-pistipsirã. Cu tut atsea, voi nitsi dupã tsi li avets vidzutã aesti lucri, nu vã mitunjãsit sh-nu pistipsit.

33 "Ascultats unã altã parabolã. Eara un nicuchir di unã casã, tsi siminã un ayinji, sh-u anvãrligã cu gardu shi sãpã un loc di stultsinari aua, sh-adrã un pirĝu di vigljeari. Ayinjea u-pistipsi la niscãntsã ayinjeari sh-fudzi diparti. 34 Cãndu vini chirolu ti adunari, elu pitricu huzmichearlji a lui la ayinjearlji ti loari partea a lui di fruti. 35 Ma ayinjearlji lji acãtsarã huzmichearilji a lui, unu lu bãturã, alantu lu vãtãmarã, sh-a treilu lu vãtãmarã cu chetri. 36 Nãpoi pitricu altsã huzmicheari, ma multsã di protslji, sh-ayinjearlji featsirã cu nãshi un soi. 37 Tu soni, elu pitricu hiljiu a lui, dzãcãnda: ‘Di hiljiu a meu va aibã rispect.’ 38 Ma ayinjearlji cãndu lu vidzurã hilji-su, dzãsirã un cu-alantu: ‘Aestu easti mushtinitorlu. Haidets, s-lu vãtãmãm shi s-lom mushtinirea a lui.’ 39 Sh-lu acãtsarã, lu arcarã nafoarã di ayinji sh-lu vãtãmarã. 40 Tora, cãndu va yinã nicuchirlu a ayinjiljei, tsi va-l fac a ayinjearilor aishtor?" 41 Elji dzãsirã: "Elu va lji vatãmã di tuts arãlji, sh-va lã-u da ayinjea la altsã ayinjeari, tsi va s-da frutili tu chirolu tsi prindi." 42 Isusul lã dzãsi a lor: "Nu avets cãntatã pute la Scriturili:

‘Cheatra tsi masturlji u-scoasirã ca nilipsitã,

s-featsi cheatra a chioshlui.

Aestu easti ciudia tsi Domnul featsi

sh-easti thãvmãtisit tu ocljilji a noshtri’?✝

43 Trã atsea mini ma vã dzãc a voauã, cã va vã si ljea amirãriljea a Dumnidzãlui, sh-va lji si da a unui popul tsi va da fruti. 44 Sh-atsel tsi va s-cadã pri aestã cheatrã, va si s-frãngã, sh-atsel pri cai va cadã cheatra va si sãrãmã." 45 Sh-mãrlji a preftsãlor sh-Fariseilji cãndu li avdzãrã parabolili a lui, aduchirã cã ma grea trã nãshi. 46 Sh-cãfta s-lu acãtsa, ma avea fricã di populu, cã elji lu lugursea prufit.