1 Isusul dzãsi: "Nu giudicats, tra s-nu s-hits giudicats. 2 Cã voi va vã giudicats dupã giudicata tsi voi fãtsets, sh-cu metrul tsi misurats, va vã misurats. 3 Cãtse vedz paljilu tu ocljiul a fratilui a tãu, sh-nu vedz grenda tu ocljiul a tãu? 4 Icã, cum pots s-lji dzãtsi a fratilui a tãu: ‘Ashteaptã s-tsã scot paljiul dit ocljiu’, cãndu ai unã grendã tu ocljiul a tãu? 5 Ipucrite, scoati ma nãinti grenda dit ocljiul a tãu, sh-deapoea va vedz curatã tra s-lji scots paljiul dit ocljiul a fratilui a tãu. 6 Nu lã dats a cãnjilor tsi easti sãmtã sh-nu lã-arucats mãrgãritãrili a voastri nãintea a portsilor, tsi s-nu li ncalcã cu cicioari shi si s-toarnã contra voi shi s-vã disicã."

7 "Dicunjats sh-va vã da, cãftats sh-va aflats, asunats la ushã shi va vã si discljidã. 8 Cai dicunji, ljea. Cai caftã, aflã, sh-atsilui tsi asuni va lji si discljidã.

9 Ari vãrã om namisa di voi, tsi ma s-lji caftã hiljiu pãni, s-lji da cheatrã? 10 Icã ma s-lji caftã peshti, s-lji da nãpãrticã? 11 Atumtsea, macã voi tsi hits arãi shtits s-dats doari buni a hiljilor a voshtri, ahãt ma multu Tatãl a vostru, tsi easti tu tseruri, va lã da lucri buni atsilor tsi lj-caftã. 12 Itsido tsi voi vrets s-vã facã oaminjlji, fãtsets-li sh-voi atsilor, cã aestã easti Legea sh-Prufitsilji.

13 Intrats pri poarta atsea strimta, cã largã easti poarta sh-mari easti calea tsi ti dutsi tu aspãrdzeari, sh-multsã suntu atselji tsi intrã prit nãsã. 14 Cã strimtã easti poarta sh-greauã easti calea tsi dutsi tu banã! Sh-putsãnji suntu atselji tsi u-aflã."

15 "Afirits-vã di prufitsilji arãdioshi, tsi yin la voi nviscuts ca oi, ma di nãuntru suntu luchi arãchitori. 16 Voi va lji cunushtets di frutili a lor. S-adunã vahi aua dit pãljuri, icã hits dit schinji? 17 Ashã itsi pom bun da fruti buni, iarã pomlu atsel arãu da fruti arali. 18 Nu poati un pom bun s-da fruti arali, nitsi un pom arãu s-da fruti buni 19 Itsi pom tsi nu da fruti buni, s-talji shi s-arucã tu foc. 20 Voi va lji cunushtets prufitsilji di frutili a lor.

21 Nu itsi om tsi nj-dzãtsi: ‘Doamne, Doamne,’ va intrã tu amirãriljea a tserurilor. Ma va intrã singur atsel tsi fatsi vrearea a Tatãlui a meu tsi easti tu tseruri. 22 Multsã va nji dzãcã tu atsea dzuã: ‘Doamne, Doamne, nu prufitipsimã tu numa a ta? Nu l-aĝunim demonjlji tu numa a ta? Sh-nu avem faptã multi thavmati tu numa a ta?’ 23 Sh-atumtsea va lã spunã a lor: ‘Mini nu vã am cunuscut pute. Dipãrtats-vã di la mini, voi tuts, tsi avets lucrat anapuda.’"

24 "Trã atsea caitsido tsi li avdi aesti zboari a meali sh-li mplineashti, undzeashti cu un om mintimen, tsi u-ari adratã casa a lui pri cheatrã. 25 Sh-deadi ploai, vini nãcarea, suflarã vimturi, shi s-plãscãnirã pri atsea casã, ma ea nu cãdzu, cã eara thimiljeatã pri cheatrã. 26 Iarã caitsido tsi lã avdi zboarili sh-nu li mplineashti, undzeashti cu un glar, tsi u adrã casa a lui tu arinã. 27 Sh-deadi ploai, vini nãcarea, suflarã vimturi, s-plãscãnirã pri atsea casã sh-ea cãdzu, sh-aspãrdzearea a ljei eara mari."

28 Tora, cãndu Isusul ascãpã di-aesti zboari, multsãnjili armasirã ciudisiti di nvitsãtura a lui, 29 cã elu lã nvitsa ca un om cu puteari, sh-nu ca scriblji.