1 Sh-Isusul ahurhi s-lã zbura nãpoi a lor cu parabolã, dzãcãndã: 2 "Amirãriljea a tserurilor lj-undzeashti a unui amirã, cai etimãsi numta a hiljilui. 3 Sh-pitricu huzmichearlji a lui s-lã greascã a acljimatslor tu numtã, ma elji nu vrurã s-yinã. 4 Pitricu altsã huzmicheari dzãcãnda: ‘Dzãtsets-lã a acljimatslor: Ia, mini am ndreaptã uspetsea, yitsãlji sh-nãmaljili grasi suntu tãljati, sh-itsido easti etimu. Haidets pi numtã.’ 5 Ma elji nu vrurã s-avdã shi s-dusirã, un tu agrul a lui sh-alantu tu lucrili a lui. 6 Sh-alantsãlji dupã tsi acãtsarã huzmichearilji a lui, lji ngiurarã sh-lji vãtãmarã. 7 Atumtsea amirãlu cãndu avdzã aestã, s-nãrãi sh-pitricu armata a lui lji afãnisi atselji vãtãmãtori sh-arsi cãsãbãlu a lor. 8 Atumtsea lã dzãsi a huzmichearilor a lui: ‘Numta easti etimã, ma acljimatsilji nu furã axii. 9 Dutsets-vã la crutsisirea a cãljurilor sh-acljimats pi numtã caitsido tsi s-aflats.’ 10 Sh-huzmichearlji ishir pri cãljuri, adunarã tuts atselji tsi aflarã, arãi sh-bunji, sh-loclu a numtãljei s-umplu cu acljimats. 11 Atumtsea amirãlu intrã s-veadã acljimatsilji, sh-vidzu aclo un om tsi nu avea nviscut stranjili di numtã. 12 Amirãlu lj-dzãsi: ‘Oaspe cum intrash aoa ni avut stranji di numtã?’ Sh-elu ncljisi gura. 13 Atumtsea amirãlu lã dzãsi a huzmichearilor: ‘Ligats-lu di mãnji sh-di cicioari sh-arucats-lu tu scutidlu di nafoarã. Aclo va hibã plãngul sh-cãrtsãnirea a dintsãlor.’" 14 Isusul ncljisi zborlu a lui, dzãcãnda: "Multsã suntu acljimats, ma putsãnji suntu aleptsã."

15 Atumtsea Fariseilji s-dipãrtarã shi s-minduirã, cum s-lu acãtsa tu cãbati. 16 Sh-pitricurã ucenitsilji a lor deadun cu Herodianjlji s-lji dzãtsea: "Nvitsãtore, noi shtim cã tini eshti alihios, sh-tsi nvetsi calea a Dumnidzãlui dupã alihea, sh-nu ti mealã di vãrã, cã tini nu vedz pãrearea di nafoarã a oaminjlor. 17 Dzã-nã tora, cum mindueshti? Easti ndreptu si s-plãteascã taxa a Cesarului, icã nu?" 18 Ma Isusul cunuscãnda arãutatea a lor, lã dzãsi: "Cãtse mi cãrtits, ipucrits? 19 Spunets-nji denarlu a taxãljei." Atumtsea elji lji aspusirã un denar. 20 Sh-elu lã dzãsi a lor: "A cui easti aestã fatsã sh-aestã scriturã?" 21 Elji lj-dzãsirã: "A Cesarului." Atumtsea elu lã dzãsi a lor: "Dats-lã a Cesarului tsi easti a Cesarului sh-a Dumnidzãlui tsi easti a Dumnidzãlui." 22 Sh-elji cãndu avdzãrã aestã, s-ciudisirã, lu alãsarã sh-fudzirã.

23 Tu atsea dzuã vinirã la nãsu Saduceilji, tsi nu pistipsescu tu nyeari, sh-lu ntribarã, 24 dzãcãnda: "Nvitsãtore, Moisiul ari dzãsã: Macã vãrã moari sh-nu alasã cilimenji, fratili a lui si nsoarã cu muljearea a lui, tra s-lji alasã mushtinitori a fratilui a lui. 25 Tora trã noi eara shapti frats, protlu si-nsurã sh-muri. Nu alãsã mushtinitori, sh-u alãsã muljeari-sa a fratilui a lui. 26 Ashã sh-a doilu, sh-a treilu, pãnã la a shaptilu. 27 Tu soni, muri sh-muljearea. 28 Tu nyeari, a cui di aeshti shapti va hibã muljearea? Cã tuts u avurã muljeari." 29 Ma Isusul apãndisi: "Hits tu cãbati cã nu u cunushtets nitsi Scritura, nitsi putearea a Dumnidzãlui. 30 Tu nyeari oaminjlji nitsi va si-nsoarã sh-nitsi va si s-mãritã, ma elji va hibã ca anghilji tu tseruri. 31 Tora, trã nyearea a mortsãlor, nu avets cãntatã tsi vã easti dzãsã di la Dumnidzãlu: 32 ‘Mini escu Dumnidzãlu al Abraham, Dumnidzãlu al Isac sh-al Iacov’? Dumnidzãlu nu easti Dumnidzãlu a mortsãlor ma a yiilor."✝ 33 Sh-multsãmea, cãndu li avdza aesti s-ciudisea di nvitsãtura a lui.

34 Tora Fariseilji cãndu avdzãrã cã Isusul avea astupatã gura a Sadutseilor, s-adunarã deadun. 35 Sh-un di atselji, nvitsãtor di lege, ntribãnda, l-bãgã tu provã: 36 "Nvitsãtore, cai easti ordinlu ma mari tu Lege?" 37 Sh-Isusul dzãsi: "‘S-vrei Domnul, Dumnidzãlu a tãu, cu tutã inima a ta, cu tutã suflitlu a tãu, sh-cu tutã mintea a ta.’✝ 38 Aestã easti protlu sh-ma marli ordin. 39 Sh-a doilu unã soi ca aestu easti: ‘S-vrei aproapilu a tãu un soi ca cum ti vrei tini.’✝ 40 Di aesti doi ordini si-spindzurã Legea sh-Prufitsilji."

41 Tora cãndu s-adunarã Fariseilji, Isusul lji ntribã: 42 "Cum minduits voi trã Hristolu? Hiljiu a cui easti?" Elji dzãsirã: "Al David." 43 Elu lã dzãsi a lor: "Ma cum, atumtsea Davidul, tu Duh, lu acljeamã ‘Domnu’? Davidul dzãsi:

44 ‘Domnul lj-ari dzãsã a Domnului a meu:

Apun-ti tu nandreapta a mea pãnã

cãndu mini s-bagã dushmanjlji a tãlji

ca scamnã sum cicioarili a tali.’✝

45 Macã Davidul lu acljeami ‘Domnu’, cum poati s-hibã hiljiu a lui?" 46 Sh-vãrã nu putu s-lji apãndisea, sh-di atsea dzuã vãrã nu cutidza s-lu ntriba ma.